Seksyon 14
Rebelasyon nga ginhatag paagi kay Joseph Smith nga Propeta kay David Whitmer, sa Fayette, New York sang Hunyo 1829. Nangin interesado kaayo ang panimalay Whitmer sa ginhimo nga paglubad sang Libro ni Mormon. Nag-istar ang Propeta sa balay ni Peter Whitmer Sr., tubtob nga natapos ang buluhaton sang paglubad kag nakuha na ang eksklusibo nga kinamatarong sa kopya sang manugguwa nga libro. Tatlo sa mga anak nga lalaki ni Whitmer, nga ang tagsa sa ila nakabaton sang testimonya parte sa pagkamatuod sang buluhaton, nagkabalaka sing tuman parte sa ila indibidwal nga tulumanon. Ini nga rebelasyon kag ang duha nga nagasunod (nga mga seksyon 15 kag 16) ginhatag bilang sabat sa pagpamangkot paagi sa Urim kag Tumim. Si David Whitmer sang ulihi nangin isa sang Tatlo ka Saksi sang Libro ni Mormon.
1–6, Ang mga nagapangabudlay sa ulubasan magabaton sang kaluwasan; 7–8, Ang kabuhi nga wala’y katapusan ang pinakadako sa mga dulot sang Dios; 9–11, Gintuga ni Cristo ang kalangitan kag ang duta.
1 Isa ka dako kag dalayawon nga buluhaton ang pagasugdan na sa mga anak sang katawhan.
2 Tan-awa, ako ang Dios; magpamati sa akon pulong nga buhi kag gamhanan, nga mas matalom pa sa espada nga pihak kag pihak ang katalom, sa paghamulag sang mga lutalutahan pati utok sa tul-an; gani, magpamati sa akon pulong.
3 Tan-awa, ang uma puti na para anihon; gani, kon sin-o man ang luyag nga mag-ani, ipaduso sa iya ang iya garab sa iya kusog, kag paaniha samtang nga nagapadayon ang adlaw, agud nga mapanigana niya para sa iya kalag ang wala’y katubtuban nga kaluwasan sa ginharian sang Dios.
4 Huo, kon sin-o man ang magaduso sang iya garab kag mag-ani, ang amo man gintawag sang Dios.
5 Gani, kon magpangayo kamo sa akon magabaton kamo; kon magpanuktok kamo pagabuksan ini sa inyo.
6 Tinguhai nga ipahanabo kag sigurohon ang akon Sion. Tumana ang akon mga kasugoan sa tanan nga butang.
7 Kag, kon tumanon mo ang akon mga kasugoan kag magpadayon tubtob sa katapusan, magaangkon ka sang kabuhi nga wala’y katapusan nga sa diin ini nga dulot ang pinakadako sa tanan nga dulot sang Dios.
8 Kag matabo ini nga kon magpangayo ka sa Amay sa akon ngalan sa pagtuo nga may pagpati, mabaton mo ang Balaan nga Espiritu nga nagahatag sang panghambal agud nga makatindog ka bilang saksi sang mga butang nga imo mabatian kag makita, kag amo man agud nga mapahayag mo ang paghinulsol sa sining henerasyon.
9 Tan-awa, ako si Jesucristo, ang Anak sang buhi nga Dios nga nagtuga sang kalangitan kag sang duta, ang kasanag nga indi matago sa dulom;
10 Karon, kinahanglan ko ipalab-ot ang kabug-osan sang akon ebanghelyo halin sa mga Gentil pakadto sa panimalay ni Israel.
11 Kag tan-awa, ikaw si David, kag gintawag ka sa pagbulig; nga kon himuon mo ini, kag kon matutum ka, pagabugayan ka sang mga butang nga espirituwal kag dutan-on, kag mangin dako ang imo padya. Amen.