1 Pareho sang ginhambal ko sa inyo sa akon sulat antes ako naghalin sa akon puluy-an, nga sulatan ko kamo kon san-o nga nagakaigo kag hatagan kamo sang ihibalo parte sa madamo nga topiko, ginapadayon ko subong ang topiko sang bunyag para sa mga minatay kay ining topiko daw pirme ko ginahunahuna, kag nagaapekto ini sang akon balatyagon sing lubos halin pa sang ginalagas ako sang akon mga kaaway.

2 Nagsulat ako sing pila ka pulong sang rebelasyon sa inyo parte sa tagsulat. May pila ako ka dugang nga paghangop parte sa sining butang nga ginapamatud-an ko subong. Ini amo ang, napahayag sa una ko nga sulat nga dapat may tagsulat, nga dapat mangin saksi sia, kag magpamati man sia paagi sa iya mga dulunggan agud makahimo sia sang sinulatan nga matuod sa atubang sang Ginuo.

3 Karon, parte sa sining butang, mangin mabudlay kaayo para sa isa ka tagsulat nga magtambong sa tanan nga tion, kag maghimo sang tanan nga buluhaton. Agud malikawan ining problema, mahimo magpili sing isa ka tagsulat sa tagsa ka ward sang siyudad nga may nagakaigo nga ikasarang sa pagsulat sing sibo sang mga ginahambalan sa miting; kag dapat mangin detalyado kag maid-id sia sa pagsulat sang tanan nga nagkalatabo nga nagapamatuod sa iya rekord nga nakita niya sang iya mga mata, kag nabatian sang iya mga dulunggan nga nagahatag sang petsa, kag mga ngalan, kag iban pa, kag sang kasaysayan sang bug-os nga hitabo; nga nagahingalan pa gid sang tatlo ka tawo nga nagtambong kon may ara, nga makapamatuod sang amo man sa bisan ano nga tion kon pangabayon agud nga sa baba sang duha ukon tatlo ka saksi mapalig-on ang tagsa ka pulong.

4 Dugang pa, dapat may yara sang pangkabilogan nga tagsulat kon kay sin-o ining iban nga mga rekord sarang mahatag upod ang mga sertipiko nga napirmahan sang lokal nga mga tagsulat, nga nagapakita nga ang rekord nga ginhimo nila matuod. Dayon mahimo idugang sang pangkabilogan nga tagsulat sang simbahan ang rekord sa pangkabilogan nga libro sang simbahan lakip ang mga sertipiko kag mga ngalan sang tanan nga nagtambong nga mga saksi, lakip ang iya kaugalingon nga pahayag nga nagapati gid sia nga ang pahayag nga nasambit sa ibabaw kag mga rekord matuod suno sa iya pagkahibalo parte sa pangkabilogan nga pagkatawo sang lokal nga mga tagsulat kag ang pagpili sa ila sang simbahan. Kag kon mahimo na ini sa pangkabilogan nga libro sang simbahan, ang rekord mangin amo man ka balaan, kag magapalig-on sang ordinansa nga daw pareho lang nga nakita niya sang iya mga mata kag nabatian sang iya mga dulunggan, kag naghimo sia sang rekord sang amo man sa pangkabilogan nga libro sang simbahan.

5 Mahimo nga nagahunahuna kamo nga ining pagpahamtang sang mga butang maid-id kaayo; apang sugiran ko kamo nga ini agud lamang tumanon ang pagbuot sang Dios paagi sa pagsunod sang ordinansa kag pagpanghanda nga gin-ordin sang Ginuo kag ginhanda antes pa gintuga ang kalibutan para sa kaluwasan sang mga minatay nga wala sing may nahibaloan parte sa ebanghelyo.

