1 Magpamati sa tingug ni Jesucristo nga inyo Manunubos, ang Dakong Jehova, nga ang iya butkon sang kaluoy nagbayad sang inyo mga sala;

2 Nga magatipon sang iya katawhan pareho sa munga nga nagatipon sang iya mga piso sa idalom sang iya mga pakpak, bisan pa ang tanan nga magapamati sa akon tingug kag magapaubos sang ila mga kaugalingon sa akon atubang, kag magatawag sa akon sa hugot nga pangamuyo.

3 Tan-awa, sa pagkamatuod, sa pagkamatuod, ginasiling ko sa inyo nga sa sini nga tion napatawad na ang inyo mga sala gani, nagabaton kamo sining mga butang; apang dumduma nga indi na magpakasala pa kay basi may malain nga matabo sa inyo.

4 Sa pagkamatuod, ginasiling ko sa inyo nga ginpili kamo agud mangin akon katawhan sa pagpahayag sang akon ebanghelyo nga may tunog sang pagsinadya, pareho sa tingug sang trumpeta.

5 Ibayaw ang inyo mga tagipusuon kag magkalipay kay yara ako sa tunga ninyo, kag ako ang inyo mananabang sa Amay, kag nahamut-an niya ang paghatag sa inyo sang ginharian.

6 Kag, suno sa nasulat—Kon ano man ang inyo pangayuon sa pagtuo, nga nagaisa sa pagpangamuyo suno sa akon sugo, pagabatonon ninyo.

7 Kag gintawag kamo sa pagpahanabo sang pagtipon sang akon mga pinili; kay ang akon mga pinili nagapamati sa akon tingug kag wala nagapatig-a sang ila mga tagipusuon;

8 Karon, ang mando naghalin sa Amay nga pagatiponon sila sa isa ka lugar sa ibabaw sining duta, agud ihanda ang ila mga tagipusuon kag mangin handa sa tanan nga butang batok sa adlaw sa diin ang pag-antos kag kahalitan ipahanabo sa malain nga mga tawo.

9 Kay ang oras malapit na kag ang adlaw nagapadulong na sa diin ang duta luto na; kag ang tanan nga bugalon kag inang mga nagahimo sang malain mangin pareho sa ginaraban; kag pagasunogon ko sila, siling sang Ginuo sang mga Kasoldadohan, sa bagay nga ang mga malain mawala sa duta;

10 Kay ang oras malapit na, kag inang ginpahayag sang akon mga apostoles kinahanglan matuman; kay ining mga butang matabo suno sa ginpahayag nila;

11 Kay ipakita ko ang akon kaugalingon halin sa langit upod ang gahum kag dako nga himaya, upod ang tanan nga kasoldadohan sini, kag magpuyo sa pagkamatarong upod sa mga tawo sa duta sing isa ka libo ka tuig, kag ang mga malain indi makapabilin.

12 Kag sa liwat, sa pagkamatuod, sa pagkamatuod, ginasiling ko sa inyo, kag ginpahayag ini sa isa ka malig-on nga mando sa pagbuot sang Amay nga ang akon mga apostoles, ang Dose nga nakaupod ko sa akon pag-alagad sa Jerusalem magatindog sa akon tuo nayon nga kamot sa adlaw sang akon pagkari sa haligi nga kalayo nga nagasul-ob sang mga panapton sang pagkamatarong, nga may mga korona sa ila mga ulo, sa himaya pareho sa akon, agud hukman ang bilog nga panimalay ni Israel, bisan pa ang tanan nga naghigugma sa akon kag nagtuman sang akon mga kasugoan, kag wala na sing iban pa.

13 Kay magatunog ang trumpeta sing malawig kag mabaskog, pareho sang sa Bukid nga Sinai, kag ang bilog nga duta magalinog, kag mabanhaw sila—huo, bisan pa ang mga namatay nga nangin tampad sa akon, agud magbaton sang korona sang pagkamatarong, kag masul-oban pareho sa akon, agud nga makaupod ako, agud nga mangin isa kami.

14 Apang, tan-awa, ginasiling ko sa inyo nga antes ining dako nga adlaw mag-abot, ang adlaw magabaylo sa kadulom, kag ang bulan sa dugo, kag ang mga bituon magakalataktak halin sa langit, kag may mga mas makatilingalahan pa nga mga tanda sa langit sa ibabaw kag sa duta sa idalom;

15 Kag may mga paghibi kag pagnguyngoy sa tunga sing madamo nga katawhan;

16 Kag may dako nga unos sang yelo nga igapadala agud gub-on ang mga katamnan sang duta.

17 Kag matabo ini nga bangod sang kalainan sang kalibutan magatimalus ako sa mga malain kay indi sila maghinulsol; kay ang ilimnan sang akon kaakig puno na; kay tan-awa, ang akon dugo indi magtinlo sa ila kon indi sila magpamati sa akon.

