1 Asaase n’ano bɔhwehwɛ wo dzin ekyir kwan, na nkwaseafo besi wo atwetwe, na hɛl bɔsoɛr etsia wo;

2 Na mbom nyia n’akoma mu tsew, na enyansafo, nye ebirɛmpɔn, nye atseneneefo bɛgye afotu, nye tumdzi, nye nhyira efi wo nsamu aber biara.

3 Na wo nkorɔfo runndua akɔnkɔnsafo hɔn dasegye do nndan hɔn ekyir mma wo da.

4 Ɔwɔ mu dɛ hɔn ndzeyɛɛ dze wo bɔto ɔhaw nye efiadze mu, naaso wobedzi wo nyi, na mbom wɔ mber tsiabaa mu, na wo ndze bɛyɛ hu wɔ w’atamfo finimfin sen awendadze bɔyafo, osian wo tseneneeyɛ ntsi; na wo Nyankopɔn begyina wo nkyɛn afebɔɔ kesi afebɔɔ.

5 Sɛ wɔdze wo dua abɛbrɛsɛ mu; sɛ ikegyina esian mu wɔ enuanom adaadaafo ntamu; sɛ ikegyina esian mu wɔ edwotwafo ntamu; sɛ ikegyina esian mu wɔ asaase anaa po do;

6 Sɛ wɔdze nsɛm a innyim to wo do; sɛ w’atamfo tu hyɛ wo do; sɛ wɔtsew wo fi w’egya na wo nã nye wo nuanom mbarimba na mbaa fekuw mu; na sɛ w’atamfo twe nkrantsee dze tsew wo fi wo yer no bo mu, nye wo mba nkyɛn, na wo babanyin panyin a mbrɛana oedzi mfe esia pɛr bosuo w’atar mu dzendzen, na ɔkã dɛ, M’egya, m’egya, ebɛnadze ntsi na erennye hɛn nntsena yi? O, m’egya, ebɛnadze na nkorɔfo yi dze rekɛyɛ wo? na sɛ wɔdze nkrantsee twe no fi wo nkyɛn, na wotwuw wo adze dze wo kɔ efiadze, na w’atamfo kyin wo ho dɛ mpataku a wɔrohwehwɛ eguambaa bɔgyaa;

7 Na sɛ wɔtow wo kyen mona mu, anaa wɔdze wo hyɛ ewudzifo nsa, na wobu wo okumfɔ; sɛ wɔtow wo kyen po bun mu; sɛ po asorɛkye nye wo dzi aper; sɛ ehum dzendzen bɛyɛ wo tamfo; sɛ sor yɛ kebii, na abɔdze-dze nyina bɔ mu siw wo kwan, na iyinom nyina ekyir no, sɛ hɛl ankasa bue n’anomu wɔ wo do a, me babanyin, hu dɛ dɛm ndzɛmba yinom nyina bɛma wo ntɔhunii, na ɔbɛyɛ wo mfaso.

8 Nyimpa Ba no duaa iyinom nyina mu. Ana eyɛ kɛse sen no?

9 Dɛm ntsi, mma mmpa abaw, na asɔfodzi no bɛka wo nkyɛn; ɔahyehyɛ n’ahe ama hɔn, worunntum nntra. Wonyim wo nda, na wɔnnkɛtsew wo mfe do; dɛm ntsi, mma nnsuro dza nyimpa bɛyɛ, osiandɛ Nyame nye wo wɔ hɔ afebɔɔ kesi afebɔɔ.