6 Kag dugang pa, luyag ko nga dumdumon ninyo nga si Juan nga Manugpahayag sang Rebelasyon nagpamalandong sini mismo nga topiko parte sa mga patay, sang sia nagpahayag, nga inyo makit-an nga nasulat sa Bugna 20:12—Kag nakita ko ang mga patay, ang magamay kag dalagko, nga nagatindog sa atubangan sang Dios; kag ang mga libro ginbukad; kag ang isa naman ka libro ginbukad, nga amo ang libro sang kabuhi; kag ang mga patay ginhukman bangod sa nasulat sa mga libro, suno sa ila binuhatan.

7 Matukiban ninyo sa sining sinambit nga dinalan nga ginbuksan ang mga libro; kag isa pa ka libro ang ginbuksan nga amo ang libro sang kabuhi; apang ang mga patay ginhukman halin sa sinang ginsulat sa mga libro suno sa ila mga binuhatan; gani, ang mga libro nga ginsambit amo ang mga libro nga nag-unod sang rekord sang ila mga binuhatan, kag nagatumod sa mga rekord nga nasulat sa kalibutan. Kag ang libro nga amo ang libro sang kabuhi amo ang rekord nga nasulat sa langit; ang prinsipyo nga nagasanto mismo sa doktrina nga ginsugo sa inyo sa rebelasyon nga nalakip sa sulat nga ginsulat ko sa inyo antes pa ako naghalin sa akon puluy-an—agud nga ang tanan ninyo nga sinulatan masulat sa langit.

8 Karon, nasandig ang kinaiya sining ordinansa sa gahum sang pagkapari suno sa rebelasyon ni Jesucristo kon sa diin gintugotan nga kon ano man ang inyo hugpongon sa duta pagahugpongon sa langit; kag kon ano man ang inyo hubaron sa duta pagahubaron sa langit. Ukon, sa iban nga pulong, sa lain naman nga pagtan-aw sang paglubad, kon ano man ang inyo nasulat sa duta igasulat sa langit, kag kon ano man ang indi ninyo nasulat sa duta indi igasulat sa langit; kay ang mga patay pagahukman halin sa sinang ginsulat sa mga libro suno sa ila kaugalingon nga mga binuhatan kon sila man mismo ang naghikot sang mga ordinansa sa ila kaugalingon nga propria persona, ukon paagi sa ila kaugalingon nga mga representante suno sa ordinansa nga ginhanda sang Dios para sa ila kaluwasan antes pa gintuga ang kalibutan, suno sa mga rekord nga ginsulat nila parte sa ila mga minatay.

9 Ayhan para sa iban daw tuman ka di-kinaandan sang doktrina nga aton ginahambalan—isa ka gahum nga nagasulat ukon nagahugpong sa duta kag nagahugpong sa langit. Apang, sa bilog nga katuigan sang kalibutan, sa tagsa ka tion nga ang Ginuo nagahatag sing isa ka dispensasyon sang pagkapari sa bisan sin-o nga tawo paagi sa matuod-tuod nga rebelasyon ukon sa bisan ano nga grupo sang mga tawo, ini nga gahum pirme gid nga ginahatag. Gani, kon ano man ang ginhimo sinang mga tawo nga may awtoridad, sa ngalan sang Ginuo, kag ginhimo ini sing husto kag sing matutum, kag nagsulat sing husto kag matutum nga rekord sang amo man, ini nangin isa ka layi sa duta kag sa langit, kag indi mahimo nga bawion suno sa mga mando sang dakong Jehova. Ini isa ka matuod nga pahayag. Sin-o bala ang makapamati sini?

10 Kag sa liwat, bilang sulundan binag-binaga ang, Mateo 16:18, 19: Kag ako man nagasiling sa imo, Nga ikaw si Pedro, kag sa ibabaw sining bato tukoron ko ang akon simbahan; kag ang mga ganhaan sang impiyerno indi makadaug sa iya. Sa imo akon ihatag ang mga yabi sang ginharian sang langit: kag ang bisan ano nga imo hugpongon sa duta pagahugpongon sa langit; kag ang bisan ano nga imo hubaron sa duta pagahubaron sa langit.

