Wase 34
Na veika sa vakatakilai vei Josefa Simici na Parofita me tukuni vei Osoni Pereta mai Feieti e Niu Ioka, ena 4 ni Noveba 1830. E sa qai yabaki 19 tiko ena gauna ko ya ko Baraca Pereta. A saumaki ka papitaiso sara ena imatai ni nona rogoca na vunautaki ni kosipeli sa vakalesui mai, mai vei Pali P. Pereta na tuakana, ena ono na macawa yani ki liu. A ciqomi kina na ivakatakila oqo ena vale nei Pita Witima Levu.
1–4, Era sa yaco me luve ni Kalou ko ira na tamata yalodina ena vuku ni Veisorovaki; 5–9, Na vunautaki ni kosipeli e caramaka na sala me baleta na iKarua ni Lako Mai; 10–12, Sa yaco na parofisai ena kaukauwa ni Yalo Tabu.
1 I Osoni na luvequ, mo vakatudaliga ka rogoca ka raica na veika au na tukuna vei iko, koi Au, na Turaga na Kalou, io ko Jisu Karisito na nomu Dauveivueti;
2 Io na rarama kei na vu-ni-bula e vuravura, e dua na rarama ka cilava yani na butobuto, ia na butobuto sa sega ni kunea;
3 O koya ka sa rui lomana vakalevu na vuravura me solia kina na nona bula, me ra yaco rawa kina ko ira era vakabauta me ra luve ni Kalou. A ka oqo ko sa yaco kina mo luvequ;
4 Ia ko sa kalougata kina ni ko sa vakabauta;
5 Ia ko sa kalougata vakalevu cake, niu sa lesi iko mo vunautaka yani na noqu kosipeli—
6 Mo tabalaka cake na domomu me vaka na davui, me balavu ka rogo levu, io mo vunauci ira na itabatamata talaidredre ka yalo vakatani oqo me ra veivutuni, io mo caramaka na sala ni nona lako tale mai na Turaga.
7 Ia raica, e dina, e dina, au sa kaya vei iko, sa voleka sara na gauna me’u na lako mai kina ena o, ena kaukauwa kei na lagilagi cecere.
8 Ia ena dua na siga levu ka bibi na siga au sa lako mai kina, ni na yavavala na veivanua kecega.
9 Ia ni sa bera ni yaco na siga sa levu ko ya, ena vakabutobutotaki na matanisiga, ka vuki na vula me dra; ena bese ni cila mai na kalokalo ka so ena lutu mai, io sa wawa tu na veivakarusai me tau vei ira na tamata dau caka ca.
10 Ia mo tabalaka cake na domomu ka kakua ni rere, ni sa vakaroti iko na Turaga na Kalou; o koya mo parofisai, ka na qai soli yani na veika mo parofisaitaka ena kaukauwa ni Yalo Tabu.
11 Ia kevaka ko sa yalodina, raica, au na tiko ga kei iko me yacova na noqu lesu tale mai—
12 Ia e dina, e dina, au sa kaya vei iko, au na lako vakidacala mai. Ia koi Au na Turaga na nomu Dauveivueti. Ia ena yaco vakakina. Emeni.