Seksyon 31
Rebelasyon nga ginhatag paagi kay Joseph Smith nga Propeta kay Thomas B. Marsh sang Septyembre 1830. Ang tion pagkatapos gilayon sing isa ka komperensya sang Simbahan (tan-awa sa introduksyon sang seksyon 30). Si Thomas B. Marsh ginbunyagan sa pagsugod sang sina nga bulan kag gin-ordinan nga isa ka elder sa Simbahan antes ginhatag ining rebelasyon.
1–6, Si Thomas B. Marsh gintawag sa pagwali sang ebanghelyo kag ginpasalig sang kaayohan sang iya panimalay; 7–13, Ginlaygayan sia nga magpaumod, magpangamuyo pirme, kag magsunod sa Manugpasulhay.
1 Thomas, anak ko, bulahan ka bangod sa imo pagtuo sa akon buluhaton.
2 Tan-awa, nag-angkon ka sing madamo nga pag-antos bangod sang imo panimalay; apang pakamaayohon ko ikaw kag ang imo panimalay, huo, ang imo mga kabataan; kag magaabot ang adlaw nga magapati sila kag makahibalo sang kamatuoran kag mangin isa sa imo sa akon simbahan.
3 Ibayaw ang imo tagipusuon kag magkasadya kay ang oras sang imo misyon nag-abot na; kag ang imo dila pagalugakan, kag igapahayag mo ang maayong balita sang dako nga kalipay sa sining henerasyon.
4 Ipahayag mo ang mga butang nga ginpahayag sa akon alagad nga si Joseph Smith Jr. Magwali ka sugod subong, huo, sa pag-ani sang uma nga puti na para sunogon.
5 Gani, iduso ang imo garab sa imo bug-os nga kalag, kag mapatawad na ang imo mga sala, kag magaani ka sang binugkos kay ang nagapangabudlay nagakaangay sang suhol. Karon, mabuhi ang imo panimalay.
6 Tan-awa, sa pagkamatuod ginasiling ko sa imo, bayai sila sa malip-ot lamang nga tion, kag ipahayag ang akon pulong, kag magahanda ako sang lugar para sa ila.
7 Huo, pagabuksan ko ang mga tagipusuon sang mga tawo, kag pagabatonon ka nila. Kag ipahamtang ko ang simbahan paagi sa imo kamot;
8 Kag pabakuron mo sila kag ihanda sila para sa tion nga pagatiponon sila.
9 Magpadayon sa pihak sang mga pag-antos, indi magpasipala batok sinang mga mapasipalahon. Dumalahi ang imo panimalay nga malulo, kag mangin malig-on kag matutum.
10 Tan-awa, ginasiling ko sa imo nga mangin manugbulong ka para sa simbahan, apang indi para sa kalibutan kay indi ka nila pagbatonon.
11 Maglakat kon sa diin man luyag ko nga imo kadtoan, kag ipahayag sa imo sang Manugpasulhay kon ano ang imo himuon kag kon diin ka makadto.
12 Magpangamuyo pirme agud nga indi ka magsulod sa tentasyon kag indi mo madula ang imo padya.
13 Mangin tampad tubtob sa katapusan, kag yari karon, kaupod mo ako. Ini nga mga pulong indi halin sa tawo ukon sa katawhan, kundi halin sa akon nga si Jesucristo nga inyo Manunubos, paagi sa pagbuot sang Amay. Amen.