1 O Dios, diin bala ikaw? Kag diin ang pabelyon nga nagalipod sang imo palanagoan?

2 Tubtob san-o bala nga punggan mo ang imo kamot, kag ang imo mata, huo ang imo putli nga mata, magatan-aw halin sa wala’y katapusan nga kalangitan sang mga kahalitan nga ginahimo sa imo katawhan kag sa imo mga alagad, kag ang imo dulunggan magapamati sang ila mga pakitluoy?

3 Huo, O Ginuo, tubtob san-o bala nila antuson ining mga kahalitan kag di-matarong nga mga pagpangpigos antes maghumok ang imo tagipusuon sa ila, kag magbatyag ka sang kaluoy sa ila?

4 O Ginuong Dios nga Makagagahum, tagtuga sang langit, duta, kag kadagatan, kag sang tanan nga butang nga yara sa mga ini, kag nagapugong kag nagadaug sang yawa, kag sang madulom kag wala’y kasanag nga nasakpan sang Sheol—untaya ang imo kamot, patuloka ang imo mata; ipakakas ang imo pabelyon; indi na pagpalipdi ang imo palanagoan; papamatia ang imo dulunggan; pahumoka ang imo tagipusuon, kag maluoy ka sa amon.

5 Padabdaba ang imo kaakig batok sa amon mga kaaway; kag, sa tuman nga kaakig sang imo tagipusuon, paagi sa imo espada itimalus kami sa mga kahalitan sa amon.

6 Dumduma ang imo nagaantos nga mga santos, O amon Dios; kag magakalipay ang imo mga alagad sa imo ngalan tubtob sa wala’y katapusan.

7 Anak ko, paghidaet sa imo kalag; ang imo kabudlayan kag imo mga pag-antos mangin sa malip-ot lamang nga tion;

8 Kag dayon, kon mabatas mo ini sing maayo, pagapakataason ka sang Dios sa langit; magamadinalag-on ka sa tanan mo nga kaaway.

9 Ang imo mga abyan nagaunong sa imo, kag tamyawon ka nila liwat sing may mainit nga mga tagipusuon kag mainabyanon nga mga kamot.

10 Indi ka pa pareho kay Job; ang imo mga abyan wala nagabais sa imo ukon nagapabangod sa imo sang paglapas pareho sa ginhimo nila kay Job.

11 Kag sila nga nagapabangod sa imo sang paglapas, madula ang ila paglaum, kag matunaw ang ila mga ginapaabot pareho sang tun-og nga nagakatunaw sa mainit nga silak sang nagabutlak nga adlaw;

12 Kag ang Dios nagpahamtang man sang iya kamot kag pat-in agud bag-ohon ang mga tinion kag mga panahon, kag agud bulagon ang ila mga kaisipan, agud indi nila mahangpan ang iya dalayawon nga mga paghikot; agud iya man sila matilawan kag madakpan sa ila kaugalingon nga pagpatalang;

13 Bangod man nga malain ang ila mga tagipusuon, kag ang mga butang nga handa nila ipaagom sa iban, kag luyag nila nga antuson sang iban, matabo sa ila mga kaugalingon sa pinakabug-os;

14 Agud mapaslawan man sila kag ang ila paglaum madula;

15 Kag sa indi madamo nga tinuig sugod subong, sila kag ang ila kaliwat pagasilhigon halin sa idalom sang langit, siling sang Dios, sa bagay nga wala sing bisan isa sa ila ang mabilin nga nagatindog malapit sa pader.

16 Ginasumpa ang tanan sinang magpamatok sa akon mga pinili, siling sang Ginuo, kag magsinggit nga nakasala sila bisan nga wala sila nakasala sa akon panulok, kundi naghimo sing husto sa akon panulok, kag sinang ginsugo ko sa ila, siling sang Ginuo.

17 Apang inang mga nagasinggit sang paglapas nagahimo sini bangod sila mga alagad sang sala, kag mga anak mismo sang pagkadi-matinumanon.

18 Kag sa sinang mga nagasumpa sing di-matuod batok sa akon mga alagad, agud nga madala nila sila sa pagkaulipon kag kamatayon—

19 Kalisud sa ila; bangod nakasala sila sa akon mga anak indi sila pagtugotan nga makabaton sang mga ordinansa sang akon balay.

20 Indi mapuno ang ila alat, makalapugday ang ila mga balay kag ila mga balay-talagoan, kag sila mismo kaugtan sinang mga nagainto sa ila.

21 Indi sila makaangkon sang kinamatarong sa pagkapari, bisan ang ila kaliwat nga magasunod sa ila sa tanan nga henerasyon.

22 Maayo pa nga pamug-atan sila sa liog sang bato sang galingan, kag malunod sila sa idalom sang dagat.

23 Kalisud sa ila nga nagapabudlay sa akon katawhan, kag nagatabug, kag nagapatay, kag nagapamatuod batok sa ila, siling sang Ginuo sang mga Kasoldadohan; isa ka henerasyon sang mga man-og nga indi makalikaw sa silot sang impiyerno.

24 Tan-awa, makita kag mahibaloan sang akon mga mata ang tanan nila nga buhat, kag natigana ko na ang madasig nga paghukom sa husto nga panahon para sa ila tanan;

25 Kay may panahon nga nahatag para sa tagsa ka tawo suno sa iya mga binuhatan.

26 Ang Dios magahatag sa inyo sang ihibalo paagi sa iya Balaan nga Espiritu, huo, paagi sa di-mamitlang nga dulot sang Balaan nga Espiritu nga wala pa napahayag halin sa ginsuguran sang kalibutan tubtob subong;

27 Nga ginhulat sang aton mga katigulangan nga ginpaabot gid nga ipahayag sa katapusan nga mga tinion, nga gintudlo sa ila mga kaisipan sang mga anghel, bilang gintigana para sa kabug-osan sang ila himaya;

28 Isa ka panahon nga magaabot nga wala sing bisan ano nga ilipod, kon may isa lang ka Dios ukon madamo nga dios, igapahayag ang mga ini.