11 Karon ang dako kag mayor nga sekreto sang kabilogan sini nga butang, kag ang summum bonum sang bug-os nga topiko nga yara sa atubang naton nasandig sa pag-angkon sang mga gahum sang Balaan nga Pagkapari. Kay sia nga ginahatagan sining mga yabi wala sang kabudlayan sa pag-angkon sang ihibalo sang mga kamatuoran parte sa kaluwasan sang mga anak sang katawhan, para sa mga patay man ukon sa mga buhi.

12 Sa sini ang himaya kag dungog, kag kawala’y kamatayon, kag kabuhi nga wala’y katapusan—Ang ordinansa sang bunyag paagi sa tubig, ang pagtugmaw diri agud mangin pareho sang simbolismo sang mga patay agud nga ang isa ka prinsipyo magsanto sa isa pa gid; ang pagtugmaw sa tubig kag pagpabutwa halin sa tubig nagasimbolo sang pagkabanhaw sang mga patay halin sa ila mga lulubngan; gani, ining ordinansa ginpahamtang agud maghimo sang kaangtanan sa ordinansa sang bunyag para sa mga minatay bangod nagasimbolo ini sang mga patay.

13 Gani, ang tulugmawan ginpahamtang bilang simbolo sang lulubngan, kag ginsugo nga ibutang sa isa ka lugar nga yara sa idalom kon sa diin masami magtipon ang mga buhi agud mapain and mga buhi sa mga patay, kag agud nga ang tanan nga butang may simbolo, kag agud nga magsanto ang mga ini sa isa kag isa—nga inang dutan-on magsunod sa sinang langitnon pareho sang ginpahayag ni Pablo sa 1 Mga Taga-Corinto 15:46, 47, kag 48:

14 Apang ang espirituhanon indi ang nahauna kundi ang pisikal; kag pagkatapos ang espirituhanon. Ang nahauna nga tawo halin sa duta, dutan-on; ang ika-duha nga tawo amo ang Ginuo halin sa langit. Kon ano ang tawo nga dutan-on, amo man ang mga dutan-on; kag kon ano ang tawo nga langitnon, amo man ang mga langitnon. Kag kon ano ang mga rekord parte sa inyo mga minatay nga gintipon sing husto sa duta, pareho lang sa mga rekord sa langit. Gani, ini ang gahum sang paghugpong kag paggapos, kag sa isa pa gid ka pulong, ang mga yabi sang ginharian nga nasandig sa yabi sang ihibalo.

15 Kag karon, labing pinalangga ko nga mga kauturan, pasaligon ko kamo nga ang mga ini mga prinsipyo parte sa mga patay kag sa mga buhi nga indi mahimo ibale-wala lamang, parte sa aton kaluwasan. Kay ang ila kaluwasan kinahanglanon kag importante sa aton kaluwasan suno sa ginasiling ni Pablo parte sa mga amay—nga indi sila maperpekto kon wala kita—kag indi man kita maperpekto kon wala ang aton mga minatay.

16 Kag karon, parte sa bunyag para sa mga minatay, hatagan ko kamo sing isa pa nga ginsambit ni Pablo, 1 Mga Taga-Corinto 15:29: Sa isa ka bagay, ano bala ang buot silingon sang mga tawo nga nagapabunyag para sa mga patay kon ang mga patay wala ginabanhaw? Ngaa bala nagapabunyag sila para sa mga patay?

17 Kag sa liwat, parte sa sining sinambit nga dinalan hatagan ko kamo sing isa ka sinambit nga dinalan halin sa isa sang mga propeta nga nagtuon sang iya mata sa pagpanumbalik sang pagkapari, mga himaya nga igapahayag sa ulihing mga adlaw, kag sa espesyal nga paagi sa sining labing mahimayaon sang tanan nga topiko nga kabahin sang wala’y katubtuban nga ebanghelyo nga amo ang, bunyag para sa mga minatay; kay si Malaquias nagasiling sa, katapusan nga kapitulo, mga bersikulo ika-5 kag ika-6: Tan-awa, ipadala ko sa inyo si Elias nga propeta antes mag-abot ang dako kag makahaladlok nga adlaw sang Ginuo: Kag lisuon niya ang tagipusuon sang mga amay sa mga anak, kag ang tagipusuon sang mga anak sa ila mga amay, basi nga mag-abot ako kag sakiton ang duta sing sumpa.

