Seksyon 25
Rebelasyon nga ginhatag paagi kay Joseph Smith nga Propeta, sa Harmony, Pennsylvania, sang Hulyo 1830 (tan-awa sa introduksyon sang seksyon 24). Ini nga rebelasyon nagapahayag sang pagbuot sang Ginuo kay Emma Smith nga asawa sang Propeta.
1–6, Si Emma Smith nga isa ka pinili nga babayi gintawag sa pagbulig kag pagpasulhay sang iya bana; 7–11, Gintawag man sia sa pagsulat, sa pagpaathag sang balaan nga mga kasulatan, kag sa pagpili sang mga himno; 12–14, Ang ambahanon sang mga matarong pangamuyo sa Ginuo; 15–16, Ang mga prinsipyo sang pagtuman sa sining rebelasyon nagakadapat sa tanan.
1 Dungga ang tingug sang Ginuo nga imo Dios, samtang nagahambal ako sa imo, Emma Smith, anak ko, kay sa pagkamatuod ginasiling ko sa imo, ang tanan nga nagabaton sang akon ebanghelyo mga anak nga lalaki kag mga anak nga babayi sa akon ginharian.
2 Ang rebelasyon ginahatag ko sa imo parte sa akon pagbuot; kag kon matutum ka kag maglakat sa mga banas sang pagkamatarong sa akon atubang, amligan ko ang imo kabuhi, kag magabaton ka sang palanublion sa Sion.
3 Tan-awa, napatawad na ang imo mga sala, kag ikaw isa ka pinili nga babayi nga akon gintawag.
4 Indi magkumod bangod sang mga butang nga wala mo makita kay ang mga ini ginadumili sa imo kag sa kalibutan, nga kinaalam para sa akon sa palaabuton nga tion.
5 Kag ang palangakoan sang imo tawag amo ang pagpasulhay sang akon alagad nga si Joseph Smith Jr. nga imo bana, sa iya mga pag-antos paagi sa makapasulhay nga mga pulong, sa espiritu sang kalulo.
6 Kag mag-upod ka sa iya sa iya paglakat, kag mangin isa ka tagsulat sa iya samtang wala pa sia sang tagsulat agud nga mapadala ko ang akon alagad nga si Oliver Cowdery kon sa diin man nga luyag ko.
7 Kag pagaordinan ka sa idalom sang iya kamot sa pagpaathag sang balaan nga mga kasulatan, kag sa paglaygay sang simbahan suno sa ihatag sa imo sang akon Espiritu.
8 Kay itakdong niya ang iya mga kamot sa imo, kag pagabatonon mo ang Balaan nga Espiritu, kag ihatag mo ang imo tion sa pagsulat, kag sa pagtuon sing madamo.
9 Kag indi ka kinahanglan nga magkahadlok kay ang imo bana magasuporta sa imo sa simbahan; kay ang iya tawag para sa pag-alagad sa ila agud nga ang tanan nga butang mapahayag sa ila, kon ano man ang akon pagbuot suno sa ila pagtuo.
10 Kag sa pagkamatuod ginasiling ko sa imo nga ipahigad mo ang mga butang sining kalibutan, kag pangitaon ang mga butang sang mas maayo nga kalibutan.
11 Kag ihatag man sa imo ang responsibilidad nga magpili sang sagrado nga mga himno suno sa ipabutyag sa imo nga makapahamuot sa akon agud gamiton sa akon simbahan.
12 Kay ang akon kalag nagakalipay sa ambahanon sang tagipusuon; huo, ang ambahanon sang matarong pangamuyo sa akon, kag pagasabton ini nga may pagpakamaayo sa ila mga ulo.
13 Karon, ibayaw ang imo tagipusuon kag magkasadya, kag magtuman sang mga kasugtanan nga imo ginhimo.
14 Magpadayon sa espiritu sang kalulo, kag mag-andam sa bugal. Papangalipaya ang imo kalag sa imo bana, kag sa himaya nga magaabot sa iya.
15 Magtuman sang akon mga kasugoan sing dalayon, kag ang korona sang pagkamatarong mabaton mo. Kag luwas lang kon himuon mo ini, kon diin ako indi ka makakadto.
16 Kag sa pagkamatuod, sa pagkamatuod, ginasiling ko sa imo nga ini ang akon tingug sa tanan. Amen.