1 Ti Balikas ken Pagayatan ti Apo maipanggep iti Kampo ti Israel iti panagdaliasatda iti Laud:

2 Mabukel koma a kompania dagiti amin a tao ti Ti Simbaan ni Jesucristo dagiti Santo iti Ud-udina nga Aldaw, ken dagiti makipagdaliasat kadakuada, iti katulagan ken kari a mangtungpal kadagiti amin a bilin ken dagiti alagaden ti Apo a Diostayo.

3 Mabukel koma dagiti kompania nga addaan iti kapitan dagiti ginasut, kapitan dagiti limapulo, ken kapitan dagiti pinullo, nga idauluan ti presidente ken dagiti dua a mamagbagana, babaen ti panangiturong dagiti Sangapulo-ket-dua nga Apostol.

4 Ket daytoyto ti katulagantayo—a magnatayo kadagiti amin nga ordinansa ti Apo.

5 Maaddaan koma dagiti kompania iti ragup, karison, abasto, lupot, ken dadduma pay a kasapulan, iti panagdaliasat, a kabaelanda.

6 No nabukelen dagiti kompania mapanda koma iti amin a kabaelanda, a mangisagana iti agpaay kadagiti agbati.

7 Ikeddeng koma ti tunggal kompania, kadagiti kapitan ken presidenteda, no mano ti makapan iti sumuno a panagtutubo; sa mangpilida iti umdas a bilang dagiti nabisked ken nasanay a lallaki, a mangala kadagiti ragup, bukbukel, ken dagiti alikamen iti panagtalon, a mapan a mangyuna a mangisagana kadagiti imula iti panawen ti panagtutubo.

8 Agpapada koma ti bingay ti tunggal kompania, a maibatay iti mabingay iti sanikuada, iti pannakaala dagiti nakurapay, dagiti balo, dagiti ulila iti ama, ken dagiti kaamaan dagiti napan iti buyot, tapno saan a dumanon iti lapayag ti Apo dagiti araraw ti balo ken ti ulila iti ama a maibusor kadagitoy a tao.

9 Mangisagana koma ti tunggal kompania iti balbalay, ken taltalon a pagmulaan iti bukel, a para kadagiti mabati iti daytoy a panawen; ket daytoy ti pagayatan ti Apo a maipapan kadagiti taona.

10 Aramaten koma ti tunggal tao ti amin a bileg ken sanikuana a mangikkat kadagitoy a tao a maipan iti lugar a pangipananto ti Apo iti istaka ti Zion.

11 Ket no aramidenyo daytoy nga addaan iti natarnaw a panagpuspuso, a sipupudno, mabendisionankayonto; mabendisionankayonto kadagiti arbanyo, ken kadagiti pastoryo, ken kadagiti talonyo, ken iti balbalayyo, ken kadagiti kaamaanyo.

12 Mangbukel koma da katulongak nga Ezra T. Benson ken Erastus Snow iti kompania.

13 Ken mangbukel koma da katulongak nga Orson Pratt ken Wilford Woodruff iti kompania.

14 Kasta met, a mangbukel koma da katulongak nga Amasa Lyman ken George A. Smith iti kompania.

15 Ket mangtuding kadagiti presidente, ken kapitan dagiti ginasut, ken saglilimapulo, ken sagsangapulo.

16 Ket mapan koma dagiti katulongak a natudingan ket isuro daytoy, ti pagayatak, kadagiti santo, tapno makasaganada a mapan iti daga ti kappia.

17 Mapankayo iti papananyo ken aramidenyo ti kas iti imbagak kadakayo, ket saankayo nga agbuteng kadagiti kabusoryo; ta awanandanto iti bileg a mamagsardeng iti aramidko.

18 Masubbotto ti Zion iti naituding a panawenko.

19 Ket no adda tao nga agpanggepto a mangbangon iti bagbagina, ken saan nga agpannuray iti pammagbagak, awananto iti bileg, ket maipakitanto ti kinamaagna.

20 Agsapulkayo; ket tungpalenyo amin a kariyo iti tunggal maysa; ket saanyo nga aguman ti kukua ti kabsatyo.

21 Yadayoyo ti bagbagiyo iti dakes a mangbarengbareng iti nagan ti Apo, ta siak ti Apo a Diosyo, nga isu ti Dios dagiti ammayo, ti Dios da Abraham ken Isaac ken Jacob.

