1 Ongora, O ngkami unimwaanen au ekaretia, ake kam a tia ni ikotingkami ni kabane n arau, ae Iesu Kristo Natin te Atua ae maiu, te Tia Kamaiua te aonaba; ibukina bwa kam kakoua arau ao ni kawakini au tua.

2 I a manga tuangkami riki, ongora ao kakauongo raoi ao ongeaba nakon te tua are N na anganingkami.

3 Bwa e koaua ae I taku, ibukina bwa kam a tia n ikotingkami ni kabane ni kaineti nakon te tua are I tuangkami, ao ni bo nanomi ni kaineti ma te bwai ae tii teuana aei, ao n tia n butiia te Tama n arau, eng kam na bon karekei.

4 Nooria, e koaua ae I tuangkami, I anganingkami te moan tua aei, bwa kam na waaki i nanon arau, ngkami ni kabane, ma tiaki au tia mwakuri aika Iotebwa Timiti te Ataei, ao Sidney Rigdon.

5 Ao I anganiia te tua bwa a na waaki i nanon te tai ae uarereke, ao a na anganaki man mwaakan te Tamnei te tai ae a na oki iai.

6 Ao kam na waaki ni mwaakan Tamneiu, n tataekina au euangkerio, ni kakauoman, n arau, n tabekaarake bwanaami n ai aron tangin te buu, n taekinii au taeka n ai aroia ana anera te Atua.

7 Ao kam na waaki nako ni bwabwetito i nanon te ran, ni kangai: Raira nanomi, raira nanomi, bwa e a kaan roko abanuean karawa.

8 Ao man te tabo aei kam na waaki nako nakon aaba ake i maeao; ao ngkana kam kuneia naake a na butimwaingkami kam na karikirakea au ekaretia n aaba nako—

9 Ni karokoa e na roko te tai are e na kaotaki nakoimi mai eta, bwa ningai ae e na katauraoaki iai kaawan Ierutarem ae Boou, bwa kam aonga ni ikotaki ni katiteuanaaki, bwa kam aonga n riki bwa au aomata ao Ngai N na riki bwa Atuami.

10 Ao I a manga tuangkami, bwa au tia mwakuri ae Edward Partridge e na tei n nakoana are I a tia n rineia nako iai. Ao e na koro bukina, bwa ngkana e urui tua e na rineaki temanna bwa e na onea mwina. Eng. Amen.

11 Ao I a manga tuangkami riki, bwa e na aki anganaki temanna bwa e na waaki nako n tataekina au euangkerio, ke ni karikirakea au ekaretia, tii ngkana e katabuaki iroun are iai irouna te kariaiakaki, ao n ataaki n te ekaretia bwa iai irouna te kariaiakaki ao n tia ni katabuaki ni kawaina ae riai mai irouia mataniwiin te ekaretia.

12 Ao teuana riki, unimwaane, ibonga ao taan reirei n te ekaretia aei a na anga reirei naba i aon tuan au euangkerio, ake i nanon te Baibara ao Ana Boki Moomon, are i nanona bon bwaninin te euangkerio.

13 Ao a na kawakin tenaan berita aika tabu ao ana kaetieti te ekaretia ao ni karaoi, ao aikai aia reirei, n aron are a na kairaki iroun te Tamnei.

14 Ao kam na anganaki te Tamnei man te tataro n onimaki; ao ngkana kam aki karekea te Tamnei kam na aki anga reirei.

15 Ao ni kabane aikai kam na kawakin ao ni karaoi n aron ae I a tia n tuangkami ni kaineti ma ami reirei, ni karokoa e kaotaki bwaninin au koroboki aika tabu.

16 Ao ngkana kam tabekaraake bwanaami mai iroun te Tia Karaunano, kam na taetae ao n taetae ni burabeti n aron nooran raoiroina Irou;

17 Bwa, nooria, e atai bwaai ni kabane te Tia Karaunano, ao e kaota koauan te Tama ao te Nati.

18 Ao ngkai, nooria, I taetae nakon te ekaretia. Ko na tai kamateia aomata; ao ane e kamatea te aomata e na bon aki kabwaraaki ana bure n te aonaba aei, ke n te aonaba ae e na roko.

