1 Laa’in li Alfa ut li Omega, Kristo li Qaawa’; relik chi yaal, laa’in ajwi’ a’an, li xtiklajik ut li roso’jik, laj Tojol rix li ruchich’och’.

2 Laa’in, chirix xtz’aqob’resinkil ru ut xchoyb’al li rajom xch’ool li ani eechaninb’ilin wi’, a’an ajwi’ li Yuwa’b’ej, chiwix—ut xinb’aanu a’in re taaruuq tink’e chixjunil li k’a’aq re ru rub’el inwankil—

3 Ut kink’uula chixjunil li wankilal, toj reetal xsachb’al ajwi’ laj Satanas ut eb’ lix k’anjel sa’ li roso’jik li ruchich’och’, ut li nimla roso’jikil kutan re raqb’a-aatin, li tink’e chi nume’k sa’ xb’eeneb’ li wankeb’ chi sa’, ut tinraq aatin chirix li junjunq chi winq jo’ chanru lix k’anjel ut lix b’aanuhom, li b’arwan kixb’aanu chaq.

4 Ut ch’olch’o naq li junjunq chi winq tento tixjal xk’a’uxl malaj ut tixnumsi rahilal, xb’aan naq laa’in, li Dios, maak’a’ woso’jik.

5 Jo’kan naq moko nawisi ta li raqb’a-aatin li tink’e; taaxik b’an li rahilal, li yaab’ak, ayaynak, ut k’uxuxink ruuch-e, relik chi yaal, reheb’ li te’tawe’q sa’ lin tz’e uq’.

6 A’b’anan, ink’a’ tz’iib’anb’il naq maajun roso’jik li rahilal a’in taawanq; tz’iib’anb’il b’an, li rahilal maak’a’ roso’jik.

7 Jo’kan wi’chik, tz’iib’anb’il li junelik tojb’a-maak, jo’kan naq q’axal kaw wi’chik chiru li jun ch’ol chik chi loq’laj hu, re naq taak’anjelaq sa’ xch’ooleb’ li ralal xk’ajoleb’ li winq, anchal re xnimankil xloq’al ink’ab’a’.

8 Jo’kan ut, tinch’olob’ cheru li muqmuukil na’leb’ a’in, xb’aan naq na’ajman ru choq’ eere naq teenaw jo’ chanru ajwi’ eb’ lin apostol.

9 Nekexwaatina laa’ex li sik’b’il eeru sa’ li na’leb’ a’in, jo’ raj junajex, re taaruuq tex’ok sa’ lin hilob’aal.

10 Xb’aan naq, k’ehomaq reetal, li muqmuukil na’leb’ re li choxahilal, k’a’jo’ xnimal ru! Xb’aan naq, k’ehomaq reetal, laa’in maak’a’ woso’jik, ut li tojb’a-maak li k’eeb’il xb’aan li wuq’ a’an li tojb’a-maak maak’a’ roso’jik, xb’aan naq Maak’a’ Roso’jik, a’an ink’ab’a’. Jo’kan ut—

11 Li junelik tojb’a-maak a’an li tojb’a-maak naxk’e li Dios.

12 Li tojb’a-maak maak’a’ roso’jik a’an li tojb’a-maak naxk’e li Dios.

13 Jo’kan ut, nakatintaqla chixjalb’al aak’a’uxl, ut chixpaab’ankileb’ li taqlahom li kak’ul rik’in ruq’ lin moos aj Jose Smith, alalb’ej, sa’ lin k’ab’a’;

14 Ut a’an sa’ xk’ab’a’ lin nimajwal wankil naq kak’uleb’;

15 Jo’kan naq nakatintaqla chixjalb’al aak’a’uxl—chajal aak’a’uxl, maare anchal tatinsak’ rik’in xxuq’ lix tz’uumal we, ut rik’in lin ch’iilahom, ut lin josq’il, ut taawanq chi nim li rahilal taanumsi—chan ru xnimal moko nakanaw ta, ut chan ru xq’axalil xrahil moko nakanaw ta, relik chi yaal, chan ru naq ch’a’aj xkuyb’al moko nakanaw ta.

16 Xb’aan naq k’e reetal, laa’in, li Dios, kinnumsi li k’a’aq re ru a’in choq’ re chixjunileb’, re naq ink’a’ te’xnumsi rahilal wi te’xjal xk’a’uxl;

17 A’ut wi ink’a’ te’xjal xk’a’uxl tento te’xnumsi rahilal jo’ kink’ul ajwi’ laa’in;

18 Ut a’ rahilal a’an kinixk’e laa’in, li Dios ajwi’, li q’axal nim wi’chik chiru chixjunil, chi siksotk xb’aan xrahil ut chi elk inkik’el ruuchil tiqob’, ut chixnumsinkil xrahil li tz’ejwalej jo’ ajwi’ li musiq’ej—ut chirajb’al naq ink’a’ raj tinwuk’ li k’ahil sek’, ut tinka’ch’inob’resi raj wib’—

19 A’b’anan, rehaq taxaq li Yuwa’b’ej li loq’alil, ut kin’uk’ak ut kinchoy lin kawresihom choq’ reheb’ li ralal xk’ajoleb’ li winq.

20 Jo’kan ut, nakatintaqla wi’chik chixjalb’al aak’a’uxl, maare anchal tatintuulanob’resi rik’in lin nimajwal wankilal; ut naq taach’olob’eb’ laa maak, maare anchal taanumsiheb’ li tojb’a-maak li xin’aatinak wi’, li xayal chi yal b’ab’ay, relik chi yaal, chi yal jun miin raqal ajwi’ sa’ li hoonal naq kiwisi chaq lin Musiq’.