18 Gani, ako nga Ginuong Dios magapadala sang mga langaw sa ibabaw sang duta nga magadapo sa mga pumuluyo sini, kag magakaon sang ila unod, kag ang mga ulod magaut-ot sa ila;

19 Kag ang ila mga dila punggan agud nga indi sila makahambal batok sa akon; kag ang ila unod magakalataktak halin sa ila mga tul-an, kag ang ila mga mata halin sa ila sini mga balayan;

20 Kag matabo ini nga ang mga kasapatan sang lasang kag ang mga kapispisan sang kahanginan magalamon sa ila.

21 Kag ang gamhanan kag makangilil-ad nga simbahan nga amo ang makihilawason sang bilog nga duta pagagub-on sang nagapanglamon nga kalayo suno sa ginhambal sang baba ni Ezequiel nga propeta nga naghambal sining mga butang nga wala pa natabo, apang pat-od gid nga matabo, sa amo man nga nagakabuhi ako kay ang mga kangil-aran indi magpadayon.

22 Kag sa liwat, sa pagkamatuod, sa pagkamatuod, ginasiling ko sa inyo nga kon ang isa ka libo ka tuig matapos na, kag ang mga tawo sa liwat magsugod sa pagpanghiwala sa ila Dios, magapakita ako sang kaluoy sa duta sa malip-ot lamang nga tion;

23 Kag ang katapusan magaabot, kag ang langit kag ang duta magakalapugday kag magataliwan, kag mangin may bag-o nga langit kag bag-o nga duta.

24 Kay ang tanan nga daan nga mga butang magataliwan, kag ang tanan nga butang mangin bag-o, bisan pa ang langit kag ang duta, kag ang tanan nga kapunoan sini, mga tawo pati mga kasapatan, mga kapispisan sang kahanginan, kag mga kaisdaan sang dagat;

25 Kag wala sing isa ka buhok ni puling sa mata ang madula kay hinimo ini sang akon kamot.

26 Apang, tan-awa, sa pagkamatuod ginasiling ko sa inyo, antes magtaliwan ang duta, si Miguel, akon arkanghel magapatunog sang iya trumpeta, kag ang tanan nga minatay magabangon dayon kay ang ila mga lulubngan pagabuksan, kag mabanhaw sila—huo, bisan pa ang tanan-tanan.

27 Kag ang mga matarong pagatiponon sa akon tuo nayon nga kamot sa kabuhi nga wala’y katapusan; ang mga malain sa akon wala nayon nga kamot igakahuya ko nga angkonon bilang akon katawhan sa atubang sang Amay;

28 Gani, magasiling ako sa ila—Palayo kamo sa akon, kamo nga ginsumpa, sa kalayo nga wala’y katubtuban nga ginhanda para sa yawa kag sa iya mga anghel.

29 Kag karon, tan-awa, ginasiling ko sa inyo, wala pa gid sing bisan san-o nga ginpahayag ko halin sa akon kaugalingon nga baba nga dapat magbalik sila kay indi sila makakadto kon diin ako kay wala sila sang gahum.

30 Apang dumduma nga ang tanan ko nga paghukom wala ginahatag sa katawhan: kag sa naggwa nga mga pulong halin sa akon baba gani ang mga ini pagatumanon, nga ang nauna maulihi kag ang naulihi mauna, parte sa tanan nga butang nga akon gintuga paagi sa akon pulong nga gamhanan nga amo ang gahum sang akon Espiritu.

31 Kay paagi sa gahum sang akon Espiritu gintuga ko ang mga ini; huo, ang tanan nga butang nga espirituhanon kag dutan-on—

32 Una espirituhanon, ika-duha dutan-on, nga amo ang paagi nga ginsugdan ko ang akon buluhaton; kag sa liwat, una dutan-on, kag ika-duha espirituhanon nga amo ang paagi nga tapuson ko ang akon buluhaton—

33 Ginasugiran ko kamo sini agud nga mahapos ninyo mahangpan; apang sa akon kaugalingon ang akon mga buluhaton wala sang katapusan ukon ginsuguran; apang ginahatag ini sa inyo agud nga mahangpan ninyo bangod ginpangayo ninyo ini sa akon kag nag-ugyon kamo.

