1 O Lenei, faauta, ona o le mea na manao mai ai oe, la’u auauna o Oliva Kaotui, e te fia iloa mai ia te a’u, Ou te tuu atu ai ia te oe upu nei:

2 Faauta, sa Ou faaali atu ia te oe, i le tele o taimi, e ala i lo’u Agaga, o mea ia na e tusia ua moni; o le mea lea ua e iloa ai ua moni i latou.

3 Ma afai ua e iloa ua moni i latou, faauta, Ou te tuu atu ia te oe se poloaiga, ia e faalagolago i mea ua tusia;

4 Ona ua tusia i totonu o i latou mea uma e faatatau i le faavae o la’u ekalesia, la’u talalelei, ma la’u papa.

5 O le mea lea, afai e te ati a’e i luga la’u ekalesia, i luga o le faavae o la’u talalelei ma la’u papa, o le a lē manumalo faitotoa o seoli e faasaga ia te oe.

6 Faauta, ua matua le lalolagi i le amioleaga; ma ua ao ona fafagu i luga le fanauga a tagata ia salamo, o Nuuese atoa foi ma le aiga o Isaraelu.

7 O le mea lea, ona ua uma ona papatisoina oe i lima o la’u auauna o Iosefa Samita, Le Itiiti, e tusa ma lena mea na Ou poloaiina ai o ia, ua faataunuuina e ia le mea na Ou poloaiina ai o ia.

8 Ma o lenei, aua le ofo ua Ou valaauina o ia mo lo’u lava faamoemoe, o se faamoemoe ua iloa e a’u; o le mea lea, afai e filiga o ia i le tausiga o a’u poloaiga o le a faamanuiaina o ia i le ola e faavavau; ma o lona igoa o Iosefa.

9 Ma o lenei, Oliva Kaotui e, Ou te tautala atu ia te oe, ma ia Tavita Uitimera foi, e ala i se poloaiga; aua, faauta, Ou te poloai atu i tagata uma i soo mea ia salamo, ma Ou te tautala atu ia te oulua, e pei ona fai ia Paulo la’u aposetolo, ona ua valaaulia oulua i lena lava valaauga e tasi na valaaulia i ai o ia.

10 Ia manatua ua tele lava le taua o agaga i le silafaga a le Atua;

11 Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia.

12 Ma ua toetu mai o ia mai le oti, ina ia mafai ona ia aumai o tagata uma ia te ia, i luga o tuutuuga o le salamo.

13 Ma ua matua tele lava lona olioli i le agaga e salamo!

14 O le mea lea, ua valaaulia ai oulua e alaga atu le salamo i lenei nuu.

15 Ma afai e faapea lua te galulue i o oulua aso uma i le alagaina o le salamo i lenei nuu, ma aumai, na o se agaga e toatasi ia te a’u, e matua tele lava lo oulua olioli faatasi ma ia i le malo o lo’u Tamā!

16 Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u i le malo o lo’u Tamā, e matua tele atu lo oulua olioli pe afai lua te aumai ni agaga e toatele ia te a’u!

17 Faauta, ua i o oulua luma la’u talalelei, ma la’u papa, ma la’u olataga.

18 Ole atu i le Tamā i lo’u igoa i le faatuatua, ma le talitonu o le a oulua maua, ma o le a oulua maua ai le Agaga Paia, lea na te faaali atu mea uma e tatau ai mo le fanauga a tagata.

19 Ma afai e lē ia te oulua le faatuatua, faamoemoe, ma le alofa mama, e leai se mea lua te mafaia.

20 Aua le finau faasaga atu i se ekalesia, vagana ai le ekalesia a le tiapolo.

21 Ave i o oulua luga le suafa o Keriso, ma tautala atu le upumoni ma le faamaoni.

22 Ma o le toatele o e salamo ma papatiso i lo’u igoa, o Iesu Keriso lea, ma tumau e oo i le iuga, o i latou lava ia o le a faaolaina.

23 Faauta, o Iesu Keriso o le suafa lea ua tuu mai e le Tamā, ma ua leai se isi igoa ua tuu mai e mafai ona faaolaina ai le tagata;

24 O le mea lea, e ao i tagata uma ona latou ave i o latou luga le suafa ua tuu mai e le Tamā, ona o le suafa lena o le a valaau ai i latou i le aso gataaga.