18 Mahimo kuntani ako makahatag sing mas maathag pa nga paglubad sini apang husto na ini kaathag subong agud magsigo sa akon katuyoan. Husto na nga mahibaloan sa ini nga sitwasyon nga ang duta pagasakiton sang sumpa luwas lang kon may yara sang isa ka sahi sang kaw-id nga magaangot sang mga amay sa mga anak nga parte sa pila ukon iban pa nga topiko—kag tan-awa ano ina nga topiko? Ini amo ang bunyag para sa mga minatay. Kay indi kita maperpekto kon wala sila; kag indi man sila maperpekto kon wala kita. Indi man sila ukon kita maperpekto kon wala inang mga nagkalamatay sa ebanghelyo; kay importante ini sa pagsugod sang dispensasyon sang kabug-osan sang mga panahon nga ang amo nga dispensasyon nagasugod na sa pagluntad, nga ang bug-os kag kompleto kag perpekto nga pag-isa, kag pag-angot sang mga dispensasyon, kag mga yabi, kag mga gahum, kag mga himaya mahanabo, kag ipahayag halin sa panahon ni Adan bisan pa tubtob sa subong nga panahon. Kag indi lamang ini, kundi inang mga butang nga wala gid napahayag halin pa sa pagtuga sang kalibutan kundi ginlipdan sa mga maalam kag mga mahinalungon, igapahayag sa mga kabataan kag mga nagasoso pa lang sa sining dispensasyon sang kabug-osan sang mga panahon.

19 Karon, ano ang aton mabatian sa ebanghelyo nga aton nabaton? Isa ka tingug sang kalipay! Isa ka tingug sang kaluoy halin sa langit; kag isa ka tingug sang kamatuoran halin sa duta; maayong balita para sa mga patay; isa ka tingug sang kalipay para sa mga buhi kag sa mga patay; maayong balita sang dako nga kalipay. Daw ano katahum sa mga bukid ang mga tiil sinang mga nagadala sang maayong balita sang kaayohan, kag nagasiling sa Sion: Tan-awa, ang imo Dios nagahari! Pareho sang mga tun-og sang Carmel, ang ihibalo parte sa Dios magatupa man sa ila!

20 Kag sa liwat, ano ang aton mabatian? Maayong balita halin sa Cumora! Si Moroni, isa ka anghel halin sa langit nga nagapahayag sang katumanan sang propesiya sang mga propeta—ang libro nga igapahayag. Isa ka tingug sang Ginuo sa kamingawan sang Fayette, Seneca county nga nagapahayag sang tatlo ka saksi nga magapamatuod parte sa libro! Ang tingug ni Miguel sa mga pangpang sang Susquehanna nga nakilala ang yawa sang nagpakita ini bilang anghel sang kasanag! Ang tingug nanday Pedro, Santiago, kag Juan sa kamingawan sa tunga sang Harmony, Susquehanna county, kag Colesville, Broome county, sa suba sang Susquehanna nga nagapahayag sang ila mga kaugalingon nga nagaangkon sang mga yabi sang ginharian, kag sang dispensasyon sang kabug-osan sang mga panahon!

