1 A sa kaya vakaoqo na Turaga na nomudou Kalou, ko Jisu Karisito, O Koya sa Bula ka Cecere Sara, na Alifa kei na Omeka na ivakatekivu kei na ivakataotioti, ko koya ga sa raica tu mai na raraba ni gauna tawamudu, kei ira na serafimi e vuqa ni lomalagi, ni se bera ni buli ko vuravura;

2 Ko koya sa kila na ka kecega, ni sa tu e mataqu na ka kecega;

3 Koi au ga ka a vosa, ka sa buli kina ko vuravura, sa yaco mai na ka kecega mai vei au.

4 Sai au ga sa kauta tani na Saioni nei Inoki ki lomaserequ; kau sa kaya vakaidina, ko ira kecega era sa vakabauta na yacaqu, ni koi Au na Karisito, ia ena yacaqu ga, ena vuku ni dra au sa liviraka oti, au sa vakatakekere kina vei Tamaqu ena vukudra.

5 Ia raica, ko ira sa ivalavala ca, au sa vesuki ira ena sinucodo ni butobuto me yacova na siga levu ni veilewai, ka na yaco ena ivakataotioti kei vuravura;

6 Io era na vesuki tu ko ira sa ivalavala ca, io ko ira sa sega ni vakabauta na domoqu ka vakaukauwataka na lomadra, raica ena ca, ena ca, ena ca, na nodra vakarusai.

7 Ia raica, e dina, e dina au sa kaya vei kemudou ni sa vakaraici kemudou tiko na mataqu. Au sa tiko maliwai kemudou ga ka dou sa sega ni raici au rawa;

8 Ia ena yaco kusarawa mai na siga dou na raici au kina, ka kila ni sai Au; ni na cereki tani na ilati butobuto, ia ko ira sa sega ni vakasavasavataki, era na sega ni tu rawa ena siga ko ya.

9 Ia dou vakadreta na ivau ni tolomudou ka tu vakarau. Raica sa soli me nomudou na matanitu, ia ena sega ni rawai kemudou na meca.

10 Au sa kaya vakaidina vei kemudou, dou sa savasava, ia dou sa sega ni savasava taucoko sara; ka sa sega tale e dua meu taleitaka vakalevu cake;

11 Ni sa ca kecega na tamata e mataqu; ka sa roboti vuravura na kaukauwa ni butobuto, ena kedra maliwa na luve ni tamata, e matadra na lewei lomalagi kecega—

12 Ka sa vakavuna me vakanomodi na ka kecega ka sa rarawa kecega na veigauna tawamudu, era sa waraka tu na agilosi na ivakaro cecere me tamusuki sobu ko vuravura, me kumuni vata na ka ca me ra vakamai; ia, raica, era sa cokovata mai na meca.

13 Ia oqo au sa na tukuna vei kemudou e dua na ka vuni, e dua na ka ka bosei mai ena dua na vanua vuni, me vakavuna na nomudou vakarusai ena dua na gauna lekaleka oqo, ia dou sega tiko ni kila;

14 Ia oqo au sa tukuna vei kemudou, ka dou sa kalougata kina, sega ni baleta na nomudou caka cala, sega talega ni baleta na yalomudou tawavakabauta; ni sa dina sara ni so vei kemudou era sa kila tu na nodra cala e mataqu, ia au na vosoti kemudou ena vuku ni nomudou malumalumu.

15 O koya, mo dou qaqa me tekivu oqo ka lako yani; dou kakua ni rere, ni sa nomudou na matanitu.

16 Ia me baleta na nomudou vakabulai au sa solia kina vei kemudou e dua na ivakaro, niu sa rogoca na nomudou masu, ko ira na dravudravua era sa vosakudrukudru vei au, ko ira na vutuniyau au sa vakayacora me ra vakakina, kau sa lewa na ka bula kecega, niu sa dau nanumi ira vakatautauvata na tamata kecega.

17 Au sa vakavutuniyautaki vuravura, ia raica oqori na itutu ni yavaqu, ia au na lako mai meu mai tu tale kina.

18 Kau sa dulaka tu ka lomasoli meu solia vei kemudou na iyau e cecere cake, io e dua na vanua yalataki, na vanua sa dave kina na sucu kei na oni, io ena sega ni tau kina na cudru ni Turaga ena gauna sa lesu tale mai kina;

19 Kau na solia vei kemudou na vanua me nomudou ivotavota vakawa, kevaka ko na vakasaqara vagumatua e lomamu taucoko.

20 Ia oqo na noqu yalayala vei kemudou, au na solia na vanua ko ya me nomudou ivotavota vakawa, ka me nodratou ivotavota vakawa talega na nomudou kawa ka sega ni mudu, me yacova na ivakataotioti kei vuravura, io dou na taukena tale ena gauna tawamudu, io ka sega sara ni mudu.

21 Ia, au sa kaya vakaidina vei kemudou ni na yaco mai na gauna sa na sega kina ni dua na nomudou tui se nomudou turaga, sai Au ga na nomudou tui ka’u na dau wanonovi kemudou.

22 Ia, mo dou rogoca na domoqu ka muri au, ka dou na yaco me tamata galala, ka na sega tale ni dua na nomudou lawa, ia, na noqu lawa ga niu sa lako mai, ni sai Au ga na nomudou vunilawa, ia ko cei me vakadaroya rawa na ligaqu?