22 Siak ti nangidaulo kadagiti annak ti Israel a rimmuar iti daga ti Egipto; ket maitanggaya dagiti imak kadagiti maudi nga aldaw, a mangisalakan kadagiti taok nga Israel.

23 Isardengyo ti agsisinnupanget iti tunggal maysa; isardengyo ti agsisinnao iti dakes iti tunggal maysa.

24 Isardengyo ti panagbarbartekyo; ket agbalin koma dagiti balikasyo a mangitandudo iti tunggal maysa.

25 No bumulodka iti padam a tao, isublimto dayta binulodmo; ket no saanmo a mabayadan mapanka a dagus ket ibagam iti padam a tao, no saan dusaennaka.

26 No masapulam ti napukaw ti padam a tao, sapulem koma a sireregta agingga a maisublim a yawat manen kenkuana.

27 Agregtaka koma a taginayonen ti adda kenka, tapno agbalinka a masirib nga agaywan; ta dayta ti awan bayadna a sagut ti Apo a Diosmo, ket sika ti agaywanna.

28 No agragsakka, agdaydayawka iti Apo babaen ti panagkanta, musika, panagsala, ken iti kararag ti panagdaydayaw ken panagyaman.

29 No malmaldayka, umararawka iti Apo a Diosmo, tapno rumag-o ti kaunggam.

30 Saankayo nga agbuteng kadagiti kabusoryo, ta addada kadagiti imak ket aramidek ti pakaragsakak kadakuada.

31 Nasken a masubok dagiti taok kadagiti amin a banag, tapno maisaganada nga umawat iti gloria nga insaganak a para kadakuada, nga isu ti gloria ti Zion; ket isu a di makaibtur iti pannusa saan a maikari iti pagariak.

32 Adalen koma ti kuneng ti pagsiriban babaen ti panagpakumbabana ken panangawagna iti Apo a Diosna, tapno malukatan dagiti matana tapno makakita, ken malukatan dagiti lapayagna tapno makangngeg;

33 Ta naibaon ti Espirituk iti lubong a mangliwliwa kadagiti napakumbaba ken napnuan babawi, ken ti pannakadusa dagiti saan a nadiosan.

34 Dakayo ken ti pammaneknekyo saan nga inawat dagiti kabsatyo, uray pay ti pagilian a nangpapanaw kadakayo;

35 Ket ita umayen ti aldaw a pannakadidigrada, nga isu dagiti aldaw a panagleddaang, a kasla iti babai a naparparigat; ket nalausto ti leddaangda malaksid no dardarasenda ti agbabawi, wen, dardarasenda.

36 Ta pinapatayda dagiti propeta, ken isuda a naibaon kadakuada; ket pinagsayasayda ti awanan basol a dara, nga imkis iti daga a maibusor kadakuada.

37 Ngarud, diyo pagsiddaawan dagitoy a banag, ta saankayo pay a natarnaw; diyo pay kabaelan ti gloriak; ngem makitayonto no napudnokayo nga agtungpal kadagiti amin a balikasko nga intedko kadakayo, manipud kadagiti aldaw ni Adan agingga ken ni Abraham, manipud ken ni Abraham agingga ken ni Moises, manipud ken ni Moises agingga ken ni Jesus ken dagiti apostolna, ken manipud ken ni Jesus ken dagiti apostolna agingga ken ni Joseph Smith, nga inawagak babaen kadagiti anghelko, dagiti agpapaay a katulongak, ken babaen ti bukodko a timek manipud iti langit, a mangipatungpal iti aramidko;

38 Impasdekna ti pamuon, ken napudno isuna; ket siak a mismo ti nangala kenkuana.

39 Adu ti nasdaaw iti ipapatayna; ngem kasapulan unay a pasingkedanna ti pammaneknekna babaen iti darana, tapno maidaydayaw isuna ken makedngan dagiti nadangkes.

40 Dikayo kadi insalakan kadagiti kabusoryo, ket iti dayta laeng nakaibatiakon iti saksi iti naganko?

41 Ita, ngarud, dumngegkayo, O tattao ti simbaanko; ket dakayo nga elder dumngegkayo a sangsangkamaysa; naawatyon ti pagariak.

42 Agregtakayo nga agtungpal kadagiti amin a bilinko, no saan makedngankayo, ket paayennakayo ti pammatiyo, ket abakendakayo dagiti kabusoryo. Husto pay daytoy. Amen ken Amen.