25 O le mea lea, afai latou te lē iloa le igoa e valaau ai i latou, e lē mafai ona latou maua se nofoaga i le malo o lo’u Tamā.

26 Ma o lenei, faauta, e toatele isi o i ai ua valaaulia e talai atu la’u talalelei i Nuuese ma i Iutaia;

27 Ioe, e toasefululua lava; ma o le Toasefululua o le a avea mo o’u soo, ma o le a latou ave i o latou luga lo’u igoa; ma o le Toasefululua o i latou ia o e o le a mananao latou te ave i o latou luga lo’u igoa ma le faamoemoe atoa o le loto.

28 Ma afai latou te mananao latou te ave i o latou luga lo’u igoa ma le faamoemoe atoa o le loto, ua valaaulia i latou e o atu i le lalolagi atoa ma talai atu la’u talalelei i tagata uma.

29 Ma o i latou ia o i latou o e ua Ou faauuina e papatiso atu i lo’u igoa, e tusa ma mea ua tusia;

30 Ma ua i ai i o oulua luma ia mea ua tusia; o le mea lea, e ao ina oulua faia lenei mea e tusa ai ma upu ua tusia.

31 Ma o lenei Ou te tautala atu ia te outou, le Toasefululua—Faauta, ua lava lo’u alofa tunoa mo outou; ia outou savavali sao i o’u luma ma ia lē agasala.

32 Ma, faauta, o outou ia o i latou o e ua faauuina ia te au e faauu ositaulaga ma aoao; e talai atu i tagata la’u talalelei, e tusa ma le mana o le Agaga Paia ua i totonu ia te outou, ma e tusa ai ma valaauga ma meaalofa a le Atua i tagata;

33 Ma o A’u, o Iesu Keriso, lo outou Alii ma lo outou Atua, ua tautala atu i nei mea.

34 O nei upu ua lē mai tagata pe mai se tagata, ae ua mai ia te a’u; o le mea lea, ia outou molimau atu o nei upu ua mai ia te a’u ae ua lē mai i se tagata;

35 Aua o lo’u leo lea o loo tautala atu ia upu ia te outou; ona ua tuu i latou e lo’u Agaga ia te outou, ma e mafai ona outou faitauina i latou o le tasi i le isi e ala i lo’u mana; ma e lē mafai ona outou mauaina i latou vagana ai e ala i lo’u mana;

36 O le mea lea, e mafai ona outou molimau atu sa outou faalogo i lo’u leo, ma iloa a’u upu.

37 Ma o lenei, faauta, Ou te tuu atu ia te oe, Oliva Kaotui, ma ia Tavita Uitimera foi, ia oulua saili mai le Toasefululua, o e o le a i ai manaoga ia na Ou tautala atu ai;

38 Ma o o latou manaoga ma a latou galuega o le a oulua iloa ai i latou.

39 Ma a oulua maua i latou, ia oulua faaali atu nei mea ia te i latou.

40 Ma ia oulua faapa’u’ū i lalo ma ifo atu i le Tamā i lo’u igoa.

41 Ma e ao ina oulua talai atu i le lalolagi, fai atu: E ao ina outou salamo ma papatiso, i le suafa o Iesu Keriso;

42 Ona e ao i tagata uma ona salamo ma papatiso, ma e lē na o tane, ae o fafine, ma tamaiti o e ua oo i tausaga e tatau ai.

43 Ma o lenei, a uma ona oulua maua o lenei faaaliga, e ao ina oulua tausi i a’u poloaiga i mea uma;

44 Ma o le a Ou galueaiina se galuega ofoofogia i totonu o le fanauga a tagata e ala atu i o oulua lima, mo le faatalitonuina o le toatele e uiga ia latou agasala, ina ia latou salamo, ma ina ia latou o mai i le malo o lo’u Tamā.

45 O le mea lea, o faamanuiaga ua Ou tuu atu ia te oulua ua silisili atu i luga o mea uma.

46 Ma a uma ona oulua maua lenei faaaliga, afai lua te lē tausi i a’u poloaiga e lē mafai ona faaolaina oulua i le malo o lo’u Tamā.

47 Faauta, o A’u, o Iesu Keriso, lo oulua Alii ma lo oulua Atua, ma lo oulua Togiola, o le mana o lo’u Agaga ua Ou tautala atu ai. Amene.