Ɔfã 134
Gyedzi ho dawurbɔ a, ɔfa aban nye mbra nyina ho, wɔtoow ho aba dze gyee too mu wɔ Asɔr ne nhyiamu ase wɔ Kirtland, Ohio, Dzifuu 17, 1835. Ahotseweefo no dodowara boaa ano dɛ wɔrobɔdwendwen Nkyerɛkyerɛ na Ahyɛmudzi nwoma no mu nsɛm a ɔwɔ dza wotsintsiim no ahyɛse no ho. Dɛm aber no wɔdze dɛm dawurbɔ yi yɛɛ nyienyim: “Ama wɔannkyerɛ gyedzi a yɛwɔ no wɔ asaase do aban nye mbra nyina mu, no ase wɔ kwan fofor bi do no, anaadɛ ama hɔn adwen mu annyɛ hɔn konsee wɔ ho no, yesusu ho dɛ yɛbɛkyerɛ hɛn adwen wɔ dɛm adze yi ho ansaana yɛdze hɛn asɛm yi a ɔwɔ nwoma yi mu aba ewiei.”
1–4, Aban wɔdɛ ɔkora obiara ne fahodzi wɔ dza nankasa ne tsibowa se no ho na ɔsom wɔ kwan a ɔpɛ do; 5–8, Nyimpa nyina wɔ dɛ wɔgye hɔn aban abamba na wɔkyerɛ obu na enyidzi ma mbra no; 9–10, Ɔnnsɛ dɛ nyamesomfo ekuwekuw no nya tum a wɔdze bobua amansɛm; 11–12, Nyimpa wɔ mbra kwan dɛ wɔsoɛr gyina bɔ hɔnho na hɔn egyapadze ho ban.
1 Yɛgye dzi dɛ Nyame na ɔhyehyɛɛ aban dze maa nyimpa ne yieyɛ, na dɛ nyimpa wɔ nkontaabu dze ma hɔn wɔ biribiara a wɔbɛyɛ, nye mbra so a wɔbɛhyɛ na kwan so a wɔbɛfa do dze edzi dwuma ho, dɛ mbrɛ ɔbɛyɛ a ɔmamfo benya asetsena pa na abanbɔ.
2 Yɛgye dzi dɛ aban biara nnkotum atsena ase asomdwee mu, gyedɛ ɔayɛ ne mbra na ɔahwɛ ma woedzi do ma wɔabɔ ankorankor biara no ho ban, wɔama no fahodzi ma oeetum edzi no dwuma a ne tsibowa no kã no pɛr, ɔaakora n’egyapadze do na ɔaabɔ no nkwa ho ban.
3 Yɛgye dzi dɛ ohia dɛ aban nyina hwehwɛ aban mu dzibewdzifo na asɛndzifo a wɔbɔhwɛ ma woedzi dɛm mbra no do; na dɛm nyimpa no so wɔ dɛ wɔyɛ nkorɔfo a wɔdze mbra no bedzi pɛrpɛr, na wɔnnkɛyɛ enyimhwɛ biara, na wobetsie ɔmamfo no hɔn ndze wɔ ɔman a wodzi hɔn amansin, anaa ahenman no hɔn pɛ.
4 Yɛgye dzi dɛ Nyankopɔn na ɔdze nyamesom bae; na dɛ adasa dan no, na no nkotoo na wɔdan no dze som, gyedɛ hɔn nyamesom mu nsusui no ma wotsia binom hɔn kyɛfa anaa hɔn ahotɔ; mbom, yɛnngye nndzi dɛ ɔwɔ dɛ nyimpa ne mbra tsia mu na ɔkyerɛ kwan a wɔmfa do nsom, dze kyekyer adasa hɔn adwen anaa dze kyerɛ ɔmamfo anaa ankorankor mbrɛ wonsi nsom; na aban asɛndzifo no hwɛ siw emumuyɛdze ano, mbom onnyi dɛ wɔhyɛ nkorɔfo adwen do; ɔwɔ dɛ wɔtwe ndzebɔnyɛfo aso, na mbom wɔnnhyɛ ɔkra ne fahodzi do.
