1 Dza yɛdze sɔw dɛm nwoma yi na Mormon Nwoma no ano nye nsɛm a ɔfa Joseph Smith, Nkɔnhyɛnyi no, nye Hyrum Smith Patriarch no, hɔn kum a wokuum hɔn wɔ hɔn gyedzi no ntsi ho asɛm. Wɔtoow hɔn etur wɔ Carthage efiadze, wɔ Obiradzi 27, 1844 bɛyɛ ewimbir ndɔnnum. Dɔm bi a wɔdzedze akodze—wɔakekã hɔn enyim tuntum—hɔn dodow fi 150 kɛpem 200 na wodzii dɛm dwuma no. Hyrum na wodzii kan toow no na ɔrohwe ase bɔkɔɔ no ɔtsẽaa mu dɛ: Mayɛ owufo! Joseph huruwii duaa tokura mu, na ber a ɔreyɛ dɛm no, wɔtoow no kum no, ɔtsẽaa mu dɛ: O Ewuradze me Nyankopɔn! Ber a hɔn beenu nyina wui ekyir no mpo, wɔtotoow hɔn etur bio pirapiraa hɔn yayaayaw, hɔn beenu nyina nyaa akorabo anan.

2 John Taylor nye Willard Richards a wɔyɛ Duebien no mu beenu nye nkorɔfo a nna wɔwɔ dan mu hɔ dɛm aber no nka; John Taylor no wɔtoow no akorabo anan pirapiraa no yayaayaw, mbom ekyir no ɔtsee apɔw; na ɔnam Nyankopɔn n’adom ntsi, nyia odzi ekyir no oguanee a akorabo mpo enntue n’atar mu.

3 Joseph Smith, Ewuradze no Nkɔnhyɛnyi na Adzehunyi no, sɛ iyi Jesus nko si nkyɛn a, ɔayɛ adze pii ama adasa a wɔwɔ wiadze yi mu dze ama hɔn nkwagye sen nyimpa biara a ɔatsena ase pɛn wɔ mu. Mfe eduonu pɛr ntamu no, ɔdze Mormon Nwoma aba a ɔnam Nyankopɔn n’akyɛdze na no tum do kyerɛɛ ase, na ɔnam nankasa no do so na wɔdze epue guado wɔ asaasetɔw ebien mu; ɔdze daapem asɛmpa ne mãhyɛ no, a ɔwɔ mu no, akɔ asaase ne mfɛndzanan nyina; na ɔdze nyikyerɛ na mbrasɛm a ɔyɛ dɛm Nkyerɛkyerɛ na Ahyɛmudzi nwoma yi, nye enyansasɛm na nkyerɛkyerɛ binom so a ohia ma adasamba hɔn yieyɛ epue guado; ɔaboaboa Nda a Odzi Ekyir Ahotseweefo mpempem ano, ɔakyekyer kuropɔn kɛse, ɔbɛyɛɛ atsenkã na oegya dzin a wonnkotum apepa da. Ɔtsenaa ase dɛ okunyin, na owuu dɛ okunyin wɔ Nyankopɔn nye no nkorɔfo enyim; na ɔtse dɛ Ewuradze no nkorɔfo a wɔseraa hɔn ngo wɔ tsetseberdo no, ɔdze nankasa no bɔgyaa asɔw no ndwuma ano; na no nuabanyin Hyrum so yɛɛ dɛmara. Ber a wɔtse nkwa mu no, hɔn mu ammpaapaa na owu mu so hɔn mu anntsetsew!

4 Ber a Joseph kɔr Carthage dɛ orikeyi noho ama dɛm enyidaho bɔn mbra nhyehyɛɛ no, bɛyɛ nda ebien anaa ndaansa ma woekum no no, asɛm a ɔkãe nye dɛ: “Metse dɛ eguambaa a wɔdze no rokɔ ekumii; mbom mayɛ komm dɛ ɔhyewber n’anapa; bɔn biara nnyi me tsibowa mu a otsia Nyankopɔn na nyimpa nyina. Mubowu a afɔdzi nnyi mo ho, na wɔbɛkã wɔ mo ho dɛ—wokum no okummon.”—Dɛm anapa no ara ber a Hyrum yɛɛ krado dɛ ɔrobɔkɔ no—yɛbɛkã dɛ ɔrokɔ ekumii no? nyew dɛm na ɔtse—ɔkenkaan dɛm nsɛm yi a ɔwɔ Ether tsir duebien dze rokɔ n’ewiei no wɔ Mormon Nwoma mu na ɔdaan krataa no too do.