19 Ao I a manga kangai, ko na tai kamateia aomata; bwa ane e tiritiri e na bon mate.

20 Ko na tai ira; ao ane e ira ao e aki raira nanona e na bon teweaki nako.

21 Ko na tai kewe; ane e kewe ao e aki raira nanona e na bon teweaki nako.

22 Ko na tangira buum ma nanom ni kabanea, ao n nim ma ngaia ao akea riki.

23 Ao ane e taraa te aine ma ni kaibwabwaru ibukina e bon kaakea te onimaki, ao e na akea te Tamnei irouna; ao ngkana e aki raira nanona e na bon teweaki nako.

24 Ko na tai wenenibure; ao ane e wenenibure, ao e aki raira nanona, e na bon teweaki nako.

25 Ma ane e a tia ni wenenibure ao n raira nanona ma nanona ni kabane, ao ni kiitanna, ao n aki manga karaoia, ko na kabwara ana bure;

26 Ma ngkana e a manga karaoia naba, e na bon aki kabwaraaki ana bure, ma e na teweaki nako.

27 Ko na tai taekina ae buakaka ibukin kaain rarikim, ke ni kaikoakia.

28 Ko atai au tua ni kaineti ma bwaai aikai ake a kaotaki n au koroboki aika tabu; ane e bure ao e aki raira nanona e na bon teweaki nako.

29 Ngkana ko tangirai ko na beku ibukiu ao ni kawakini au tua ni kabane.

30 Ao nooria, ko na uringiia kainnano, ao ni katabui am bwai ibukin boutakaaia are ko na tibwauai nakoia, ma te berita ae tabu ao te beeba ni kabure bwai are e aki kona n uruakaki.

31 Ao ngkana ko tibwauai am bwai nakoia kainnano, ko bon karaoia nakoiu; ao a na kaakaki i matan te bitiobi n au ekaretia ao a na taan ibuobuoki ake unimwaane aika uoman, ke ibonga aika rietata, n aron are e na rineia ke n tia n rineia ao ni kaokoroaki ibukin te nakoa anne.

32 Ao e na koro bukina, bwa i mwin kaakakiia imatan te bitiobi n au ekaretia, ao i mwin karekean taiani kakoaua ni kaineti ma katabuan ana bwai au ekaretia, bwa aonga n aki anaaki man te ekaretia, ni kaineti nakon au tua, aomata nako a na bon bukinaki nakoiu, te tia tararuai oin ana bwai, ke are e a tia ni karekea man te katabu, n aron ae e bon tau ibukina ao ana utu.

33 Ao teuana riki, ngkana iai naba bwaai i nanon bain te ekaretia, ke kaaina n tatabemaniia nako, ae riaon ae tau ibukin boutokaaia i mwin te moan katabu, are te nikira bwa e na katabuaki nakon te bitiobi, e na kawakinaki ibukin anganakiia naake akea aia bwai, man te tai teuana nakon te tai teuana, bwa ni kabane aomata ake iai kainnanoia a kona n anganaki ae tau ao ni karekea ni kaineti nakon are e kainanoia.

34 Ngaia are, nikirana a na kawakinaki n au bata ni kaikobwai, bwa a na anganaki naake akea aia bwai ma kainano, n aron are e baireaki man te kauntira ae rietata n te ekaretia, ao te bitiobi ao ana kauntira;

35 Ao bwa ibukin kabooan aaba ibukin kabwaiaia te botanaomata n te ekaretia, ao katean taabo n taromauri, ao karikirakean Ierutarem ae Boou are e na bon kaotaki rimwi—

36 Bwa aonga au aomata i nanon te berita ae tabu n ikotaki ni katiteuanaaki n te bong anne ngkana I roko nakon au tembora. Ao I karaoa aio ibukin kamaiuaia au aomata.

37 Ao e na koro bukina, bwa ane e bure ao e aki raira nanona e na bon teweaki nako man te ekaretia, ao n aki manga karekea are e a tia ni katabua nakoia naake akea aia bwai ma kainnano n au ekaretia, ke taekinana riki teuana, nakoiu—

38 Bwa ngkana ko karaoi baikai nakon temanna ae moan te mangori i buakoia, ko bon karaoia naba nakoiu.

39 Bwa e na koro bukina, bwa are I taekin man wiia au burabeti a na bon koro bukiia; bwa N na katabui kaubwaia naake a butimwaea au euangkerio i buakoia Tientaire ibukia kainnano n au botanaomata ake bon kaain te bata are Iteraera.

