1 Ako ang Alfa kag ang Omega, si Cristo nga Ginuo; huo, bisan pa ako amo sia, ang ginsuguran kag ang katapusan, ang Manunubos sang kalibutan.

2 Natuman kag natapos ko ang pagbuot niya sa akon nga iya ako, bisan pa ang Amay, parte sa akon—kag ginhimo ko ini agud nga magahum ko ang tanan nga butang sa akon—

3 Ginatigana ko ang tanan nga gahum bisan pa tubtob sa pagguba kay Satanas kag sa iya mga buluhaton sa katapusan sang kalibutan, kag sa katapusan nga dako nga adlaw sang paghukom nga akon ipahanabo sa mga pumuluyo sini nga magahukom sa tagsa ka tawo suno sa iya mga binuhatan kag mga hinimoan.

4 Kag pat-od gid nga ang tagsa ka tawo kinahanglan nga maghinulsol ukon mag-antos kay ako, nga Dios, nagapadayon.

5 Karon, indi ko pagbawion ang mga paghukom nga akon ipahanabo, kundi magapadayon ang mga kasubo, mga paghibi, pagnguyngoy kag pagbagrot sang mga ngipon, huo, sa sinang masalapoan sa akon wala nga kamot.

6 Apang, wala ginsulat nga mangin wala sing katapusan ang ining pagpaantos, kundi ginsulat nga nagapadayon nga pagpaantos.

7 Sa liwat, ginsulat nga wala’y katapusan nga silot; gani, mas maathag ini sangsa iban pa nga balaan nga mga kasulatan agud nga makahikot ini sa mga tagipusuon sang mga anak sang katawhan sing lubos para sa pagdayaw sang akon ngalan.

8 Karon, ipaathag ko sa inyo ining misteryo kay nagakabagay para sa inyo nga mahibaloan pareho nga nakahibalo man ang akon mga apostoles sining misteryo.

9 Nagahambal ako sa inyo nga mga ginpili para sa sining butang, sing tingob, agud nga makasulod kamo sa akon kapahuwayan.

10 Kay, tan-awa, ang misteryo sang pagkadiosnon, daw ano kadako ini! Kay, tan-awa, ako nagapadayon, kag ang silot nga ginahatag halin sa akon kamot amo ang nagapadayon nga silot kay Nagapadayon ang akon ngalan. Gani—

11 Ang wala’y katapusan nga silot amo ang silot sang Dios.

12 Ang nagapadayon nga silot amo ang silot sang Dios.

13 Karon, ginasugo ko ikaw nga maghinulsol, kag magtuman sang akon mga kasugoan nga imo nabaton paagi sa kamot sang akon alagad nga si Joseph Smith Jr. sa akon ngalan;

14 Kag paagi sa akon wala’y tupong nga gahum nabaton mo ang mga ini;

15 Karon, ginasugo ko ikaw nga maghinulsol—maghinulsol, ukon indi gani sakiton ko ikaw sa baston sang akon baba, kag sa akon kaugot, kag sa akon kaakig, kag ang imo mga pag-antos mangin mapait—kon ano kapait wala ka nakahibalo, kon ano kasakit wala ka nakahibalo, huo, kon ano kabudlay batason wala ka nakahibalo.

16 Kay tan-awa, ako, nga Dios, nag-antos sining mga butang para sa tanan agud nga indi sila mag-antos kon maghinulsol sila;

17 Apang kon indi sila maghinulsol kinahanglan nila mag-antos pareho man sa akon;

18 Sa diin ang amo nga pag-antos nagpakurog sa akon bangod sa kasakit, bisan pa nga Dios, nga pinakagamhanan sa tanan, kag nagwa ang dugo halin sa tagsa ka buho-buho sang panit, kag nag-antos sa lawas pati espiritu—kag luyag kuntani nga indi ko na pag-imnon pa ang mapait nga ilimnan, kag mag-isol—

19 Apang, sa Amay ang himaya, kag nag-ambit ako kag natapos ang akon mga pagpanghanda para sa mga anak sang katawhan.

20 Karon, ginasugo ko ikaw sa liwat nga maghinulsol, ukon indi gani ipaubos ko ikaw sa akon wala’y tupong nga gahum; kag magkumpisar ka sang imo mga sala; ukon indi gani mag-antos ka sining mga silot nga akon ginhambal nga ang pila sa pinakagamay, huo, bisan pa sa pinakadiutay nga bahin natilawan mo na sa tion nga ginpalayo ko ang akon Espiritu.

