1 Agud selyohan ang testimonya parte sining libro kag sang Libro ni Mormon, ginapahibalo namon ang pagkapatay bilang mga martir nanday Joseph Smith nga Propeta, kag Hyrum Smith nga Patriarka. Gintiro sila sa bilanggoan sang Carthage sang ika-27 sang Hunyo 1844, mga alas singko sang hapon, sang armado nga guban—pintado sang itom—sang halin 150 tubtob 200 ka tawo. Una nga gintiro si Hyrum kag matawhay sia nga natumba nga nagasiling: Mapatay na ako! Naglumpat si Joseph sa bintana, kag samtang nagahana sia sa paglumpat gintiro sia nga nagasiling: O Ginuo akon Dios! Gintiro sila nga duha bisan pa nga patay na sila, sa mapintas nga paagi, kag sila nga duha naigo sing apat ka bala.

2 Sanday John Taylor kag Willard Richards, duha sang Dose, amo lamang ang mga tawo sa kwarto sang sina nga tion; ang nauna nasamaran sa mapintas nga paagi sing apat ka bala apang nag-ayo na; ang naulihi, paagi sa bulig sang Dios, nakapalagyo nga wala sing bisan isa ka buho sa iya panapton.

3 Si Joseph Smith, ang Propeta kag Manugpanan-aw sang Ginuo, nakahimo sing mas labi pa, luwas lamang kay Jesus, para sa kaluwasan sang mga tawo sa sining kalibutan sangsa iban nga tawo nga nagkabuhi diri. Sa malip-ot nga lang-at sang beynte ka tuig, ginpaluntad niya ang Libro ni Mormon nga iya ginlubad paagi sa dulot kag gahum sang Dios, kag nangin paagi sa pagbantala sini sa duha ka kontinente; ginpadala ang kabug-osan sang wala’y katubtuban nga ebanghelyo, nga kaundan sini, sa apat ka pamusod sang duta; ginpahayag ang mga rebelasyon kag mga kasugoan nga nalakip sa sining libro sang Doktrina kag mga Kasugtanan, kag madamo nga iban pa nga mga dokumento kag mga instruksyon nga may kaalam para sa kaayohan sang mga anak sang katawhan; gintipon ang madamo nga linibo ka mga Santos sa Ulihing mga adlaw, ginpahamtang ang isa ka dako nga siyudad, kag nagbilin sia sang dungog kag ngalan nga indi sarang gub-on. Nagkabuhi sia sing dungganon, kag napatay sia nga dako sa mga mata sang Dios kag iya katawhan; kag pareho sang kalabanan sang mga pinili sang Ginuo sang una nga panahon, ginselyohan ang iya misyon kag iya mga binuhatan sang iya kaugalingon nga dugo; kag amo man ang iya utod nga si Hyrum. Sa kabuhi nag-isa, kag sa kamatayon wala sila nahamulag!

4 Sang naglakat si Joseph sa Carthage agud itugyan ang iya kaugalingon sa kuno abi mga ginapatuman sang layi, duha ukon tatlo ka adlaw antes sia ginpatay, nagsiling sia: “Nagapakadto ako pareho sang kordero sa ihawan; apang kalmado ako pareho sang kaagahon sa tig-ilinit; ang akon konsiyensya wala sang kalapasan sa Dios, kag sa mga tawo. Mapatay ako nga inosente—kag ini ang ihambal pa parte sa akon—wala kaluoy sia nga ginpatay.”—Sa amo man nga aga, pagkatapos nga handa na si Hyrum sa paglakat—masiling bala nga sa ihawan? Huo, kay amo gid—ginbasa niya ang masunod nga parapo malapit sa katapusan sang ika-dose nga kapitulo sang Eter sa Libro ni Mormon, kag ginpilo ang ibabaw sang pahina sini:

5 Kag natabo ini nga nagpangamuyo ako sa Ginuo nga hatagan niya sing grasya ang mga Gentil, agud makaangkon sila sing putli nga paghigugma. Kag natabo ini nga ang Ginuo nagsiling sa akon: Kon wala sila sing putli nga paghigugma indi ini importante sa imo, nangin matutum ka; gani, ang imo mga biste pagahimuon nga matinlo. Kag tungod nakita mo ang imo kahuyang, pabakuron ka, bisan tubtob sa pagpungko sa lugar nga akon ginhanda sa mga mansyon sang akon Amay. Kag karon ako … nagapaalam sa mga Gentil; huo, kag amo man sa akon mga kauturan nga akon ginapalangga, tubtob nga magakitaay kita sa atubang sang hukom-lingkuranan ni Cristo, nga sa diin ang tanan nga tawo makahibalo nga ang akon mga biste wala namantsahan sang inyo dugo. Patay na ang mga saksi, kag napatuman na ang ila testamento.

6 Si Hyrum Smith kwarenta’y-kwatro anyos sang Pebrero, 1844, kag si Joseph Smith treinta’y-otso sang Disyembre, 1843; kag sugod subong ilista ang ila mga ngalan sa tunga sang mga martir sang relihiyon; kag pahanumdumon ang tagsa ka bumalasa sa tagsa ka nasyon nga ang Libro ni Mormon, kag ining libro nga Doktrina kag mga Kasugtanan sang simbahan, nagbuwis sang pinakamaayo nga dugo sang ika-disenuebe nga siglo agud ipaluntad ang mga ini para sa kaluwasan sang nalaglag nga kalibutan; kag kon mahalitan sang kalayo ang isa ka berde nga kahoy para sa himaya sang Dios, daw ano kahapos nga sunogon sini ang laya nga mga kahoy agud tinloan ang ulubasan sang korapsyon. Nagkabuhi sila para sa himaya; napatay sila para sa himaya; kag himaya ang ila wala’y katapusan nga padya. Pagapasidunggan sang mga kaliwat ang ila mga ngalan sa tanan nga panahon nga daw pareho sa malahalon nga mga bato para sa mga natinloan.

7 Inosente sila sa bisan ano nga krimen pareho sang ila pirme napamatud-an sadto, kag nabilanggo lang bangod sang pagkunsabo sang mga traidor kag malain nga mga tawo; kag ang ila inosente nga dugo sa salog sang bilanggoan sang Carthage isa ka hayag nga selyo nga natimbre sa “Mormonism” nga indi sarang ipanghiwala sing bisan ano nga korte sa duta, kag ang ila inosente nga dugo sa simbolo sang Estado sang Illinois, upod ang ginbali nga pasalig sang Estado nga gintug-an sang gobernador, isa ka saksi sa kamatuoran sang wala’y katubtuban nga ebanghelyo nga indi mabale-wala sang bilog nga kalibutan; kag ang ila inosente nga dugo sa bandera sang kahilwayan, kag sa magna charta sang Estados Unidos, isa ka embahador para sa relihiyon ni Jesucristo nga magatandog sang mga tagipusuon sang tampad nga mga tawo sa tanan nga nasyon; kag ang ila inosente nga dugo, upod ang inosente nga dugo sang tanan nga martir sa idalom sang altar nga nakita ni Juan, magasinggit sa Ginuo sang mga Kasoldadohan tubtob nga itimalus niya inang dugo sa duta. Amen.