1 Ang pagsugod sang Simbahan ni Cristo sa sining ulihing mga adlaw kag subong mil otso sientos kag treinta ka tuig na humalin sang pagkari sang aton Ginuo kag Manluluwas nga si Jesucristo sa unod, nga ini gin-organisar sa husto nga paagi kag ginpahamtang nga suno sa mga layi sang aton pungsod, paagi sa pagbuot kag mga kasugoan sang Dios, sa ika-apat nga bulan, kag sa ika-anum nga adlaw sang bulan nga ginatawag nga Abril—

2 Nga ang amo nga mga kasugoan ginhatag kay Joseph Smith Jr., nga gintawag sang Dios, kag gin-ordinan bilang isa ka apostoles ni Jesucristo agud mangin ang pinakauna nga elder sang sini nga simbahan;

3 Kag kay Oliver Cowdery nga gintawag man sang Dios nga isa ka apostoles ni Jesucristo agud mangin ika-duha nga elder sang sini nga simbahan, kag gin-ordinan ni Joseph Smith;

4 Kag ini suno sa grasya sang aton Ginuo kag Manluluwas nga si Jesucristo nga sa iya ang tanan nga himaya, subong kag tubtob sa wala’y katapusan. Amen.

5 Pagkatapos nga pat-od nga ginpahayag sa sining una nga elder nga nabaton niya ang kapatawaran sang iya mga sala, nagumon sia liwat sa mga bugal sang kalibutan;

6 Apang pagkatapos nga maghinulsol, kag magpaubos sang iya kaugalingon sing matuod-tuod paagi sa pagtuo, ang Dios nagbulig sa iya paagi sa balaan nga anghel nga ang dagway sini pareho sang kilat, kag ang mga nasul-ob sini matinlo kag maputi nga labaw sa tanan nga iban pa nga kaputian;

7 Kag naghatag sa iya sang mga kasugoan nga naghatag inspirasyon sa iya;

8 Kag naghatag sa iya sang ikasarang halin sa kahitaasan paagi sa mga instrumento nga sang antes pa ginhanda para sa paglubad sang Libro ni Mormon;

9 Nga nagaunod sang kasulatan sang nalaglag nga katawhan, kag sang kabug-osan sang ebanghelyo ni Jesucristo sa mga Gentil kag amo man sa mga Judio;

10 Nga ginhatag paagi sa inspirasyon, kag ginpamatud-an sa iban paagi sa pag-alagad sang mga anghel, kag ginapahayag nila sa kalibutan—

11 Nga nagapakita sa kalibutan nga ang balaan nga mga kasulatan matuod, kag ang Dios nagahatag inspirasyon sa mga tawo kag nagatawag sa ila sa sining balaan nga buluhaton sa sining panahon kag henerasyon, amo man sa dumaan nga mga henerasyon;

12 Gani nagapakita nga amo man sia sa gihapon nga Dios kahapon, subong, kag tubtob sa wala’y katapusan. Amen.

13 Gani, bangod nga may mabaskog ini nga mga saksi nga paagi sa ila pagahukman ang kalibutan, huo, bisan pa ang tanan nga magabaton pagkatapos sini sang ihibalo parte sining buluhaton.

14 Kag ang inang nagabaton sini nga may pagtuo, kag nagahimo sang pagkamatarong magabaton sang korona sang kabuhi nga wala’y katapusan;

15 Apang ang inang nagapatig-a sang ila mga tagipusuon sa pagkawala’y pagtuo, kag nagasikway sini, magaresulta ini sa ila kaugalingon nga pagkondenar—

16 Kay ang Ginuong Dios naghambal sini; kag kita nga mga elder sang simbahan nakabati kag nagapamatuod sang mga pulong sang mahimayaon nga Hari sa kahitaasan, nga sa iya ang himaya tubtob sa wala’y katapusan. Amen.

