Seksyon 37
Rebelasyon nga ginhatag kanday Joseph Smith nga Propeta kag Sidney Rigdon malapit sa Fayette, New York sang Disyembre 1830. Ginhatag sa sini nga rebelasyon ang una nga kasugoan parte sa pagtipon sang mga miyembro sang Simbahan sa sining dispensasyon.
1–4, Ang mga Santos gintawag nga magtipon sa Ohio.
1 Tan-awa, ginasiling ko sa inyo nga indi nagakaigo para sa akon sa subong nga magpadayon kamo sa paglubad tubtob nga maglakat kamo sa Ohio, kag ini bangod sang kaaway kag para sa inyo kaayohan.
2 Kag sa liwat, ginasiling ko sa inyo nga indi kamo maglakat tubtob nga nawali ninyo ang akon ebanghelyo sa mga lugar sa New York, kag napabakod gid ang simbahan kon sa diin man ini nahamtang, kag ilabi na sa Colesville; kay tan-awa, nagapangamuyo sila sa akon nga may dako nga pagtuo.
3 Kag sa liwat, isa ka kasugoan ginahatag ko sa simbahan nga nagakaigo para sa akon nga magtipon sila sa Ohio sa paghanda sa tion nga magbalik sa ila ang akon alagad nga si Oliver Cowdery.
4 Tan-awa, yari ang kaalam, kag tugoti ang tagsa ka tawo nga magpili para sa iya kaugalingon tubtob nga magkari ako. Kag gani amo sini. Amen.