21 Kag sa liwat, ang tingug sang Dios sa kwarto sang tigulang nga si Tatay Whitmer sa Fayette, Seneca county, kag sa nanari-sari nga mga tinion, kag sa nagkalain-lain nga mga lugar sa tanan nga pagpanglakaton kag mga pag-antos sining Simbahan ni Jesucristo sang mga Santos sa Ulihing mga Adlaw! Kag ang tingug ni Miguel, ang arkanghel; ang tingug ni Gabriel, kag ni Rafael, kag sang nagkalain-lain nga mga anghel halin kay Miguel ukon Adan tubtob sa subong nga panahon, tanan nagapahayag sang ila dispensasyon, ila mga kinamatarong, ila mga yabi, ila mga dungog, ila pagkaharianon kag himaya, kag sang gahum sang ila pagkapari; nga nagahatag sing dinalan sa dinalan, pagsulundan sa pagsulundan; diutay diri, kag diutay didto; nga nagahatag sa aton sang kasulhayan paagi sa pagwali sinang magaabot, nga nagapalig-on sang aton paglaum!

22 Mga kauturan, indi bala kita magpadayon sa amo kadako nga kawsa? Mag-abante kag indi mag-atras. Kaisog, mga kauturan; kag abante, abante sa kadalag-an! Papangalipaya ang inyo mga tagipusuon, kag mangin tuman kamasinadyahon. Pakantaha sa hinali ang kalibutan. Pahambala ang mga patay sang mga ambahanon sang wala’y katapusan nga pagdayaw sa Haring Emmanuel nga nag-ordin, antes ginhimo ang kalibutan, sinang magabulig sa aton sa pagtubos sa ila halin sa ila bilanggoan; kay pagahilwayon ang mga preso.

23 Pahugyawa sa kalipay ang kabukiran, kag kamo tanan nga kapatagan magsinggit sing mabaskog; kag kamo tanan nga kadagatan kag mga mala nga duta isugid ang katilingalahan sang inyo Wala’y Katapusan nga Hari! Kag kamo nga mga suba, kag mga sapa, kag mga sapa-sapa, mag-ilig nga may kasadya. Padayawa ang mga kakahuyan kag tanan nga kahoy sang latagon sa Ginuo; kag kamo nga matig-a nga mga bato maghibi sa kalipay! Kag pakantaha sing tingob ang adlaw, bulan, kag mga bituon sang kaagahon, kag pahugyawa sa kalipay ang tanan nga anak sang Dios! Kag ipapahayag sa wala’y katapusan nga mga tinuga ang iya ngalan tubtob sa wala’y katapusan! Kag sa liwat ginasiling ko, daw ano ka mahimayaon ang tingug nga mabatian naton halin sa langit nga nagabantala sa aton mga dulunggan sang himaya, kag kaluwasan, kag dungog, kag kawala’y kamatayon, kag kabuhi nga wala’y katapusan; mga ginharian, mga pamunoan, kag mga gahum!

24 Tan-awa, ang dako nga adlaw sang Ginuo malapit na; kag sin-o bala ang makalampuwas sang adlaw sang iya pagkari, kag sin-o bala ang makatindog kon magpakita sia? Kay pareho sia sang kalayo sang manugtunaw, kag pareho sang habon sang manuglaba; kag magapungko sia bilang manugtunaw kag manugtinlo sang pilak, kag pagatinloan niya ang mga anak ni Levi, kag hugasan sila pareho sang bulawan kag pilak agud makahatag sila sa Ginuo sang halad sa pagkamatarong. Gani, maghatag kita sa Ginuo bilang isa ka simbahan kag isa ka katawhan, kag bilang mga Santos sa Ulihing mga Adlaw sang halad sa pagkamatarong; kag maghalad kita sa iya balaan nga templo kon matapos na ini, isa ka libro nga nagaunod sang mga rekord sang aton mga minatay nga mangin bagay sang bug-os nga pagbaton.

25 Mga kauturan, madamo ako sang ihambal sa inyo parte sa topiko; apang ginatapos ko na ang akon sulat sa sini nga tion, kag ipadayon ining topiko sa lain naman nga tion. Ako, sa gihapon, ang inyo mapainubuson nga alagad kag lubos nga masaligan nga abyan,