17 Paagi sining mga butang nakahibalo kita nga may yara sang Dios sa langit nga wala’y dulonan kag wala’y katapusan, halin sa wala’y katubtuban tubtob sa wala’y katubtuban amo man gihapon ang nagapadayon nga Dios nga nagporma sang langit kag duta, kag sang tanan nga butang nga yara sa mga ini;

18 Kag gintuga niya ang tawo, lalaki kag babayi sa iya kaugalingon nga dagway kag sa iya kaugalingon nga kaangay, gintuga niya sila;

19 Kag ginhatagan sila sang mga kasugoan nga higugmaon kag alagaran nila sia, ang nagaisahanon nga buhi kag matuod nga Dios, kag sia lamang ang ila simbahon.

20 Apang bangod sa paglapas sining balaan nga mga layi ang tawo nangin lawasnon kag yawan-on, kag nalaglag sa sala.

21 Gani, ang Dios nga Makagagahum naghatag sang iya Bugtong nga Anak, suno sa nasulat sa sadtong balaan nga mga kasulatan nga nagpahayag parte sa iya.

22 Gintentar sia apang wala nagsapak sang mga ini.

23 Ginlansang sia sa krus, napatay, kag nabanhaw sa ika-tatlo nga adlaw;

24 Kag nagkayab sa langit agud magpungko sa tuo nayon nga kamot sang Amay, sa paghari sa wala’y tupong nga gahum suno sa pagbuot sang Amay;

25 Agud nga ang tanan nga magpati kag magpabunyag sa iya balaan nga ngalan kag magpadayon nga may pagtuo tubtob sa katapusan, maluwas—

26 Indi lamang inang mga nagtuo pagkatapos nga nagkari sia sa unod sa kasagsagan sang panahon, kundi ang tanan-tanan man halin pa sa ginsuguran, ang tanan nga nagkabuhi antes sia nagkari, nga nagpati sa mga pulong sang balaan nga mga propeta, nga nagpamulong samtang natandog sila sang dulot sang Balaan nga Espiritu, nga nagsaksi sing matuod sa iya sa tanan nga butang, magaangkon sang kabuhi nga wala’y katapusan,

27 Kag amo man sinang magaabot pa pagkatapos kay Cristo nga magapati sa mga dulot kag mga tawag sang Dios sa pag-alagad paagi sa Balaan nga Espiritu nga nagapamatuod parte sa Amay kag sa Anak;

28 Nga ang Amay, Anak kag Balaan nga Espiritu isa ka Dios nga wala’y dulonan kag wala’y katapusan. Amen.

29 Kag nakahibalo kita nga ang tanan nga tawo kinahanglan maghinulsol kag magpati sa ngalan ni Jesucristo, kag magsimba sa Amay sa iya ngalan, kag magpadayon nga may pagtuo sa iya ngalan tubtob sa katapusan, ukon indi gani indi sila maluwas sa ginharian sang Dios.

30 Kag nakahibalo kami nga ang pagpakamatarong paagi sa grasya sang aton Ginuo kag Manluluwas nga si Jesucristo matarong kag matuod;

31 Kag nakahibalo man kita nga ang pagpakabalaan paagi sa grasya sang aton Ginuo kag Manluluwas nga si Jesucristo matarong kag matuod, sa tanan nga nagahigugma kag nagaalagad sa Dios sa bug-os nila nga ikasarang, hunahuna, kag kusog.

32 Apang may posibilidad nga ang tawo mahamulag sa grasya kag magpalayo sa buhi nga Dios;

33 Gani, paandaman kag papangamuyuon pirme ang simbahan, agud indi sila mahulog sa tentasyon;

34 Huo, kag bisan pa inang mga ginpakabalaan paandaman man.

35 Kag nakahibalo kita nga ining mga butang matuod kag suno sa mga rebelasyon ni Juan nga wala nagadugang ukon nagaiban halin sa propesiya sang iya libro, sa balaan nga mga kasulatan, ukon sa mga rebelasyon sang Dios nga igapahayag sa palaabuton paagi sa dulot kag gahum sang Balaan nga Espiritu, sa tingug sang Dios, ukon sa pag-alagad sang mga anghel.

36 Kag ang Ginuong Dios naghambal sini; kag sa iya balaan nga ngalan ang pasidungog, gahum kag himaya subong kag sa wala’y katapusan. Amen.