34 Karon, sa pagkamatuod ginasiling ko sa inyo nga ang tanan nga butang espirituhanon sa akon, kag wala bisan san-o nga ginhatagan ko kamo sang layi nga dutan-on; wala sa bisan sin-o nga tawo, ukon mga anak sang katawhan; ukon kay Adan nga inyo amay nga akon gintuga.

35 Tan-awa, ginhatag ko sa iya ang ikasarang nga mangin hilway sa pagpili; kag ginhatag ko sa iya ang kasugoan apang wala ako naghatag sa iya sang dutan-on nga kasugoan kay ang akon mga kasugoan espirituhanon; ang mga ini indi pisikal ukon dutan-on, kag indi man dutan-on ukon lawasnon.

36 Kag natabo ini nga si Adan, bangod gintentar sia sang yawa—kay tan-awa, ang yawa nangin antes pa kay Adan kay nagrebelde sia batok sa akon nga nagasiling, Ihatag sa akon ang imo pasidungog, nga amo ang akon gahum; kag ginsugyot niya ang ikatlo nga bahin sang kasoldadohan sang langit nga magtalikod sa akon bangod sang ila kahilwayan sa pagpili;

37 Kag gindap-ong sila paidalom, kag gani nagluntad ang yawa kag iya mga anghel;

38 Kag, tan-awa, may yara sang lugar nga ginhanda para sa ila halin sa ginsuguran nga ang amo nga lugar impiyerno.

39 Kag kinahanglanon nga ang yawa magtentar sa mga anak sang katawhan, ukon indi sila mahimo nga mangin hilway sa pagpili; kay kon wala gid nila maagihan ang kapait indi nila mahibaloan ang katam-is—

40 Gani, natabo ini nga gintentar sang yawa si Adan, kag nag-ambit sia sang ginadilian nga bunga kag naglapas sang kasugoan sa diin nagpaidalom sia sa kabubut-on sang yawa bangod nagpadaug sia sa tentasyon.

41 Gani ako, nga Ginuong Dios, nagtabog sa iya halin sa Hardin sang Eden, halin sa akon presensya bangod sa iya paglapas sa diin napatay sia sing espirituhanon nga amo ang una nga kamatayon, bisan pa inang amo man nga kamatayon nga amo ang katapusan nga kamatayon nga espirituhanon, nga igapahayag sa mga malain kon magsiling ako: Palayo kamo sa akon, kamo nga ginsumpa.

42 Apang, tan-awa, ginasiling ko sa inyo nga ako, nga Ginuong Dios, naghatag kay Adan kag sa iya kaliwatan, nga indi sila mapatay sing dutan-on nga kamatayon tubtob nga ako, nga Ginuong Dios, makapadala sang mga anghel sa pagpahayag sa ila sang paghinulsol kag pagtubos paagi sa pagtuo sa ngalan sang akon Bugtong nga Anak.

43 Kag gani ako, nga Ginuong Dios, naghatag sa katawhan sang mga adlaw sang iya pagtilaw—agud nga paagi sa iya pisikal nga kamatayon mabanhaw sia sa pagkawala’y kamatayon padulong sa kabuhi nga wala’y katapusan, bisan pa ang tanan nga magapati;

44 Kag inang wala nagatuo mabanhaw sa pagkawala’y kamatayon padulong sa wala’y katapusan nga silot; kay indi sila matubos halin sa ila espirituhanon nga pagkahulog bangod wala sila nagahinulsol;

45 Kay luyag nila ang kadulom sangsa kasanag, kag malain ang ila mga kahimoan, kag nagabaton sila sang mga bayad sang kon sin-o ang ila ginapili nga tumanon.

46 Apang tan-awa, ginasiling ko sa inyo nga ang magagmay nga kabataan natubos na halin pa sa pagtuga sang kalibutan paagi sa akon Bugtong nga Anak;

47 Gani, indi sila makasala kay wala ginhatag ang gahum kay Satanas sa pagtentar sang magagmay nga kabataan tubtob nga magsugod sila nga mangin may salabton sa akon atubang;

48 Kay ginhatag sa ila suno sa akon pagbuot, suno sa akon kaugalingon nga kaluyag nga ang dalagko nga mga butang pangayuon sa kamot sang ila mga amay.

49 Kag sa liwat ginasiling ko sa inyo nga kon sin-o man ang may ihibalo, wala ko bala ginsugo nga maghinulsol?

50 Kag sia nga wala nakahangop, nagapabilin sa akon ang gahum sa paghimo suno sa sinang nasulat. Kag karon wala na ako sing ipahayag pa sa inyo sa sini nga tion. Amen.