Jekjōn 19
Revelesōn letok kōn Josep Smith, ilo Manchester, New York, ekkā ļōmņaki ilo rak in 1829. Ilo bwebwenato eo an, Rikanaan eo ej kwaļo̧k kadkadin āinwōt “juon kien jān Anij im jab jān armej, n̄an Martin Harris, kar letok jān E eo Ejjeļo̧k Jem̧ļo̧kin.”
1–3, Kraist ej kabwijer aolep kajoor; 4–5, Aolep armej aikuj ukeļo̧k ak en̄taan; 6–12, Kaje ejjeļo̧k jem̧ļo̧kin ej kaje eo an Anij; 13–20, Kraist eaar en̄taan n̄an aolep, bwe ren maron̄ jab en̄taan eļan̄n̄e renaaj ukeļo̧k; 21–28, Kwaļo̧k naan kōn gospel in ukeļo̧k; 29–41, Kabun̄bun̄ļo̧k naan ko rem̧m̧an.
1 N̄aij Alpa im Omega, Kraist Irooj; aaet, em̧ool N̄aij E, jinoin im jem̧ļo̧kin, Ripinmuur eo an laļ.
2 N̄a, ālikin Aō kar kōtōprak im kadedeļo̧k ankilaan Eo N̄aij An, em̧ool Jema, kōn Eō—im Iaar kōm̧m̧ane men in bwe In maron̄ door aolep men otemjeļo̧k n̄an Eō make—
3 Dāpiji aolep kajoor, em̧ool n̄an ko̧kkure eo an Setan im jerbal ko an ilo jem̧ļo̧k in laļ, im raan in ekajet eo eļap āliktata, eo Inaaj kōm̧m̧ane ioon ro rej jokwe ioon laļ, ekajet aolep armej ekkar n̄an jerbal ko an im kōm̧m̧an ko eaar kōm̧m̧ani.
4 Im elukkuun m̧ool aolep armej eaikuj ukeļo̧k ak en̄taan, bwe N̄a, Anij, ejjeļo̧k Jem̧ļo̧kū.
5 Kōn menin, Ij jab jeorļo̧k ekajet ko Inaaj kōm̧m̧ani, ak wo ko renaaj wōnm̧aanļo̧k, jan̄, lim̧ō im n̄i ļaļļaļ, aaet, n̄an ro lo er ituanmiin̄ū.
6 Mekarta, e ej jab jeje ke enaaj ejjeļo̧k jem̧ļo̧k in en̄taan in, ak em̧ōj jeje en̄taan eo ejjeļo̧k jem̧ļo̧kin.
7 Bar juon alen, em̧ōj jeje mej indeeo; kōn menin eļapļo̧k an alikkar jān jeje ko rekwōjarjar jet, bwe emaron̄ jerbal ioon būruōn ro nejin armej raņ, dipiio n̄an aiboojoj eo an Eta.
8 Kōn menin, Inaaj kōmmeļeļeik n̄an kom̧ mennin ittino in, bwe ekkar n̄an kom̧ bwe kom̧in jeļā em̧ool āinwōt rijjilōk ro Aō.
9 Ij ekkōnono n̄an kom̧ ro kāālet er ilo men in, em̧ool āinwōt juon, bwe kom̧in maron̄ deļo̧n̄tok ilo kakkije eo Aō.
10 Bwe, lo, mennin ittino eo ilo jerbal in Anij, ewi jon̄an an ļap! Bwe, lo, N̄a ejjeļo̧k jem̧ļo̧kū, im kaje eo me leļo̧k jān Peiū ej kaje ejjeļo̧k jem̧ļo̧kin, bwe Ejjeļo̧k Jem̧ļo̧kin ej Eta. Kōn menin—
11 Kaje indeeo ej kaje eo an Anij.
12 Kaje ejjeļo̧k jem̧ļo̧kin ej kaje eo an Anij.
13 Kōn menin, Ij jiron̄ eok n̄an ukeļo̧k, im kōjparok kien ko me kwaar bōki jān pein rikarejera Josep Smith, Jun., ilo Eta;
14 Im ej jān kajoor bōtata eo Aō bwe kwaar bōki;
15 Kōn menin Ij jiron̄ eok n̄an ukeļo̧k—ukeļo̧k, n̄e I ab den̄ļo̧ke eok kōn aļaļ in Lo̧n̄iū, im kōn Aō illu, im Aō libabne, im en̄taan ko am naaj kanooj metak—ewi jon̄an aer metak kwōj jab jeļā, ewi jon̄an ekkan̄ in kwōj jab jeļā, aaet, ewi jon̄an pen in ineeke kwōj jab jeļā.
16 Bwe lo, N̄a, Anij, Iaar en̄taan kōn men kein n̄an aolep, bwe ren maron̄ jab en̄taan eļan̄n̄e renaaj ukeļo̧k;
17 Ak eļan̄n̄e reban ukeļo̧k renaaj aikuj en̄taan em̧ool āinwōt N̄a;
18 En̄taan eo eaar kōm̧m̧an bwe N̄a, em̧ool Anij, eo Eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb—im Ikar kōņaan bwe In maron̄ kar jab idaak kap eo emeo̧, im jenlik—
19 Mekarta, aiboojoj n̄an Jema, im Iaar bōke im kadedeļo̧k m̧aanjāppopo ko Aō n̄an ro nejin armej raņ.
20 Kōn menin, Ij jiron̄ eok bar juon alen n̄an ukeļo̧k, n̄e Iab kōttāik eok kōn Aō kajoor bōtata; im bwe kwōn kwaļo̧k jero̧wiwi ko am, n̄e kwo ab en̄taan kōn kaje kein ko Iaar ekkōnono kaki, ko me ilo diktata, aaet, em̧ool ilo jekjek eo ilaļtata kwaar nemake ilo iien eo Iaar bōkļo̧k Jetōb eo Aō.
