Seksyon 41
Rebelasyon nga ginhatag paagi kay Joseph Smith nga Propeta sa Simbahan sa Kirtland, Ohio sang ika-4 sang Pebrero 1831. Ini nga rebelasyon nagatudlo sa Propeta kag sa mga elder sang Simbahan sa pagpangamuyo agud nga mabaton ang “layi” sang Dios (tan-awa sa seksyon 42). Bag-o pa lang nag-abot si Joseph Smith sa Kirtland halin sa New York, kag si Leman Copley nga isa ka miyembro sang Simbahan sa malapit nga Thompson, Ohio, “nagpangabay sanday Brother Joseph kag Sidney [Rigdon] … nga magpuyo upod sa iya kag patigayunan niya sila sang mga balay kag mga kinahanglanon.” Ang masunod nga rebelasyon nagapaathag kon sa diin kanday Joseph kag Sidney magapuyo kag nagatawag man kay Edward Partridge nga mangin una nga obispo sang Simbahan.
1–3, Ang mga elder magadumala sang Simbahan paagi sa espiritu sang rebelasyon; 4–6, Ang matuod nga mga disipulo magabaton kag magatuman sang layi sang Ginuo; 7–12, Si Edward Partridge ginpili bilang obispo sang Simbahan.
1 Dungga kag pamatii, O kamo nga akon katawhan, siling sang Ginuo kag inyo Dios, kamo nga ginakalipay ko nga bugayan sang pinakadako sa tanan nga bugay, kamo nga nagapamati sa akon; kag kamo nga wala nagapamati sa akon nga nagdala sang akon ngalan pagasumpaon ko sang pinakamabug-at sa tanan nga sumpa.
2 Dungga ninyo, O mga elder sang akon simbahan nga akon gintawag, tan-awa, ginahatagan ko kamo sing isa ka kasugoan nga tiponon ninyo ang inyo mga kaugalingon agud mag-ugyon parte sa akon pulong;
3 Kag paagi sa pangamuyo sang inyo pagtuo mabaton ninyo ang akon layi agud nga mahibaloan ninyo kon paano dumalahan ang akon simbahan kag himuon ang tanan nga butang sa husto nga paagi sa akon atubang.
4 Kag ako mangin inyo hari sa akon pagkari; kag tan-awa, magakari ako sing madasig, kag siguroha ninyo nga ginatuman ang akon layi.
5 Sia nga nagabaton sang akon layi kag nagatuman sini, ang amo man akon disipulo; kag sia nga nagasiling nga ginabaton niya ini kag wala nagatuman sini, ang amo man indi akon disipulo, kag tabugon sia halin sa tunga ninyo;
6 Kay indi nagakabagay nga ang mga butang nga iya sang mga anak sang ginharian ihatag sa sinang mga indi nagakaangay, ukon sa mga ido, ukon ang mga perlas nga ihaboy sa mga baboy.
7 Kag sa liwat, nagakabagay lang nga ang akon alagad nga si Joseph Smith Jr. patukoran sang balay sa diin sia magpuyo kag maglubad.
8 Kag sa liwat, nagakabagay lang nga ang akon alagad nga si Sidney Rigdon maghikot sang iya kabuhi suno sa nagakaigo para sa iya basta nga tumanon niya ang akon mga kasugoan.
9 Kag sa liwat, gintawag ko ang akon alagad nga si Edward Partridge; kag ginahatag ko ang kasugoan nga pilion sia suno sa tingug sang simbahan, kag ordinan nga obispo sang simbahan, kag bayaan niya ang iya negosyo kag ihatag ang tanan niya nga tion sa mga buluhaton sang simbahan;
10 Agud nga dumalahan ang tanan nga butang sa tion nga itugyan ini sa iya sa akon mga layi sa adlaw nga ihatag ko ang mga ini.
11 Kag ini bangod ang iya tagipusuon matinlo sa akon atubang kay pareho sia ni Nathanael sang dumaan nga panahon nga wala sang pagdaya.
12 Ini nga mga pulong ginahatag sa inyo, kag matinlo ang mga ini sa akon atubang; gani, mag-andam kon paano ninyo ini kabigon kay salabton ninyo ining mga pulong sa inyo mga kalag sa adlaw sang paghukom. Kag gani amo sini. Amen.