5 Yɛgye dzi dɛ ɔwɔ dɛ nyimpa nyina ma aban biara a wɔhyɛ n’ase no tsipia na wɔgye no abamba, na aban no so ne mbra bɔ hɔn kyɛfa na dza odzi wɔ hɔn no ho ban, na na basabasayɛ etuatsew mmfata ɔmanmunyi a wɔbɔ no ho ban, na ɔsɛ dɛ wɔhwɛ twẽ hɔn aso, aban nyina wɔ ho kwan dɛ ɔyɛ dɛm mbra no wɔ hɔn atsɛmbu nsusuii mu a ɔbɛma ɔmamfo enya eyiedzi; na aber kor no ara so, wɔahwɛ esuo nyimpa biara ne fahodzi mu wɔ dza nankasa ne tsibowa ntsewee se no ho.
6 Yɛgye dzi dɛ ɔsɛ dɛ wodzi nyimpa biara ne gyinabew biara a ɔwɔ mu no nyi, ahwɛfo nye asɛndzifo na hɔn a wɔtsetse dɛm a wɔdze hɔn esi hɔ dɛ wɔmbɔ abɔbɔfo ho ban na wontsia ndzebɔnyɛfo no; na nyimpa nyina wɔ dɛ wobu na wodzi mbra nyi wɔ akwan horow nyina mu, na sɛ ammba no dɛm a, basabasayɛ na nhyɛ na ɔbɛhyɛ asomdwee na ahomka ananmu; wɔyɛɛ nyimpa ne mbra maa nyimpa ama wɔdze atoto hɛn ndzɛmba nyina yie ama ankorankor nye ɔman, wɔ onua na onua ntamu; na mbra krɔnkrɔn a ofi sor no, kyerɛkyerɛ mbra a ɔfa sunsum mu ndzɛmba ho, dze ma gyedzi na ɔsom, na ebien nyina no, nyimpa beyi ano akyerɛ ne Yɛfo.
7 Yɛgye dzi dɛ ahwɛfo, aman, na aban wɔ ho kwan, na ɔyɛ hɔn asɛdze so dɛ wɔyɛ mbra dze bɔ ɔmamfo nyina ho ban ama woeenya ho kwan dze hɔn nyamesom ho gyedzi a wɔwɔ no ayɛ edwuma; mbom yɛnngye nndzi dɛ wɔwɔ ho kwan wɔ mbra mu, nna ɔmmfa kwan mu so dɛ wobesiw ɔmamfo kwan wɔ dɛm ndzinoa yi ho, anaadɛ wobesiw hɔn kwan ma wɔadwen dza wɔpɛ ho, wɔ ber a wɔdze obu na enyidzi ma mbra no, na dɛm gyedzi a wɔwɔ no wɔ nyamesom mu no nnkyerɛ dɛ wɔrokõ tsia anaa wɔrema binom ayɛ basabasa dze etsia aban no.
8 Yɛgye dzi dɛ hɔn a wɔyɛ bɔn no wɔ dɛ wɔtwẽ aso dɛ mbrɛ bɔn a wɔyɛe no tse; dɛ ewudzi, etuatsew, adzewia nye basabasayɛ a ɔhaw binom hɔn asomdwee no, ɔsɛ dɛ wɔtwẽ aso dɛ mbrɛ bɔn no ne su tse na hɔn ntɔyɛɛ dɛ wɔbɛyɛ tse; na osian ɔman mu asomdwee na ahotɔ ntsi, ɔsɛ dɛ nyimpa nyina bɔ mbɔdzen dɛ mbrɛ wobotum dze hɔn a wɔyɛ bɔn tsia mbra pa no nyina ba ma wɔtwẽ hɔn aso.
