1 N̄an sili naan in kam̧ool eo kōn bok in im Bok in Mormon eo, kōmij kōjjeļā kōn mej eo an Josep Smith Rikanaan eo, im Hyrum Smith Petriak eo, kōn tōmak eo aerro. Kar buuki er ilo kalbuuj eo ilo Carthage, ilo 27 raan in Juun, 1844, iturinļo̧k ļalem awa ālikin raelep, jān juon jarin em̧m̧aan rej ebbōk kein tariņae—kar unoik er kōn kilmeej—in jān 150 n̄an 200 armej. Hyrum eaar lel m̧okta im okjak ilo ejjeļo̧k jum̧ae, im eaar ba: N̄a juon armej emej! Josep eaar kālo̧k jān wūntō eo, im ekar lel im mej ke eaar kajjion̄, im lam̧ōj: O Irooj Aō Anij! Erro kar jim̧or bar lel ālikin aer kar mej, ilo juon jekjek ekajjōjō, im erro jim̧or rekar bōk emān joot.

2 Jon Taylor im Willard Richards, ruo ian Ro Jon̄oulruo, rekar armej ro de ro ilo ruum̧ eo ilo iien eo; im in m̧okta eaar ikkinejnej ilo jekjek eo ekanooj nana kōn emān joot, ak jān iien eo eaar bar ājmour; eo tokālik, kōn kōjparok an Anij, eaar ko, kōn em̧ool ejjeļo̧k juon potak ilo liboror eo an.

3 Josep Smith, Rikanaan eo im Rilolo eo an Irooj, ekkar kōm̧m̧an eļapļo̧k, ijello̧kun wōt Jisōs, n̄an lo̧mo̧o̧r eo an armej raņ ilo laļ in, jān bar jabdewōt armej ekar mour ioon. Ilo juon tōrean ekadu in ron̄oul iiō ko, eaar bōk m̧aantak Bok in Mormon eo, eo e eaar ukōte jān mennin letok im kajoor an Anij, im e eaar unin kar likūti ilo bok ioon ruo kontinent ko; eaar jilkinļo̧k tarlep in gospel eo ejjeļo̧k jem̧ļo̧kin, eo ewōr ie, n̄an m̧ōttan ko emān in laļ in; eaar bōk m̧aantak revelesōn ko im kien ko me rej booje bok in Katak im Bujen Ko, im elōn̄ bar peba ko remālōtlōt im naan in tōl ko n̄an em̧m̧anļo̧k eo an ro nejin armej raņ; eaar aini elōn̄ to̧ujin in Ro Rekwōjarjar ilo Raan Ko Āliktata, kar kajutak juon jikin kwelo̧k em̧m̧an, im eaar door bun̄bun̄ im āt eo me ban maron̄ m̧ane. Eaar mour eļap, im eaar mej eļap ilo mejān Anij im armej ro an; im āinwōt elōn̄ wōt ian ro ekkapit in Irooj ilo iien ko etto, eaar sili mijen im jerbal ko an kōn bōtōktōkin make; im āindein bar ļeo jein Hyrum. Ilo mour rekar jab ajej, im ilo mej rekar jab jepel!

4 Ke Josep eaar etal n̄an Carthage n̄an ajeļo̧k e make n̄an riab in aikuj ko an kakien, ruo ak jilu raan m̧okta jān kar bōki, eaar ba: “Ij etal āinwōt juon lamb n̄an m̧anm̧an; ak Ij ineem̧m̧an āinwōt juon jibbon̄ in rak; ewōr Ippa juon koļmānļo̧kijeņ eo ejjeļo̧k ruō ņae Anij, im ņae aolep armej. i naaj mej ilo ejjeļo̧k ruo, im naaj ba kake eo tokalik—rekar baj karok wot in m̧ane e.”—Ejja jibbon̄ōn eo wōt, ālikin an Hyrum kar pojak in etal—naaj ke ba n̄an m̧anm̧an eo? aaet, bwe ekar āindein—eaar kōnono jān ennaan kein, iturinļo̧k jem̧ļo̧kin jebta eo kein kajon̄oulruo in Ether, ilo Bok in Mormon, im eaar elkwōj tulōn̄in alen eo n̄an kakōļļeiki:

