Seksyon 30
Rebelasyon nga ginhatag paagi kay Joseph Smith nga Propeta kanday David Whitmer, Peter Whitmer Jr., kag John Whitmer, sa Fayette, New York sang Septyembre 1830 pagkatapos sang tatlo ka adlaw nga komperensya sa Fayette, apang antes nagbulagay ang mga elder sang Simbahan. Orihinal nga ginbantala ining materyal bilang tatlo ka rebelasyon; gintingob ini sa isa ka seksyon sang Propeta para sa 1835 nga edisyon sang Doktrina kag mga Kasugtanan.
1–4, Si David Whitmer ginpinahan kay napaslawan sia sa pag-alagad sing matutum, 5–8, Pagaupdan ni Peter Whitmer Jr. si Oliver Cowdery sa isa ka misyon sa mga Lamanhon; 9–11, Si John Whitmer gintawag sa pagwali sang ebanghelyo.
1 Tan-awa, ginasiling ko sa imo David nga ginkahadlokan mo ang tawo kag wala ka nagsalig sa akon para sa kusog nga dapat mo ginhimo.
2 Apang ang imo hunahuna yara sa mga butang sang kalibutan sing labi pa sangsa mga butang nakon nga imo Tagtuga, kag ang pag-alagad sa diin gintawag ikaw; kag wala ka nagpamati sa akon Espiritu, kag sa sinang mga nagapamuno sa imo, kundi napapati sang sinang mga wala ko ginsugo.
3 Gani, ginpabay-an ka sa pagpamangkot sa akon, kag sa pagbinag-binag sang mga butang nga imo nabaton.
4 Kag magpuyo ka sa balay sang imo amay tubtob nga hatagan ko ikaw sing dugang nga mga kasugoan. Kag ihatag mo ang imo pag-alagad sa simbahan, kag sa kalibutan, kag sa mga rehiyon sa palibot. Amen.
5 Tan-awa, ginasiling ko sa imo Peter nga magpanglakaton ka upod sa imo utod (sa simbahan) nga si Oliver; kay ang tion nag-abot na nga nagakaigo para sa akon nga buksan mo ang imo baba agud nga ipahayag ang akon ebanghelyo; gani, indi magkahadlok kundi magpamati sa mga pulong kag laygay sang imo utod, nga ihatag niya sa imo.
6 Kag mag-upod sa tanan sang iya mga pag-antos nga ginabayaw ang imo tagipusuon sa akon sa pangamuyo kag pagtuo agud nga maamligan kamo nga duha; kay ginhatagan ko sia sang ikasarang sa pagpauswag sang akon simbahan sa tunga sang mga Lamanhon;
7 Kag wala ako sing may ginpili nga mangin manuglaygay niya nga magdumala sa iya sa simbahan parte sa mga butang sang simbahan magluwas sa iya utod (sa simbahan) nga si Joseph Smith Jr.
8 Karon, magpamati sa sining mga butang kag mangin matutum sa pagtuman sang akon mga kasugoan, kag pagabugayan ka sang kabuhi nga wala’y katapusan. Amen.
9 Tan-awa, ginasiling ko sa imo John, alagad ko, nga sugod subong ibantala mo ang akon ebanghelyo pareho sa tingug sang trumpeta.
10 Kag magpangabudlay ka sa ginapuy-an sang imo utod (sa simbahan) nga si Philip Burroughs, kag sa mga rehiyon sa palibot sina, huo, kon sa diin man nga may mamati sa imo tubtob nga suguon ko ikaw nga maghalin sa sini nga lugar.
11 Kag magpangabudlay ka sing lubos para sa Sion sa bug-os mo nga kalag sugod subong; huo, buksan mo pirme ang imo baba bilang pagsuporta sang akon buluhaton nga wala nagakahadlok kon ano ang mahimo sang tawo kay kaupod mo ako. Amen.