23 Ia, au sa kaya vakaidina vei kemudou, mo dou veivakavulici vakai kemudou, me vaka na itutu au sa lesi kemudou kina;

24 Ia na tamata yadua me lomana na wekana me vaka sa lomani koya, io mo dou ivalavala savasava ka caka dodonu e mataqu.

25 Raica au sa kaya tale vei kemudou, na tamata yadua me lomana na wekana me vaka sa lomani koya.

26 Ia ko cei vei kemudou sa tinikarua na luvena tagane, ka ratou sa tautauvata taucoko vakadua ga vua, ka ratou sa qaravi koya kece ena yalodina, a sa kaya ko koya vua e dua na luvena: Mo tokara na isulu vinaka sara ka mai dabe eke; a sa kaya vua e dua tale: Mo tokara na isulu kakadresudresu ka la’ki dabe ki kea—sa rawa li vua me raici iratou na luvena tagane ka kaya: Au sa dodonu koi au?

27 Raica, au sa tukuna vei kemudou na ka oqo ena vosa vakatautauvata, ni sa baleti au tale ga. Io au sa kaya vei kemudou, mo dou duavata sara; ia kevaka dou sa sega ni duavata, dou sa sega ni noqu.

28 Ia au sa kaya tale vei kemudou, raica era sa bose vuni tiko na kemudou meca me ra vakarusai kemudou.

29 Dou sa rogoca na ivalu ena veimatanitu tani, ka dou sa kaya sa voleka ni yaco na ivalu levu ena veimatanitu vakayawa, ia dou sa sega ni kila na ivakarau ni yalodra na tamata ena nomudou vanua.

30 Au sa tukuna vei kemudou na ka oqo ena yalomatua ni nomudou masumasu; o koya mo dou kumuna cake ki lomaseremudou na yalomatua, kevaka e sega, ena qai vakatakilai mai vei kemudou ena nodra caka ca na tamata dau caka ca, io dou na rogoca ni na tukuni vakadomoilevu sara vei kemudou ka na yavavala kina ko vuravura; ia kevaka dou sa vakarau vakavinaka tu, dou na sega sara ni rere.

31 Ka mo dou drotaka rawa kina na nona kaukauwa na meca, ka soqoni vata mai vei au ni dou sa tamata yalododonu, ni dou sa sega ni tauvi duka ka sega ni beitaki ena dua na ka—

32 Ia, ena ka oqo au sa vakaroti kemudou kina mo dou lako ki Oaio; ia au na qai solia vei kemudou mai kea na noqu lawa; ia mai kea dou na qai vakaivotavota kina ena kaukauwa mai lomalagi;

33 Ia mai kea tale ga, au na talai ira yani ka’u sa lesia me ra lako ki na veimatanitu, ka na qai vakatakilai vei ira na ka me ra kitaka; niu sa vakarautaka tu e dua na cakacaka cecere, oqo na nodra vakabulai na Isireli, raica au na kauti ira ki na vanua cava ga me vaka na noqu lewa, ka na sega na kaukauwa me tarova na ligaqu.

34 Ia oqo, au sa solia e dua na ivakaro ki na lotu ena vanua oqo, io era na lesi e so vei ira, ia me ra na lesi kina mai na domodra na lewe ni lotu;

35 Ka ra na sikovi ira na dravudravua kei ira era leqa tu, io me ra vukea na nodra leqa me ra kakua kina ni kune rarawa; ka vakauti ira sara ki na vanua ka’u sa vakarota vei ira;

36 Ia sai koya oqo na nodra ilesilesi, me ra liutaka na qaravi ni iyauqaqa ni lotu oqo.

37 Ia ko ira sa tu na nodra qele ka sega ni rawa ni volitaki, me ra lewa na ka me ra kitaka kina, me ra biuta tu se solia vakarede vua e dua.

38 Me laurai ni sa maroroi vinaka tu na veika kece; ia ni ra sa vakaivotavota na tamata ena kaukauwa mai lomalagi ka ra sa lako yani, me na qai kumuni vata na veika oqo ki na lomasere ni lotu.

39 Ia kevaka dou sa vakasaqara na iyau ka sa nona lewa ko Tamada me solia vei kemudou, dou sa na vutuniyau sara vei ira na tamata kecega, ni dou na rawata na iyau ni gauna tawamudu; ia mo dou kila ni’u sa lewa na iyau kei vuravura; dou qarauni kemudou mo dou kakua ni yaloviavialevu, de dou na yaco me vakataki ira na Nifaiti ena gauna e liu.

40 Ia au sa kaya tale vei kemudou, au sa solia vei kemudou e dua na ivakaro, raica na tamata vakayadua ga, na italatala qase, na bete, na ivakavuvuli kei na lewe ni lotu, me cavutu ka lako yani ka qarava na nona itavi ena nona igu, me vakarautaka ka rawata na ka au sa vakarota.

41 Ia na nomudou ivunau me domo ni veivakasalataki, na tamata yadua vua na wekana, ia me caka ena yalomalua kei na yalololoma.

42 Dou lako tani mai vei ira na tamata dau caka ca. Dou vakabulai kemudou. Mo dou savasava koi kemudou sa kauta na iyaya ni Turaga. Ia ena yaco vakakina. Emeni.