9 Yɛnngye nndzi dɛ ɔtsen dɛ wɔdze nyamesom ho nhyɛdo bɔforafora amansɛm mu, dza ɔbɛma wɔakã nyamesom kuw kor efũa na woebu kor so no sunsum mu ndzinoa nyimtsia, na dɛm ntsi, kuwmba a wɔwɔ mu no hɔn ankorankor kyɛfa, dɛ wɔyɛ ɔmamfo no, bɛkam hɔn.
10 Yɛgye dzi dɛ kwan da hɔ dɛ nyamesom ekuwekuw no mu ba biara a ɔbɛkyerɛ su biara a ɔnnyɛ no wɔtsẽa no, dɛ mbrɛ dɛm kuw no ne mbra na nhyehyɛɛ tse; gyedɛ dza wɔyɛe no yɛ biribi a ɔfa hɔn fɛkuwbɔ ne ngyina pa ho; mbom yɛnngye nndzi dɛ nyamesom kuw biara wɔ tum dɛ wodzi asɛm wɔ nyimpa n’egyapadze anaa no nkwa ho, dɛ wɔbɛgye wiadze yi mu ahodze efi hɔn nsamu, anaadɛ wɔdze hɔn bɔto ɔfona mu, dɛ wobeyi hɔn nkwa anaa ne mfɛfɛkuwa efi hɔ anaadɛ wobepira hɔn wɔ kwan biara do. Dza wobotum ayɛ ara nye dɛ wobeyi dɛm nyimpa no edzi efi hɔn kuw no mu, na wɔatwẽ hɔnho efi hɔn fɛkuw no ho.
11 Yɛgye dzi dɛ ɔwɔ dɛ wɔma nyimpa kwan ma wɔdze bɔn bi a obi dze ayɛ hɔn, anaa hɔn ayawdzi bi a wɔakã ho asɛm ma annyɛ hɔn abodwee no kɔto aban asɛndzifo enyim ma wɔsan hwehwɛ mu bio ma hɔn, biribi tse dɛ obi a wɔayɛ no basabasa anaadɛ wɔagye n’egyapadze efi ne nsamu, anaa woegu ne dzin ho fĩ, wɔ ber a mbra wɔ hɔ a wɔdze bɔ iyinom ho ban; mbom yɛgye dzi dɛ nyimpa nyina wɔ ho kwan dɛ wotwitwa gye hɔnho, hɔn anyɛnkofo, hɔn egyapadze, nye hɔn aban, fi ɔhaw a ɔmmfa kwan mu nye nsisi ho wɔ ohia ber mu, na ɔnnkɛba no dɛ wonnkotum dze asɛm no akɔ mbra ase ma ahotɔ aba.
12 Yɛgye dzi dɛ ɔfata dɛ wɔkã asɛmpa no kyerɛ asaase do aman nyina, na wɔbɔ atseneneefo kɔkɔ ma wɔtwẽ hɔnho fi wiadze mu ndzeyɛprɔwee ho, mbom yɛnngye nndzi dɛ oye dɛ wɔbɔtõtõ hɔn a wɔwɔ nkowaasom ase na hɔn wuranom ntamu, anaadɛ wɔbɛkã asɛmpa no akyerɛ hɔn, anaadɛ wobonuma hɔn, a otsia hɔn wuranon hɔn pɛ anaadɛ wɔdze hɔnho bɛhyehyɛ hɔn do, anaadɛ wɔbɛyɛ biribi a ɔnnkɛma woenya abodwee wɔ hɔn asetsena mu, amma dɛm ndzeyɛɛ no aammfa ɔhaw ammba ɔmamfo hɔn abrabɔ mu; yɛgye dzi dɛ dɛm ntõtõ ananmu no mmfa mbra mu na ɔnntsen so. Aban biara a ɔma kwan ma nyimpa som nkowaasom mu no nnya etsidaa.