29 Ang tanan nga trono kag mga ginsakpan, tanan nga pamunoan kag mga gahum ipahayag kag ihatag sa tanan nga nagpadayon nga may kaisog para sa ebanghelyo ni Jesucristo.

30 Kag amo man, kon may mga limitasyon nga ipahamtang parte sa kalangitan ukon sa kadagatan, ukon sa mala nga duta, ukon sa adlaw, bulan ukon mga bituon—

31 Ang tanan nga tinion sang ila mga pagtiyog, tanan nga natalana nga mga adlaw, mga bulan kag mga tuig, kag tanan nga adlaw sang ila mga adlaw, mga bulan kag mga tuig, kag tanan nila nga himaya, mga layi, kag natalana nga mga tinion, ipahayag sa mga adlaw sang dispensasyon sang kabug-osan sang mga panahon—

32 Suno sa sinang gin-ordinan sa tunga sang Konseho sang Wala’y Katapusan nga Dios sang tanan nga iban pa nga dios antes pa sa ginsuguran sining kalibutan, nga igatigana sa pagtapos kag sa katapusan sini, sa tion nga ang tagsa ka tawo makasulod sa iya wala’y katapusan nga presensya kag sa iya wala’y untat nga kapahuwayan.

33 Tubtob san-o bala nga magapabilin nga mahigko ang nagailig nga tubig? Ano nga gahum ang magapugong sang kalangitan? Pareho nga di-mahimo sang tawo nga untayon ang iya gamay nga butkon agud punggan ang suba sang Missouri sa iya sini napahamtang nga alagyan, ukon lisuon ang iya sini direksyon, amo man nga indi mapunggan ang Makagagahum sa pagbubo sang ihibalo halin sa langit sa mga ulo sang mga Santos sa Ulihing mga Adlaw.

34 Tan-awa, madamo ang ginatawag apang diutay lang ang ginapili. Kag ngaa wala sila ginapili?

35 Bangod nahamtang gid ang ila mga tagipusuon sa mga butang sining kalibutan, kag nagahandum sang mga pagdayaw sang mga tawo gani, wala nila natun-an ining isa ka leksyon—

36 Nga ang mga kinamatarong sang pagkapari indi mahamulag sa mga gahum sang langit, kag ang mga gahum sang langit indi sarang gamiton ukon ipatuman kundi suno lamang sa mga prinsipyo sang pagkamatarong.

37 Nga mahatag ini sa aton, matuod ini; apang kon himuon naton nga takpan ang aton mga sala, ukon busgon ang aton bugal, aton hambog nga ambisyon, ukon maggahum ukon magsakop ukon magpilit sa mga kalag sang mga anak sang katawhan sa bisan ano nga lebel sang pagkadi-matarong, tan-awa, magapalayo ang kalangitan; nagakasubo ang Espiritu sang Ginuo; kag kon magpalayo ini, Amen sa pagkapari ukon sa awtoridad sang sina nga tawo.

38 Tan-awa, makamarasmas na lang sia nga napabay-an sia nga nagaisahanon sa pagsipa sang tunok, sa paghingabot sang mga santos, kag sa pagpakig-away batok sa Dios.

39 Natun-an naton paagi sa masubo nga eksperiyensya nga kinaiya kag kinaugali sing halos tanan nga tawo nga pagkatapos sila makaangkon sing diutay nga awtoridad sa ila pagpati, gilayon sila nga magsugod sa paggamit sing di-matarong nga pagdumala.

40 Gani, madamo ang ginatawag apang diutay lang ang ginapili.

41 Wala sang gahum ukon impluwensya nga sarang ukon dapat ipatuman paagi sa pagkapari kundi paagi lamang sa paghaylo, sa pagkamainantuson, sa kaayo kag kalulo, kag sa gugma nga matuod-tuod;

42 Paagi sa kaayo, kag lubos nga kaalam nga makapadako sing tuman sa kalag nga wala sang pagpakunokuno, kag wala sang pagdaya—

43 Nga nagasaway sa husto nga tion sing may kaisog kon natandog sang Balaan nga Espiritu; kag dayon magpakita pagkatapos sing dugang nga gugma sa iya nga imo ginsaway agud nga indi ka niya pagkabigon nga iya kaaway;

44 Agud mahibaloan niya nga ang imo katampad mas mabakod sangsa mga higot sang kamatayon.

45 Pun-a man ang imo tagipusuon sang putli nga paghigugma para sa tanan nga tawo, kag sa panimalay sang pagtuo, kag adornohi sang pagkamatarong ang imo mga panghunahuna sing wala’y untat; dayon ang imo pagsalig magabakod sa presensya sang Dios; kag ang doktrina sang pagkapari magatulo sa imo kalag pareho sang tun-og halin sa langit.

46 Ang Balaan nga Espiritu mangin dalayon mo nga kaupod, kag ang imo setro wala nagaliwat nga setro sang pagkamatarong kag kamatuoran; kag ang imo ginsakpan mangin wala’y katubtuban nga ginsakpan, kag hilway ini nga magailig sa imo tubtob sa wala’y katapusan.