21 Im Ij jiron̄ eok bwe kwōn kwaļo̧k naan kōn ejjeļo̧k ak ukeļo̧k, im jab kwaļo̧k men kein n̄an laļ in m̧ae ej mālōtlōt ilo N̄a.
22 Bwe reban bōk kanniōk kiiō, ak milik reaikuj bōk; kōn menin, reaikuj jab jeļā men kein, n̄e raab mej.
23 Ekkatak jān Eō, im ron̄jaki naan ko Aō; etetal ilo ettā in Jetōb eo Aō, im enaaj wōr am aenōm̧m̧an ilo N̄a.
24 N̄a Jisōs Kraist; Iaar itok jān ankilaan Jema, im Ij kōm̧m̧ane Ankilaan.
25 Im bar juon alen, Ij jiron̄ eok bwe kwōn jab ankoņake kōrā eo pāleen riturum̧; ak kappukot mour eo an riturum̧.
26 Im bar juon alen, Ij jiron̄ eok bwe kwōn jab ankoņake men eo mweiōm, ak ajeje ilo ejjeļo̧k wōņāān n̄an jeje eo an Bok in Mormon, eo ewōr ie m̧ool eo im naan eo an Anij—
27 Eo ej Aō naan n̄an ro riAelōn̄ ko, bwe epaak an maron̄ etal n̄an riJu, ro jān er riLeman ro rej juon m̧ōttaer, bwe ren maron̄ tōmak gospel eo, im reilo̧k jaab n̄an juon Messaia n̄an itok eo ekar dedeļo̧k an itok.
28 Im bar juon alen, Ij jiron̄ eok bwe kwōn jar ilo ainikien barāinwōt ilo būruōm̧; aaet, im̧aan laļ in barāinwōt ilo ittino, ilo ijoko jabdewōt barāinwōt ilo am make iaam.
29 Im kwo naaj kabun̄bun̄ļo̧k naan ko rem̧m̧an, aaet, kajeeded e ioon toļ ko, im ioon jikin utiej otemjej, im ilubwiljin armej otemjej naaj kōmālim eok n̄an lo er.
30 Im kwo naaj kōm̧m̧ane kōn aolep ettā, lōke ilo N̄a, jab kajjirere ņae rikajjirere ro.
31 Im kōn katak ko rem̧wilaļ kwōn jab ekkōnono, ak kwōn kwaļo̧k ukeļo̧k im tōmak ioon Rilo̧mo̧o̧r, im jeorļo̧k in jero̧wiwi ko jān peptaij, im jān kijeek, aaet, em̧ool Jetōb Kwōjarjar eo.
32 Lo, en̄in ej juon kien eļap im āliktata me I naaj lewōj n̄an eok kōn menin; bwe men in enaaj bwe n̄an am etetal raan n̄an raan, em̧ool n̄an jem̧ļo̧k in mour eo am.
33 Im būrom̧ōj kwo naaj bōk eļan̄n̄e kwo naaj kajekdo̧o̧ni kapilōk kein, aaet, em̧ool ko̧kkure eo am im an men ko mweiōm.
34 Kōtļo̧k juon m̧ōttan men ko mweiōm, aaet, em̧ool m̧ōttan bwidej ko am, im aolep ijello̧kun wōt n̄an rie an baam̧le eo am.
35 Kōļļāik m̧uri eo kwaar kooņtōreak e ippān bar print i bok eo. Kōtļo̧k eok jān kōm̧akoko.
36 Likūt m̧weo im̧ōm im ijo jikūm̧, ijello̧kun wōt n̄e kwo naaj kōņaan lo baam̧le eo am;
37 Im ekkōnono ilo anemkwōj n̄an aolep; aaet, kwaļo̧k, kōketak, kabun̄bun̄ļo̧k m̧ool eo, em̧ool kōn juon ainikien eļļaaj, kōn ainikien lan̄lōn̄, im kūr—Hosana, hosana, ejeraam̧m̧an etan Irooj Anij!
38 Jar iien otemjej, im Inaaj lutōkleplep Jetōb eo Aō ioom, im ekanooj ļap naaj jeraam̧m̧an eo am—aaet, em̧ool eļapļo̧k jān n̄e kwōnaaj kar bōk mennin aorōk ko an laļ im tōn̄tōn̄ in kōt eo ippāntok.
39 Lo, kwo maron̄ ke kōnono jān men in im jab lan̄lōn̄ im lōn̄aje būruōm̧ kōn lo̧udin̄din̄?
40 Ak kwo maron̄ ke ettōr to ettōrtak wōt āinwōt juon ritōl ripilo?
41 Ak kwo maron̄ ke ettā im kōtōmļap, im m̧akūtkūt ilo mālōtlōt Im̧aō? Aaet, itok n̄an Ippa am Rilo̧mo̧o̧r. Amen.