5 Na ɔbaa dɛ mobɔɔ mpaa maa Ewuradze dɛ ɔmma Amanamamfo adom, ama wɔaayɛ ayamuyie. Na ɔbaa dɛ Ewuradze see me dɛ: Sɛ wɔannyɛ ayamuyie a ɔmmfa woho, ɔwo edzi nokwar; dɛm ntsi, wo ntar bɛyɛ wansawansa. Na osiandɛ ehu wo mberɛwyɛ ntsi, wɔbɛma woho ayɛ dzen, araa mpo ma edze akɛtsena bea a mesiesie wɔ m’Egya fie no. Na afei emi … , menye Amanamamfo no ridzi nkra, nyew, nye mo nuanom so a modɔ hɔn no, kɛpem aber a yebehyia mu wɔ Christ n’atsɛmbu-egua no enyim, hɔ na adasa nyina bohu dɛ hom bɔgyaa nnkekãa me ntar mu. Adasegyefo no ewuwu, naaso hɔn dasee no da ho reyɛ edwuma.

6 Kwakwar 1844 na Hyrum Smith dzii mfe eduanan anan, na Joseph Smith so dzii mfe eduasa awɔtwe wɔ Mumu, 1843; na ofi ndɛ dze kɔ no, wɔdze hɔn edzin bɛkã nkorɔfo a wɔyɛɛ mogyadasefo wɔ nyamesom ho no edzin ho; na ɔman biara mu obiara a ɔbɛkenkan Mormon Nwoma no, nye asɔr no ne Nkyerɛkyerɛ na Ahyɛmudzi nwoma yi bɛkaa dɛ nwoma yinom no bo no yɛ bɔgya a ɔsom bo mapa a ɔwɔ mfe aha dza ɔtɔdo duakron no mu no ama eepuei abɛgye wiadze a ɔasɛɛ no ne nkwagye; na sɛ gya no tum pra duamon ho dze ma Nyankopɔn n’enyimnyam a, nna ɔnnkɛyɛ dzen koraa dɛ ɔbɛhyew nduawui dze atsew wenyin ture no ho efi ndzɛmba bɔn ho. Wɔtsenaa ase maa enyimnyam; na wowui maa enyimnyam; na enyimnyam so nye hɔn onnyiewiei akatua. Ofi ber to ber hɔn edzin bɛkã hɔn asefo do dɛ bota mapa a wɔatsew ho.

7 Nna wonndzi fɔ wɔ bɔn biara ho, dɛ mbrɛ aber biara wɔdze hɔn kɔ asɛndzi a wobu hɔn bem no, na atamfo nye emumuyɛfo na wɔyɛɛ kor pamee dze hɔn koguu efiadze; na wɔdze hɔn bɔgyaa a afɔdzi nnyi ho a oguu Carthage efiadze famu ayɛ nsɔwano kɛse asɔw Mormonsom ano a asɛndzibea biara a ɔwɔ asaase do nnkotum apow, na hɔn bɔgyaa a afɔdzi nnyi ho no ayeyɛ Illinois Ɔman ahyɛnsew no ho ɔnye awerɛhyɛmu wɔ Ambrado no n’anohoba a ogyina Ɔman no anan mu bɔe a woenndzi do no do, ayɛ dasegye ama asɛmpa a ɔwɔ hɔ daapem no nokwar a ɔkyerɛ dɛ wiadze mu mba nnkã nokwar, na hɔn bɔgyaa a afɔdzi nnyi ho no wɔ ahotɔ frankaa nye America aman hɔn magna charta (fahodzi buukuu) mu, na ɔyɛ ananmusinyi so dze ma Jesus Christ no som no, na ɔbɛkã hɔn a wɔyɛ anokwafo wɔ aman nyina mu no hɔn akoma; na hɔn bɔgyaa a afɔdzi nnyi ho nye mogyadasefo so hɔn bɔgyaa a afɔdzi nnyi ho no wɔ dɛm afɔrmbukyia a John hunii no ase, na obosũ afrɛ Dɔm Ewuradze kesi dɛ obedzi wer ama dɛm bɔgya no wɔ asaase do. Amen.