Seksyon 134
Pagpahayag sang ginapatihan parte sa mga gobyerno kag mga layi sa pangkabilogan, nga gin-ugyonan sang tanan paagi sa boto sa isa ka pangkabilogan nga pagtipon sang Simbahan nga ginhiwat sa Kirtland, Ohio sang ika-17 sang Agosto 1835. Madamo nga mga Santos ang nagtipon agud desisyonan ang ginrekomendar nga mga kaundan sang una nga edisyon sang Doktrina kag mga Kasugtanan. Sang sina nga tion, ini nga pahayag ginhatagan sing masunod nga introduksyon: “Agud nga indi mangin sayop ang pagpaathag ukon paghangop sang aton ginapatihan parte sa dutan-on nga mga gobyerno kag mga layi sa pangkabilogan, nahunahuna namon nga nagakaigo nga ipresentar, sa katapusan sining libro, ang amon opinyon parte sini.”
1–4, Ang mga gobyerno dapat mag-amlig sang kahilwayan sang konsiyensya kag pagsimba; 5–8, Tanan nga tawo dapat magsuporta sang ila mga gobyerno kag dapat maghatag sang pagtahod kag pagrespeto sa layi; 9–10, Mga relihiyon indi dapat maggamit sang gahum sa pagpatuman sang mga layi sa mga sibilyan; 11–12, Mga tawo napakamatarong sa pagpangapin sang ila mga kaugalingon kag ila pagkabutang.
1 Nagapati kami nga ginpahamtang sang Dios ang mga gobyerno para sa benepisyo sang tawo; kag ginakabig niya ang mga tawo nga may salabton sa ila mga buhat parte sa mga ini, sa paghimo sang mga layi kag pagpatuman sang mga ini para sa kaayohan kag pagpangamlig sang sosyedad.
2 Nagapati kami nga wala sang gobyerno nga makapadayon sa paghidaet luwas lang nga ang amo nga mga layi napahamtang kag ginatipigan nga indi malalis sa bagay nga magasiguro sa tagsa ka tawo sang hilway nga paggamit sang konsiyensya, sang kinamatarong kag pagdumala sang pagkabutang, kag sang pag-amlig sang kabuhi.
3 Nagapati kami nga ang tanan nga gobyerno nagakinahanglan gid sang awtorisado nga mga opisyales kag mga hukom agud magpatuman sang amo nga mga layi; kag sila nga magapatuman sang layi sa katarongan kag hustisya dapat pangitaon kag suportahan sang tingug sang mga tawo kon ang gobyerno isa ka republika, ukon sang pagbuot sang pinakamataas nga pamunoan.
4 Nagapati kami nga ang relihiyon ginpahamtang sang Dios; kag may salabton ang mga tawo sa iya, kag sa iya lamang sa paggamit sini luwas lang kon ang ila relihiyoso nga mga pagpati nagatulod sa ila nga tapakan ang mga kinamatarong kag mga kahilwayan sang iban; apang wala kami nagapati nga ang tawhanon nga layi may kinamatarong nga magpasilabot sa pagpatuman sang mga pagsulundan sang pagsimba agud piliton ang mga konsiyensya sang mga tawo ukon diktahan ang mga pamaagi sang pangpubliko ukon pribado nga pagpangamuyo; nagapati kami nga dapat tapnaon sang mga hukom ang krimen apang indi gid mandoan ang konsiyensya; dapat silotan ang makahimo sang krimen apang indi gid pagpunggan ang kahilwayan sang kalag.
5 Nagapati kami nga ang tanan nga tawo may obligasyon nga suportahon kag itib-ong ang gobyerno sang tagsa ka lugar nga ila ginapuy-an samtang naamligan sa ila duna kag di-mabawi nga mga kinamatarong sang mga layi sang amo nga mga gobyerno; kag ang sedisyon kag rebelyon wala nagakabagay sa tagsa ka pumuluyo nga naamligan sa amo nga paagi, kag dapat silotan sing nagakaigo; kag ang tanan nga gobyerno may kinamatarong sa paghimo sang mga layi nga suno sa ila kaugalingon nga mga pagpati makabig nga pinakamaayo sa pagsiguro sang kaayohan sang publiko; apang sa amo man magakabig nga sagrado ang kahilwayan sang konsiyensya.
6 Nagapati kami nga dapat tahaon ang tagsa ka tawo sa iya posisyon, pareho sina sang mga nagapamuno kag mga hukom, nga ginbutang agud amligan ang mga inosente kag silotan ang mga nakasala; kag sa mga layi ang tanan nga tawo dapat maghatag sang pagtahod kag pagrespeto bangod kon wala ang mga ini ang paghidaet kag kalinong pagabuslan sang kinagamo kag kahadlok; ang tawhanon nga mga layi nga ginapahamtang para sa maathag nga katuyoan nga dumalahan ang aton mga interes bilang mga indibidwal kag mga nasyon, sa tunga sang tawo kag tawo; kag ang diosnon nga mga layi nga ginhatag sang langit nga nagapatuman sang mga pagsulundan parte sa mga butang nga espirituhanon, para sa pagtuo kag pagsimba, pareho nga salabton sang tawo sa iya Tagtuga.
