1 Karon, tan-awa, bangod sa butang nga ikaw, Oliver Cowdery, alagad ko, naghandum nga makahibalo halin sa akon, ginahatag ko sa imo ining mga pulong:

2 Tan-awa, ginpakita ko sa imo paagi sa akon Espiritu sa madamo nga tinion nga ang mga butang nga imo ginsulat matuod; gani, nakahibalo ka nga ang mga ini matuod.

3 Kag kon nakahibalo ka nga ang mga ini matuod, tan-awa, ginahatagan ko ikaw sing isa ka kasugoan nga magsalig ka sa mga butang nga nasulat;

4 Kay sa mga ini ang tanan nga butang nasulat parte sa pundasyon sang akon simbahan, akon ebanghelyo, kag akon bato.

5 Karon, kon pauswagon mo ang akon simbahan sa pundasyon sang akon ebanghelyo kag akon bato, ang mga ganhaan sang impiyerno indi makadaug batok sa imo.

6 Tan-awa, ang kalibutan nagakaluto na sa kalainan; kag kinahanglanon nga ang mga anak sang katawhan mapukaw sa paghinulsol, ang mga Gentil pati man ang panimalay ni Israel.

7 Karon, kay nabunyagan ka sa mga kamot sang akon alagad nga si Joseph Smith Jr., suno sa sinang akon ginsugo sa iya, natuman niya ang butang nga ginsugo ko sa iya.

8 Kag karon, indi matingala nga gintawag ko sia agud magtuman sang akon kaugalingon nga katuyoan, nga ang amo nga katuyoan ako lang ang nakahibalo; karon, kon mangin matutum sia sa pagtuman sang akon mga kasugoan pagabugayan sia sang kabuhi nga wala’y katapusan; kag ang iya ngalan si Joseph.

9 Kag karon, Oliver Cowdery, nagahambal ako sa imo, kag amo man kay David Whitmer bilang kasugoan; kay, tan-awa, ginasugo ko ang tanan nga tawo sa bisan diin nga maghinulsol, kag nagahambal ako sa inyo pareho sa akon apostoles nga si Pablo kay ginatawag kamo sa amo man nga tawag sa pag-alagad sa diin sia gintawag.

10 Dumduma nga dako ang bili sang mga kalag sa panan-awan sang Dios;

11 Kay, tan-awa, ang Ginuo nga inyo Manunubos nag-antos sang kamatayon sa unod; karon, nag-antos sia sang kasakit sang tanan nga katawhan agud nga ang tanan nga tawo maghinulsol kag magkari sa iya.

12 Kag nabanhaw sia halin sa kamatayon agud nga maluwas niya ang tanan nga tawo sa iya sa mga kondisyon sang paghinulsol.

13 Kag daw ano kadako ang iya kalipay sa kalag nga nagahinulsol!

14 Karon, ginatawag kamo sa pagwali sang paghinulsol sa sining katawhan.

15 Kag kon mangin amo sini nga magpangabudlay kamo sa tanan ninyo nga adlaw sa pagwali sang paghinulsol sa sining katawhan, kag makadala sing bisan isa lang ka kalag sa akon, daw ano kadako ang inyo kalipay upod sa iya sa ginharian sang akon Amay!

16 Kag karon, kon ang inyo kalipay mangin dako sa isa ka kalag nga inyo gindala sa akon sa ginharian sang akon Amay, daw ano kadako ang inyo mangin kalipay kon magdala kamo sing madamo nga kalag sa akon!

17 Tan-awa, yara sa inyo ang akon ebanghelyo, kag akon bato, kag akon kaluwasan.

18 Magpangayo sa Amay sa akon ngalan sa pagtuo nga may pagpati nga mabaton ninyo, kag maangkon ninyo ang Balaan nga Espiritu nga nagapahayag sang tanan nga butang nga kinahanglanon sa mga anak sang katawhan.

19 Kag kon wala kamo sang pagtuo, paglaum, kag putli nga paghigugma, wala kamo sing may mahimo.

20 Indi makigbais sa bisan ano nga simbahan magluwas sa simbahan sang yawa.

21 Dal-a sa inyo kaugalingon ang ngalan ni Cristo, kag maghambal sang kamatuoran sing may kaligdong.

22 Kag ang tanan nga nagahinulsol kag ginabunyagan sa akon ngalan, nga si Jesucristo, kag nagapadayon tubtob sa katapusan, ang amo man pagaluwason.