37 Kag sa liwat, bilang kasugoan sa simbahan parte sa pamaagi sang bunyag—Ang tanan nga nagapaubos sang ila kaugalingon sa atubang sang Dios, kag nagahandum nga mabunyagan, kag nagakari nga may masinulub-on nga mga tagipusuon kag mahinulsulon nga mga espiritu, kag nagapakita sa simbahan nga matuod gid sila nga nagahinulsol sang tanan nila nga sala, kag handa sa pagdala sa ila kaugalingon sang ngalan ni Jesucristo nga may determinasyon sa pag-alagad sa iya tubtob sa katapusan, kag matuod nga magpakita paagi sa ila mga buhat nga nabaton nila ang Espiritu ni Cristo para sa kapatawaran sang ila mga sala, dapat batonon paagi sa bunyag sa iya simbahan.

38 Ang tulumanon sang mga elder, mga pari, mga manunudlo, mga deacono, kag mga miyembro sang simbahan ni Cristo—Ang apostoles isa ka elder, kag iya tawag ang pagbunyag;

39 Kag pag-ordin sing iban pa nga mga elder, mga pari, mga manunudlo, kag mga deacono;

40 Kag pagpakamaayo sang tinapay kag alak—ang mga simbolo sang unod kag dugo ni Cristo—

41 Kag pagkompirma sinang mabunyagan sa simbahan, paagi sa pagtakdong sang mga kamot para sa bunyag sang kalayo kag sang Balaan nga Espiritu, suno sa balaan nga mga kasulatan;

42 Kag pagtudlo, pagpaathag, paglaygay, pagbunyag, kag pagbantay sa mga miyembro sang simbahan;

43 Kag pagkompirma sang simbahan paagi sa pagtakdong sang mga kamot, kag paghatag sang Balaan nga Espiritu;

44 Kag pagpamuno sa tanan nga miting.

45 Ang mga elder dapat magpamuno sang mga miting samtang ginatuytuyan sila sang Balaan nga Espiritu suno sa mga kasugoan kag mga rebelasyon sang Dios.

46 Ang tulumanon sang pari amo ang pagwali, pagtudlo, pagpaathag, paglaygay, kag pagbunyag, kag pagpakamaayo kag pagpanagtag sang sakramento,

47 Kag pagbisita sa balay sang tagsa ka miyembro, kag paglaygay sa ila nga magpangamuyo sing mabaskog kag sing sekreto kag sa paghimo sang tanan nga tulumanon sa panimalay.

48 Kag mahimo man sia mag-ordin sing iban pa nga mga pari, mga manunudlo, kag mga deacono.

49 Kag dapat magpamuno sia sang mga miting kon wala sing nagatambong nga elder;

50 Apang kon may nagatambong nga elder, dapat magwali lamang sia, magtudlo, magpaathag, maglaygay, kag magbunyag,

51 Kag magbisita sa balay sang tagsa ka miyembro nga nagalaygay sa ila sa pagpangamuyo sing mabaskog kag sing sekreto kag maghimo sang tanan nga tulumanon sa panimalay.

52 Sa tanan sining mga tulumanon ang pari dapat magbulig sa elder kon kinahanglanon.

53 Ang tulumanon sang manunudlo amo ang pagbantay pirme sa mga miyembro sang simbahan, kag mag-upod kag magpabakod sa ila;

54 Kag siguroha nga wala sang kalainan sa simbahan, ukon paglainay sang buot, ukon pagbinutig, pagpanglibak, ukon paghambal sang malain;

55 Kag siguroha nga nagatipon pirme ang simbahan, kag siguroha man nga ang tanan nga miyembro nagahimo sang ila tulumanon.

56 Kag dapat magpamuno sia sang mga miting kon wala ang elder ukon pari—

57 Kag dapat buligan pirme sang mga deacono sa tanan sang iya mga tulumanon sa simbahan kon kinahanglanon.

58 Apang ang mga manunudlo ukon mga deacono wala sang awtoridad sa pagbunyag, pagpakamaayo sang sakramento, ukon pagtakdong sang mga kamot;

59 Apang, dapat sila magpaandam, magpaathag, maglaygay, kag magtudlo, kag mag-agda sa tanan nga magkari kay Cristo.

60 Ang tagsa ka elder, pari, manunudlo, ukon deacono dapat ordinan suno sa mga dulot kag mga tawag sang Dios sa iya sa pag-alagad; kag dapat ordinan sia paagi sa gahum sang Balaan nga Espiritu nga yara sa isa nga nagaordin sa iya.