7 Nagapati kami nga may kinamatarong ang mga nagapamuno, mga estado, kag mga gobyerno, kag may obligasyon sa paghimo sang mga layi para sa pag-amlig sang tanan nga pumuluyo sa hilway nga pagpabutyag sang ila relihiyon; apang wala kami nagapati nga may kinamatarong sila suno sa hustisya nga kakasan ang mga pumuluyo sining pribilihiyo ukon dumilian sila sa ila mga pagpati, basta ang pagrespeto kag pagtahod ginapakita sa mga layi kag ang amo nga mga relihiyon wala nagapakamatarong sang sedisyon ukon pagkunsabo.
8 Nagapati kami nga ang paghimo sang krimen dapat silotan suno sa klase sang sala; nga ang pagpatay, pagluib sa pungsod, pagpangawat, pagpangawti, kag pagtublag sang pangkabilogan nga paghidaet, sa tanan nga paagi, dapat silotan suno sa kinaiya sang ila krimen kag sa ila huyog sa pagpahanabo sang kalainan sa mga tawo, suno sa mga layi sinang gobyerno sa diin nahimo ang sala; kag para sa paghidaet kag kalinong sang publiko ang tanan nga tawo dapat mag-akto kag maggamit sang ila ikasarang nga dal-on ang mga nakasala batok sa maayo nga mga layi sa pagbaton sang silot.
9 Wala kami nagapati nga matarong nga upuron ang impluwensya sang relihiyon sa gobyerno-sibil sa diin ang isa ka relihiyon ginasakdag kag ang isa naman ginadumilian sa iya sini espirituhanon nga mga pribilihiyo, kag ang indibidwal nga mga kinamatarong sang iya sini mga miyembro bilang mga pumuluyo wala ginakilala.
10 Nagapati kami nga ang tanan nga relihiyon may kinamatarong sa pag-akto tuhoy sa ila mga miyembro bangod sa di-husto nga paggawi suno sa mga pagsulundan kag mga regulasyon sang amo nga mga katilingban; basta ang amo nga mga pag-akto parte lang sa pagkamiyembro kag maayo nga reputasyon; apang wala kami nagapati nga ang bisan ano nga relihiyon may awtoridad nga hukman ang mga tawo parte sa kinamatarong sa pagkabutang ukon kabuhi, sa pagkuha sa ila sang dutan-on nga mga pagkabutang, ukon sa pagbutang sa peligro sang ila kabuhi ukon kalawasan, ukon sa paghatag sing bisan ano nga pisikal nga pagsilot sa ila. Mahimo lang nila nga i-ekskomunikar sila halin sa ila katilingban, kag bawion sa ila ang ila pagkamiyembro.
11 Nagapati kami nga ang tanan nga tawo dapat magdangop sa sibil nga layi para sa paghusay sang tanan nga kahalitan kag mga reklamo kon sa diin may ginahimo nga personal nga pag-abuso ukon paglapak sang kinamatarong sa pagkabutang ukon pagkatawo, kon ang amo nga mga layi nga magaamlig sang mga ini napahamtang; apang nagapati kami nga ang tanan nga tawo ginapakamatarong sa pagpangapin sang ila mga kaugalingon, ila mga abyan, kag mga pagkabutang , kag sang gobyerno batok sa di-makatarongan nga mga pagsalakay kag mga pagtapak sang mga kinamatarong sang tanan nga tawo sa mga tinion sang emerhensya, sa diin ang gilayon nga pagdangop sa mga layi indi matigayon, kag ang kaumpawan indi mahatag.
12 Nagapati kami nga matarong nga iwali ang ebanghelyo sa mga nasyon sang duta, kag paandaman ang mga matarong nga luwason ang ila mga kaugalingon halin sa korapsyon sang kalibutan; apang wala kami nagapati nga husto nga pasilabtan ang mga ulipon, ukon iwali ang ebanghelyo sa ila, ukon bunyagan sila nga batok sa kabubut-on kag kaluyag sang ila mga amo, ukon entrahan ukon impluwensyahan sila sa pinakagamay nga paagi agud palas-ayon sila sa ila mga sitwasyon sa sining kabuhi, kag gani ibutang sa peligro ang mga kabuhi sang mga tawo; ang amo nga pagpasilabot nagapati kami nga batok sa layi kag di-matarong, kag peligroso sa paghidaet sang tagsa ka gobyerno nga nagapasugot nga himuon nga ulipon ang mga tawo.