21 Ut nakatintaqla naq maak’a’ chik taajultika, ka’ajwi’ li jalb’a-k’a’uxlej, ut maak’ut li k’a’aq re ru a’in chiru li ruchich’och’ toj reetal naq a’anaq xchaab’ilal inna’leb’.

22 Xb’aan naq ink’a’ neke’ru chixkuyb’al li kawil tzakemq anajwan; xya’al li tu’ b’an tento te’xk’ul; jo’kan ut, tento naq ink’a’ te’xnaw li k’a’aq re ru a’in, maare anchal te’oso’q.

23 Chattzoloq chiwix, ut chawab’i li waatin; chatb’eeq sa’ xtuulanil inMusiq’, ut taawanq aatuqtuukilal wik’in.

24 Laa’in li Jesukristo; kinchal xb’aan li rajom li Yuwa’b’ej, ut ninb’aanu li rajom.

25 Ut jo’kan wi’chik, nakatintaqla naq ink’a’ taara ru rixaqil laa was aawiitz’in; chi moko taasik’ xyu’am laa was aawiitz’in.

26 Ut jo’kan wi’chik, nakatintaqla naq ink’a’ taara ru li k’a’ru aawe laa’at; taak’e b’an chi moko ramb’il ta re taak’uub’amanq choq’ hu lix Hu laj Mormon, li wan wi’ li yaal ut li raatin li Dios—

27 A’an li waatin choq’ re laj Gentil, re naq chi seeb’ taaxik rik’in laj Judio, li wankeb’ wi’ laj Lamanita choq’ jun rela’, re naq taaruuq te’xpaab’ li evangelio, ut ink’a’ te’royb’eni chi chalk jun Mesias li ak xk’ulun chaq.

28 Ut jo’kan wi’chik, nakatintaqla naq tattijoq rik’in xyaab’ aakux jo’ ajwi’ sa’ laa ch’ool; relik chi yaal, chiru li ruchich’och’ jo’ ajwi’ sa’ muqmu, chi k’utk’u jo’ ajwi’ aajunes.

29 Ut taach’olob’ li sahil esilal, relik chi yaal, taapuktesi chiruheb’ li tzuul, ut sa’ li junjunq chi taqenaqil na’ajej, ut sa’ xyanqeb’ chixjunil li tenamit li tatkanab’aaq wi’ chirilb’aleb’.

30 Ut taab’aanu chi anchal aatuulanil, chi kanab’anb’il aawib’ chiwu, chi ink’a’ nakahob’eb’ laj hob’onel.

31 Ut chirix li k’iila raqal chi na’leb’ ink’a’ tat-aatinaq; taach’olob’ b’an li jalb’a-k’a’uxlej ut xpaab’ankil li Kolonel, ut li risinkil li maak xb’aan li kub’iha’, ut xb’aan xam, relik chi yaal, xb’aan li Santil Musiq’ej.

32 K’e reetal, a’in jun li nim ut roso’jikil taqlahom li nink’e aawe chirix li na’leb’ a’in; xb’aan naq tz’aqalaq a’in choq’ re laa b’eenik wulaj wulaj, toj reetal ajwi’ li roso’jik laa yu’am.

33 Ut rahilal taak’ul wi nakak’ul chi jo’maajo’eb’ li na’leb’ a’in li xe’k’eeman aawe, relik chi yaal, a’anaq aasachlijik laa’at ut li k’a’ru aawe.

34 K’e jun jachal li k’a’ru aawe, relik chi yaal, jun raqaleb’ ajwi’ laa ch’och’, chixjunil ut, ka’ajwi’ li taak’anjelaq re laa junkab’al ink’a’.

35 Toj li k’as kat-ok wi’ sa’ kontraat rik’in laj k’uub’anel hu. Kol aawib’ chiru moosil.

36 Kanab’ laa kab’l ut laa wochoch, ka’ajwi’ naq taawaj rilb’al laa junkab’al ink’a’;

37 Ut chat-aatinaq chi moko ramb’ilat ta chiruheb’ chixjunil; relik chi yaal, chatjultikanq aatin, chatwaklesinq ch’oolej, chach’olob’ li yaal, chi kaw xyaab’ aakux, rik’in xyaab’ li saho’k ch’oolej, ut chaye—Hosanna, hosanna, osob’tesinb’ilaq taxaq xk’ab’a’ li Qaawa’ Dios!

38 Junelik chattijoq, ut laa’in tinhoy lin Musiq’ sa’ aab’een, ut nimaq aawosob’tesinkil—relik chi yaal, q’axal nimaq wi’chik chiru wi taak’ul lix b’ihomal li ruchich’och’ ut li po’e’k jo’ chan ru xnimal a’an.

39 K’e reetal, ma naru nakawil a’in chi ink’a’ nasaho’ aach’ool ut nakawaklesi aawaam xb’aan xsahil?

40 Malaj ut ma toj nakatru chi alinak jo’ aj b’eresinel mutz’?

41 Malaj ut ma naru tatwanq chi tuulan ut kub’enaq aach’ool, ut taab’eresi aawib’ rik’in xchaab’ilal aana’leb’ chiwu? Relik chi yaal, chalqat wik’in laa’in, laa Kolonel. Amen.