Ɔfã 32
Nyikyerɛ a wɔnam Joseph Smith Nkɔnhyɛnyi no do dze maa Parley P. Pratt na Ziba Peterson, wɔ Manchester, New York, Ɔbɛsɛ, 1830 ahyɛse no. Elderfo no nyaa enyigye na pɛ kɛse bi wɔ Lamanfo no hɔn nhyira a ɔbɛba hɔn do a Asɔr no ehu ho asɛm wɔ Mormon Nwoma mu no ho. Ɔnam dɛm ntsi, wɔtotɔee serɛɛ dɛ Ewuradze nkyerɛ Ne pɛ sɛ wɔnsoma Elderfo no wɔ dɛm aber no ma wɔnkɔ Indiafo ebusuakuw no a wɔwɔ Anee apaamu hɔ no hɔ. Nyikyerɛ kãa do.
1–3, Wɔfrɛ Parley P. Pratt na Ziba Peterson dɛ wɔnkɛkã asɛmpa no nkyerɛ Lamanfo no na wɔnkɛkã Oliver Cowdery na Peter Whitmer Kakraba ho; 4–5, Ɔwɔ dɛ wɔbɔ mpaa ama wɔaatse kyerɛwsɛm no ase.
1 Na afei ɔfa m’akowaa Parley P. Pratt ho no, hwɛ, mese no dɛ ampaara dɛ metse ase yi, mebɛpɛ dɛ ɔbɔbɔ m’asɛmpa no dawur na osũa me, na ɔdwe, na ɔyɛ botoo wɔ akoma mu.
2 Na dza medze hyɛ ne nsa nye dɛ ɔnye mo nkowaa Oliver Cowdery na Peter Whitmer, Kakraba, nkɔ Lamanfo no mu wɔ sar no do.
3 Na Ziba Peterson so nye hɔn bɔkɔ; na emi mara so menye hɔn bɔkɔ na mebɛtsena hɔn finimfin, na emi nye hɔn dzimafo wɔ Egya n’enyim, na biribiara nnkotum esiw hɔn kwan.
4 Na wobedzi dza wɔakyerɛw no do, na mma wɔnnkyerɛ dɛ wɔwɔ nyikyerɛ fofor biara, na wɔmbɔ mpaa dabaa ama maama woeebue no ho ntseasee.
5 Na wobetsie dɛm nsɛm yinom na wonnkobu no tootooba, na mibehyira hɔn. Amen.