61 Ang nagkalain-lain nga mga elder nga kalakip sining simbahan ni Cristo dapat magtipon sa komperensya isa ka beses sa tatlo ka bulan, ukon kon san-o nga nagakaigo nga imando ukon pilion sang amo nga mga komperensya;

62 Kag ang amo nga mga komperensya dapat magpatuman sang kon ano man nga mga buluhaton sa simbahan ang kinahanglan nga himuon sa sina nga tion.

63 Ang mga elder dapat magbaton sang ila mga lisensya halin sa iban nga mga elder, paagi sa boto sang mga miyembro sang simbahan sa diin sila kabahin, ukon halin sa mga komperensya.

64 Ang tagsa ka pari, manunudlo, ukon deacono nga ginaordinan sing isa ka pari, mahimo magbaton sing isa ka sertipiko halin sa iya sa sina nga tion sa diin ang amo nga sertipiko kon ipakita sa isa ka elder, magahatag sa iya sang deretso sa pag-angkon sang lisensya nga magaawtorisar sa iya sa paghikot sang mga tulumanon sang iya tawag sa pag-alagad, ukon mabaton niya ini halin sa komperensya.

65 Sa diin may yara sang sanga sang simbahan nga naorganisar sa husto nga paagi, wala sang tawo nga dapat ordinan sa bisan ano nga palangakoan sa sini nga simbahan nga wala sang boto sang mga yara sa sina nga simbahan;

66 Apang ang nagapangulo nga mga elder, nagabiyahe nga mga obispo, mga mataas nga konseho, mga mataas nga pari, kag mga elder, makaangkon sang pribilihiyo sa pag-ordin sa diin wala sang sanga sang simbahan nga mahimo magpatawag sang pagboto.

67 Ang tagsa ka pangulo sang mataas nga pagkapari (ukon nagapangulo nga elder), obispo, miyembro sang mataas nga konseho, kag mataas nga pari, dapat ordinan sa direksyon sing isa ka mataas nga konseho ukon pangkabilogan nga komperensya.

68 Ang tulumanon sang mga miyembro pagkatapos nga mabaton sila paagi sa bunyag—Ang mga elder ukon mga pari dapat may nagakaigo nga tion sa pagpaathag sang tanan nga butang parte sa simbahan ni Cristo sa panghangop sang mga miyembro, antes sa ila pag-ambit sang sakramento kag pagkompirma paagi sa pagtakdong sang mga kamot sang mga elder, agud nga ang tanan nga butang mahimo sa husto nga paagi.

69 Kag ang mga miyembro dapat magpakita sa atubang sang mga miyembro sang simbahan, kag amo man sa atubang sang mga elder, paagi sa diosnon nga pagginawi kag paghambal nga nagakaangay sila sa pag-ambit sini, agud nga ang ila mga buhat kag pagtuo mangin nagakasanto sa balaan nga mga kasulatan—nga nagalakat sa pagkabalaan sa atubang sang Ginuo.

70 Ang tagsa ka miyembro sang simbahan ni Cristo nga may mga kabataan dapat magdala sa ila sa mga elder nga dapat magtakdong sang ila mga kamot sa mga ini sa atubang sang mga miyembro sang simbahan sa ngalan ni Jesucristo, kag pakamaayohon sila sa iya ngalan.

71 Wala sing bisan sin-o nga mabaton sa simbahan ni Cristo luwas lang kon nakalab-ot sia sa edad sang pagkamay-salabton sa atubang sang Dios, kag sarang na nga maghinulsol.

