1 Sa tadola vei keitou ko lomalagi, ka’u sa raica na matanitu silesitieli ni Kalou kei na kena lagilagi, ia au sega ga ni rawa ni tukuna se’u a tiko ena yagoqu se sega.

2 Au a raica tale ga na totoka e sega ni tukuni rawa ni matamata era na curuma ko ira sa rawata na matanitu ko ya, io sa vaka na yameyame ni bukawaqa e cocowiriwiri;

3 Ka vakatalega kina na itikotiko vakaturaga ni Kalou sa serau sara, a sa tiko kina ko koya na Tamada kei na Luvena.

4 Ia au sa raica na veisalatu totoka ni matanitu ko ya, na kena irairai sa vaka ni boro tu ena koula.

5 Au a raica na qase, ko Atama kei Eparaama; vata kei tamaqu kei tinaqu; na tuakaqu ko Alaveni, o koya a sa mate makawa sara;

6 Au sa kurabuitaka dina, se rawata vakacava e dua na ivotavota dodonu ena matanitu ko ya; me vaka ni a sa biuta na bula oqo ni se bera ni tekivuna na Turaga na nona vakasoqoni ira vata na Isireli ena ikarua ni gauna, ka se sega ni papitaisotaki me bokoci kina na nona ivalavala ca.

7 A sa rogo mai vei au na domo ni Turaga ka kaya: Ko ira kecega sa mate ni ra se bera ni rogoca na kosipeli, io ko ira a rawa me ra vakabauta kevaka a vakatarai me ra bula tiko, era na vakaivotavota ena matanitu silesitieli ni Kalou;

8 Ko ira tale ga era qai mate oqo ka lako yani ka ra sega ni bau rogoca, o ira a rawa me ra vakabauta ena yalodra taucoko, era na vakaivotavota ena matanitu ko ya;

9 Ni koi Au na Turaga, au na lewai ira na tamata kecega me vaka na nodra cakacaka, me vaka na gagadre ni lomadra.

10 Ia au sa raica tale ga ni ra sa vakabulai ena matanitu silesitieli vakalomalagi ko ira na gonelalai era sa mate, ni ra sa bera ni yacova na yabaki ni saumi taro vakai ira.