23 Tan-awa, Jesucristo ang ngalan nga ginhatag sang Amay, kag wala na sing iban pa nga ngalan nga ginhatag nga paagi sini ang tawo mahimo nga maluwas;

24 Gani, kinahanglan dal-on sang tanan nga tawo sa ila kaugalingon ang ngalan nga ginhatag sang Amay kay sa sina nga ngalan pagatawgon sila sa katapusan nga adlaw;

25 Gani, kon wala sila makahibalo sang ngalan nga ginatawag sa ila, indi sila makaangkon sang lugar sa ginharian sang akon Amay.

26 Kag karon, tan-awa, may iban pa nga ginatawag sa pagpahayag sang akon ebanghelyo sa Gentil pati sa Judio;

27 Huo, bisan pa dose; kag ang Dose mangin akon mga disipulo, kag pagadal-on nila sa ila kaugalingon ang akon ngalan; kag sila ang Dose nga magahandum sa pagdala sa ila kaugalingon sang akon ngalan nga may bug-os nga tinutuyo sang tagipusuon.

28 Kag kon ginahandum nila nga dal-on sa ila kaugalingon ang akon ngalan nga may bug-os nga tinutuyo sang tagipusuon, ginatawag sila sa paglakat sa bilog nga kalibutan sa pagwali sang akon ebanghelyo sa tagsa ka tawo.

29 Kag sila ang gin-ordinan ko agud magbunyag sa akon ngalan suno sa sinang ginsulat;

30 Kag yara sa inyo inang ginsulat; gani, kinahanglan ninyo himuon ining pagbunyag suno sa mga pulong nga ginsulat.

31 Kag karon nagahambal ako sa inyo, nga Dose—Tan-awa, ang akon grasya nagakaigo para sa inyo; kinahanglan kamo maglakat sing matarong sa akon atubang kag indi magpakasala.

32 Kag, tan-awa, kamo ang akon gin-ordinan agud mag-ordin sang mga pari kag mga manunudlo; agud magpahayag sang akon ebanghelyo suno sa gahum sang Balaan nga Espiritu nga yara sa inyo, kag suno sa mga pagtawag kag mga dulot sang Dios sa katawhan;

33 Kag ako, si Jesucristo, ang inyo Ginuo kag inyo Dios, naghambal sini.

34 Ining mga pulong indi iya sang mga tawo ukon sing isa ka tawo, kundi akon; karon, pamatud-an ninyo nga ang mga ini akon kag indi iya sang tawo;

35 Kay akon tingug ang nagahambal sang mga ini sa inyo, kay ini ginahatag sang akon Espiritu sa inyo, kag paagi sa akon gahum mabasa ninyo ang mga ini sa tagsa-tagsa; kag luwas lang nga ini paagi sa akon gahum indi ninyo ini maangkon;

36 Gani, makapamatuod kamo nga nabatian ninyo ang akon tingug, kag nakahibalo sang akon mga pulong.

37 Kag karon, tan-awa, ginahatag ko sa imo Oliver Cowdery, kag amo man kay David Whitmer, nga magpangita kamo sang Dose nga may yara sang handum tuhoy sa akon ginhambal;

38 Kag paagi sa ila mga handum kag ila mga buhat makilala ninyo sila.

39 Kag kon makita ninyo sila ipahayag ninyo ining mga butang sa ila.

40 Kag magluhod kamo kag magsimba sa Amay sa akon ngalan.

41 Kag kinahanglan kamo magwali sa kalibutan nga nagasiling: Kinahanglan kamo maghinulsol kag mabunyagan sa ngalan ni Jesucristo;

42 Kay ang tanan nga tawo kinahanglan nga maghinulsol kag mabunyagan, kag indi lamang mga lalaki kundi mga babayi, kag mga kabataan nga nakalab-ot na sa edad sang pagkamay-salabton.

43 Kag karon, pagkatapos nga mabaton ninyo ini, kinahanglan ninyo tumanon ang akon mga kasugoan sa tanan nga butang;

44 Kag paagi sa inyo mga kamot magahikot ako sing isa ka dalayawon nga buluhaton sa mga anak sang katawhan tuhoy sa pagpapati sa ila nga nakasala sila agud nga maghinulsol sila, kag agud nga makakari sila sa ginharian sang akon Amay.

45 Karon, ang mga bugay nga ginahatag ko sa inyo labaw pa sa tanan nga butang.

46 Kag pagkatapos nga mabaton ninyo ini, kon indi ninyo pagtumanon ang akon mga kasugoan indi kamo maluwas sa ginharian sang akon Amay.

47 Tan-awa, ako si Jesucristo, ang inyo Ginuo kag inyo Dios, kag inyo Manunubos, nga paagi sa gahum sang akon Espiritu naghambal sini. Amen.