5 Im ālikin men kein iaar jar n̄an Irooj bwe E en leļo̧k n̄an ro riAelōn̄ ko jouj, bwe en maron̄ wōr aer iakwe-em̧ool. Im ālikin men kein Irooj eba n̄an eō: Eļan̄n̄e ejjeļo̧k ippāer iakwe-em̧ool ej jab men in inepata n̄an eok, kwaar tiljek; kōn menin, ballim renaaj erreo. Im kōnke kwaar lo am̧ m̧ōjņo̧ naaj kōm̧m̧an bwe kwōn kajoor, em̧ool n̄an jijet ilo jikin eo Iaar kōpooje ilo jikin ko rem̧m̧an an Jema. Im kiiō n̄a … ij bar iakiakwe ro riAelōn̄ ko, aaet, im barāinwōt n̄an ro jeiū im jatū ro im ij iakwe er, m̧ae ad naaj iioon doon im̧aan jikin ekajet an Kraist, ijo aolep armej renaaj jeļā bwe nuknuk ko ballū rejjab libbijinjin kōn bōtōktōkimi. Rikam̧ool rein remej kiiō, im naan in kam̧ool ko aer rej jejjet kūtier.

6 Hyrum Smith eaar en̄oulemān iiō dettan ilo Pāpode, 1844, im Josep Smith eaar jiln̄uulruwalitōk an iiō ilo Tijem̧ba, 1843; im jān iien in m̧aanļo̧k etaer naaj likūti ilubwiljin ro rekar mej kōn tōmak; im rikōnono ro ilo laļ otemjej naaj kakememej er ke Bok in Mormon, im bok in Katak im Bujen Ko an kabun̄ in, wōņāer kar bōtōktōk eo em̧m̧antata ilo epepen in kein kajon̄oulruwatimjuon n̄an bōki m̧aantak n̄an lo̧mo̧o̧ren eo an laļ eo ejeepepļo̧k; im bwe eļan̄n̄e kijeek emaron̄ ko̧kkure juon wōjke emaroro kōn aiboojoj eo an Anij, ewi jon̄an an naaj pidodo an tile wōjke ko rem̧ōrā n̄an karreoik jikin kallib in ankeke. Rekar mour n̄an aiboojoj; im rekar mej n̄an aiboojoj; im aiboojoj ej wōņāān eo aer indeeo. Jān epepen n̄an epepen etaer renaaj wanlaļļo̧k n̄an ro tokālik āinwōt dekā ko reaorōk n̄an ro kar kokwōjarjare er.

7 Kar ejjeļo̧k ruweer ilo jabdewōt nana, āinwōt ekar ekkā kam̧oole m̧oktaļo̧k, im rekar pād ilo kalbuuj jān wōt pepe nana an rikinaakak ro im armej ro renana; im bōtōktōk eo bōtōktōkier ejjeļo̧k ruōn ioon laļ ilo kalbuuj eo ilo Carthage ej juon sil edepakpak ej eddāpļo̧k n̄an “tōmak ko an Mormon” im ejjeļo̧k juon jikin ekajet ioon laļ emaron̄ joļo̧k e, im bōtōktōk eo bōtōktōkier ejjeļo̧k ruōn ioon kakōļļe eo kakōļļeen Bukwōn in Illinois, ippān tōmak eo ebwilo̧k an Bukwōn in āinwōt kar kallim̧ur jān kabna eo, ej juon kam̧ool n̄an m̧ool eo an gospel eo ejjeļo̧k jem̧ļo̧kin ke aolepān laļ ejjab maron̄ kariabe; im bōtōktōk eo bōtōktōkier ejjeļo̧k ruōn ioon juon flag in anemkwōj, im ioon magna charta eo an United States eo, ej juon ribōkļo̧k naan kōn kabun̄ eo an Jisōs Kraist, eo enaaj un̄ūr būruōn armej ro rem̧ool ilubwiljin aolep laļ ko; im bōtōktōk eo bōtōktōkier ejjeļo̧k ruōn, ippān bōtōktōk ko bōtōktōkin aolep ro rekar mej kōn tōmak ko aer ium̧win lokatok eo Jon eaar loe, naaj kūr n̄an Irooj in Inelep eo m̧ae iien E ej idenoņeik bōtōktōk eo ioon laļ. Amen.