1 Bangod ginpahayag sang Ginuo sa akon nga ang akon mga kaaway, sa Missouri kag sa sining Estado, liwat nga nagalagas sa akon; kag bangod nga ginalagas nila ako nga wala sang rason, kag wala man sila sing bisan diutay lang nga bahin ukon dagway sang hustisya ukon kinamatarong sa pagkaso batok sa akon; kag bangod nga ang ila mga alegasyon nabase tanan sa pinakamaitom nga kabutigan, nahunahuna ko nga nagakaigo kag kinaalam para sa akon nga magbiya sa sining lugar sa malip-ot lamang nga tion para sa akon kaugalingon nga kaluwasan kag sa kaluwasan sining katawhan. Luyag ko ihambal sa tanan nga kaupod ko sa negosyo nga gintugyan ko ang akon mga hilikuton sa negosyo sa mga representante kag mga klerk nga amo ang magapalakat sang tanan sa negosyo sa madasig kag husto nga pamaagi, kag magasiguro nga ang tanan ko nga utang mabayaran sa husto nga tion paagi sa pagbaligya sang mga pagkabutang ukon sa iban pa nga paagi, suno sa ginapangayo sang sitwasyon ukon suno sa itugot sang mga sirkumstansya. Kon mahibaloan ko nga nag-untat na ang unos, mabalik ako liwat sa inyo.

2 Kag parte sa mga peligro nga ginpili ako sa pagbatas, ang mga ini daw magamay na lamang nga butang sa akon bangod ang kahisa kag kaakig sang tawo nangin kinaandan na nga sitwasyon sa tanan nga adlaw sang akon kabuhi; kag sa kon ano nga kabangdanan daw mabudlay ipaathag luwas lang nga naordinan ako antes pa gintuga ang kalibutan para sa pila ka maayo nga katuyoan ukon sa malain, suno sa inyo pagkabig sini. Kamo na ang maghukom para sa inyo mga kaugalingon. Ang Dios nakahibalo sining tanan nga butang kon bala maayo ini ukon malain. Apang, naandan ko na ang maglangoy sa madalom nga tubig. Ini tanan ordinaryo na lang sa akon; kag nagabatyag ako, pareho kay Pablo, nga maghimaya sa pag-antos; kay tubtob sa sining adlaw ang Dios sang akon mga katigulangan nagluwas sa akon halin sini tanan, kag magaluwas sa akon sugod subong; kay tan-awa, kag yari karon, magmadinalag-on ako sa tanan ko nga kaaway kay ang Ginuong Dios naghambal sini.

3 Gani, tugoti nga magsinadya kag magpangalipay sing tuman ang tanan nga santos; kay ang Dios sang Israel amo ang ila Dios, kag magahatag sia sing matarong nga tumbas sa mga ulo sang tanan nga nagapangpigos sa ila.

4 Kag sa liwat, sa pagkamatuod ini ang siling sang Ginuo: Papadayona kag indi pagpauntata ang buluhaton sa akon templo, kag ang tanan nga buluhaton nga ginhatag ko sa inyo; kag dobleha pa gid ang inyo katutum, kag inyo pagpadayon, kag pagbatas, kag inyo mga pagpangabudlay, kag indi ninyo madula ang inyo padya, siling sang Ginuo sang mga Kasoldadohan. Kag kon ginahingabot nila kamo, sa amo man ginhingabot nila ang mga propeta kag matarong nga mga tawo nga nauna sa inyo. Ini tanan may padya sa langit.

5 Kag sa liwat, ginahatag ko sa inyo ang mensahe parte sa bunyag para sa inyo mga minatay.

6 Sa pagkamatuod, ini ang siling sang Ginuo sa inyo parte sa inyo mga minatay: Kon ang bisan sin-o sa inyo bunyagan para sa inyo mga minatay, dapat may tagsulat, kag pasaksihon sia sang inyo mga bunyag; pabation sia sa iya mga dulunggan agud makapamatuod sang kamatuoran, siling sang Ginuo;

7 Agud nga ang tanan ninyo nga sinulatan masulat sa langit; kon ano man ang inyo hugpongon sa duta pagahugpongon sa langit; kon ano man ang inyo hubaron sa duta pagahubaron sa langit;

8 Kay malapit ko na ipanumbalik ang madamo nga butang sa duta parte sa pagkapari, siling sang Ginuo sang mga Kasoldadohan.

9 Kag sa liwat, iplastar ang tanan nga rekord agud nga ang mga ini mabutang sa mga talagoan sini sa akon balaan nga templo, agud dumdumon sa tanan nga henerasyon, siling sang Ginuo sang mga Kasoldadohan.

10 Ihambal ko sa tanan nga santos nga luyag ko, upod ang dako kaayo nga kaluyag, nga maghambal sa ila sa pulpito parte sa topiko sang bunyag para sa mga minatay sa masunod nga Adlaw nga Inugpahuway. Apang bangod indi posible para sa akon nga himuon ini, isulat ko na lang ang pulong sang Ginuo kon san-o nga nagakaigo parte sa sinang topiko, kag ipadala ini sa inyo paagi sa koreo, kag amo man ang madamo nga iban pa nga butang.

11 Ginatapos ko na ang akon sulat sa sini nga tion bangod sa kakulang sa oras; kay nagabantay ang kaaway, kag pareho sang ginsiling sang Manluluwas, nagapakari ang prinsipe sining kalibutan, apang wala sia sang gahum sa akon.

12 Tan-awa, ang akon pangamuyo sa Dios amo nga maluwas kamo tanan. Kag nagapirma ako sa idalom ang inyo alagad sa Ginuo, propeta kag manugpanan-aw sang Ang Simbahan ni Jesucristo sang mga Santos sa Ulihing mga Adlaw.