72 Ang bunyag pagapatigayonon sa masunod nga paagi sa tanan nga nagahinulsol—

73 Ang tawo nga gintawag sang Dios kag may awtoridad halin kay Jesucristo sa pagbunyag, dapat magpanaog sa tubig upod ang tawo nga nagkadto agud bunyagan, kag magasiling nga ginatawag sia sa iya ngalan: Sa awtoridad nga ginhatag sa akon ni Jesucristo, ginabunyagan ko ikaw sa ngalan sang Amay, kag sang Anak, kag sang Balaan nga Espiritu. Amen.

74 Dayon itugmaw niya sia sa tubig, kag ipabutwa liwat halin sa tubig.

75 Kinahanglanon nga magtipon pirme ang simbahan sa pag-ambit sang tinapay kag bino bilang pagpanumdum sang Ginuong Jesus;

76 Kag ang elder ukon pari dapat magpakamaayo sini; kag sa sini nga paagi dapat pakamaayohon niya ini—magluhod sia upod sang mga miyembro sang simbahan kag magtawag sa Amay sa hugot nga pagpangamuyo nga nagasiling:

77 O Dios, ang Wala’y Katapusan nga Amay, nagapangabay kami sa imo sa ngalan sang imo Anak, nga si Jesucristo, sa pagpakamaayo kag pagpakabalaan sining tinapay sa mga kalag sang tanan sadtong magaambit sini, agud sila makakaon bilang pagpanumdum sang lawas sang imo Anak, kag magsaksi sa imo, O Dios, ang Wala’y Katapusan nga Amay, nga handa sila sa pagdala sa ila kaugalingon sang ngalan sang imo Anak, kag dalayon nga magdumdum sa iya kag magtuman sang iya mga kasugoan nga iya ginhatag sa ila; agud ila dalayon nga maangkon ang iya Espiritu sa pag-upod sa ila. Amen.

78 Ini ang paagi sa pagpakamaayo sang alak—dapat kuhaon niya man ang ilimnan, kag magsiling:

79 O Dios, ang Wala’y Katapusan nga Amay, nagapangabay kami sa imo sa ngalan sang imo Anak, nga si Jesucristo, sa pagpakamaayo kag pagpakabalaan sining bino sa mga kalag sang tanan sadtong magainom sini, agud ila ini mahimo bilang pagpanumdum sang dugo sang imo Anak, nga ginpaagay para sa ila; agud sila makasaksi sa imo, O Dios, ang Wala’y Katapusan nga Amay, nga ila sia dalayon nga ginadumdum, agud ila maangkon ang iya Espiritu sa pag-upod sa ila. Amen.

80 Ang bisan sin-o nga miyembro sang simbahan ni Cristo nga nagalapas, ukon masapwan nga nakasala, dapat pamatbatan suno sa mando sang balaan nga mga kasulatan.

81 Mangin tulumanon sang nagkalain-lain nga mga simbahan nga kalakip sang simbahan ni Cristo ang pagpadala sing isa ukon sobra pa nga mga manunudlo sa pagtambong sa nagkalain-lain nga mga komperensya nga pagahiwaton sang mga elder sang simbahan,

82 Upod ang listahan sang mga ngalan sing pila ka mga miyembro nga nagpabunyag sa simbahan humalin sang nagligad nga komperensya; ukon ipadala ang listahan paagi sa pila ka mga pari; agud nga isa ka listahan sang tanan nga ngalan sang mga miyembro sang bilog nga simbahan matago sa isa ka libro sing isa sang mga elder nga pilion sing iban nga elder kon san-o nga nagakaigo;

83 Kag amo man, kon may bisan sin-o nga ginpagwa sa simbahan, agud nga ang ila ngalan mapanas halin sa listahan sang mga ngalan sa pangkabilogan nga simbahan.

84 Ang tanan nga miyembro nga magabiya sa simbahan sa diin sila nagapuyo, kon magsaylo sa isa ka simbahan nga indi sila kilala, mahimo magdala sang sulat nga nagapamatuod nga aktibo kag maayo sila nga mga miyembro, nga ang amo nga sertipiko mahimo nga pirmahan sing bisan sin-o nga elder ukon pari kon ang miyembro nga magabaton sang sulat personal nga nakakilala sa elder ukon priest, ukon mahimo man ini pirmahan sang mga manunudlo ukon mga deacono sang simbahan.