21 Kag ginasugo ko ikaw nga wala ka na sing iban pa nga iwali kundi ang paghinulsol, kag indi pag-ipakita ining mga butang sa kalibutan tubtob nga kinaalam para sa akon.

22 Kay indi sila makasarang sang karne subong, kundi kinahanglan nila magbaton sang gatas; gani, indi nila dapat mahibaloan ining mga butang, ukon indi gani madula sila sing espirituhanon.

23 Magtuon sa akon, kag magpamati sa akon mga pulong; maglakat sa kalulo sang akon Espiritu; kag makaangkon ka sang paghidaet sa akon.

24 Ako si Jesucristo; nagkari ako sa kabubut-on sang Amay, kag ginahimo ko ang iya pagbuot.

25 Kag sa liwat, ginasugo ko ikaw nga indi ka magkaibog sang asawa sang imo isigkatawo; ukon tinguhaan nga patyon ang imo isigkatawo.

26 Kag sa liwat, ginasugo ko ikaw nga indi ka magdalok sang imo kaugalingon nga pagkabutang, kundi ihatag ini sing maalwan para sa pagpa-imprinta sang Libro ni Mormon nga nagaunod sang kamatuoran kag sang pulong sang Dios—

27 Nga amo ang akon pulong sa Gentil agud nga sa indi madugay mapahayag ini sa Judio, nga ang mga Lamanhon ila sini nagkalabilin nga kaliwat, agud nga magpati sila sa ebanghelyo, kag indi na magpaabot pa sang Mesias nga nagkari na.

28 Kag sa liwat, ginasugo ko ikaw nga magpangamuyo ka sing mabaskog amo man sa imo tagipusuon; huo, sa atubang sang kalibutan amo man sing sekreto, upod sa kadam-an amo man nga nagaisahanon.

29 Kag ipahayag mo ang maayong balita, huo, ibantala ini sa mga bukid, kag sa tagsa ka mataas nga lugar, kag sa tagsa ka katawhan nga itugot sa imo nga makita.

30 Kag himuon mo ini sa lubos nga pagpaubos nga nagasalig sa akon, nga wala nagapasipala batok sa mga mapasipalahon.

31 Kag indi ka maghambal parte sa mga doktrina, kundi magpahayag ka sang paghinulsol kag pagtuo sa Manluluwas, kag kapatawaran sang mga sala paagi sa bunyag, kag paagi sa kalayo, huo, bisan pa sa Balaan nga Espiritu.

32 Tan-awa, ini importante kag ang katapusan nga kasugoan nga akon ihatag sa imo parte sining butang; kay mangin igo ini para sa imo adlaw-adlaw nga pagpanglakaton, bisan pa tubtob sa katapusan sang imo kabuhi.

33 Kag kalisud ang mabaton mo kon pabay-an mo ining mga laygay, huo, bisan pa kalaglagan nimo kag sang imo pagkabutang.

34 Ibaligya ang bahin sang imo pagkabutang, huo, bisan pa ang bahin sang imo mga duta, kag ang tanan luwas sinang kinahanglanon mo para sa pangabuhian sang imo panimalay.

35 Bayari ang utang nga imo ginkontrata sa manug-imprinta. Hilwaya ang imo kaugalingon halin sa pagkaulipon.

36 Magbiya sa imo balay kag puluy-an luwas lang kon luyag mo makita ang imo panimalay;

37 Kag maghambal sing hilway sa tanan; huo, magwali, maglaygay, magpahayag sang kamatuoran, bisan pa sa mabaskog nga tingug nga may tunog sang pagsinadya nga nagasinggit—Hosana, hosana, bulahan ang ngalan sang Ginuong Dios!

38 Magpangamuyo pirme, kag igabubo ko ang akon Espiritu sa imo, kag mangin dako ang imo bugay—huo, mas dako pa sangsa kon mag-angkon ka sang mga manggad sang duta kag sang pagkaumalagi sini.

39 Tan-awa, makabasa ka bala sini nga wala nagakasadya kag nagabayaw ang imo tagipusuon sa kalipay?

40 Ukon makapadayon ka pa bala bilang bulag nga manugtuytuy?

41 Ukon mahimo ka bala mangin mapainubuson kag malulo, kag magdala sang imo kaugalingon nga but-anan sa akon atubang? Huo, magpalapit sa akon nga imo Manluluwas. Amen.