40 Ao teuana riki, ko na tai kamoamoa naba i nanom; am kunnikai ni kabane a na tau tamaroaia, ao tamaroana bon tamaroan ana mwakuri oin baim;

41 Ao bwaai ni kabane a na karaoaki n te itiaki imatau.

42 Ko na tai taningaroti; bwa ane e taningaroti e na aki kana ana kariki ke ni bwaina kunnikain te tia mwakuri.

43 Ao antai i buakomi ane e aoraki, ao n akea ana onimaki ni kamarurungaki, ma e kakoaua, e na kamwarakeaki ma te akoi ni kabane, n te aroka ao amwarake aika maraurau, ao tiaki man bain te tia kairiribai.

44 Ao unimwaanen te ekaretia, uoman ke e mwaiti riki, a na weteaki, ao a na tataro ibukia ao ni katokai baia i aoia n arau; ao ngkana a mate a na mate ibukiu, ao ngkana a maiu a na maiu ibukiu.

45 Kam na uaia ni maeka i nanon te tangira, n te aro are kam na tang ibukin buaia akana a mate, ao riki ibukiia naake akea aia kantaninga n te mangauti ae mimitong.

46 Ao e na koro bukina bwa naake a mate inanou a na aki katoonga te mate, bwa e na karewe irouia;

47 Ao naake aki mate inanou, a na reke kaia, bwa e mao mateia.

48 Ao teuana riki, e na koro bukina bwa ane iai ana onimaki irou bwa e na kamarurungaki, ao e aki motikaki bwa e na mate, e na kamarurungaki.

49 Ane iai ana onimaki n nooria e na bon nooria.

50 Ane iai ana onimaki n ongo e na bon ongo.

51 Te mwauku ae iai ana onimaki ni kibarake e na bon kibarake.

52 Ao naake akea aia onimaki ni karaoi bwaai aikai, ma a kakoauaai, e na iai te mwaaka irouia n riki bwa natiu; ao ngkana a teimatoa n aki urui au tua ko na buokiia ni mamaaraia.

53 Ko na tei ni matoatoa n nakoam n tararua.

54 Ko na tai anaa ana kunnikai tarim; ko na kabooa te bwai are ko karekea mai iroun tarim.

55 Ao ngkana ko karekea ae riaon are tau ibukin boutokaam, ko na anga nakon au bata ni kaikobwai, bwa aonga ni karaoaki bwaai ni kabane ni kaineti ma are I a tia n taekinna.

56 Ko na bubuti, ao ko na anganaki au koroboki aika tabu n aron are I a tia ni baireia, ao a na kawakinaki raoi man te kabuanibwai;

57 Ao e riai bwa ko na tai kakarongoa ibukiia, ao tai reireiniia ni karokoa ko a tia ni karekei ni bwaniniia.

58 Ao I anganingkami te tua bwa te tai are kam na reiakini iai nakoia aomata ni kabane; bwa a na reiakinaki nakoia ni kabane aaba, reeti, neewe, ma botannaomata.

59 Ko na butimwaai bwaai ake ko a tia ni karekei, ake ko a tia n anganaki i nanon au koroboki aika tabu ibukin te tua, bwa au tua ni bairea au ekaretia;

60 Ao ane e karaoia ni kaineti nakon bwaai aikai e na bon kamaiuaki, ao ane e aki karaoia e na bon kabuakakaaki ngkana e reitinako n aio.

61 Ngkana ko bubuti, ko na karekea te kaotioti teuana i mwin te kaotioti teuana, te atatai teuana i mwin te atatai teuana, bwa ko aonga n ataa ana bwai aika raba ao bwaai aika rau—aika a uota te kimwareirei, aika a uota te maiu ae akea tokina.

62 Ko na bubuti, ao e na kaotaki nakoim ni bon oin au tai ike e na kateaki iai Ierutarem ae Boou.

63 Ao nooria, e na koro bukina bwa au taan mwakuri a na kanakoaki nako mainiku ao nako maeao, nako meang ao nako maiaki.

64 Ao ngkai naba, e riai teuare e na nako mainiku n reireiniia ake a rairaki bwa a na nako maeao, ao aio ibukin bwaai aika a na riki n te aonaba, ao ibukin botaki ni karaba aika buakaka.

65 Nooria, ko na karaoi bwaai ni kabane aikai, ao e na korakora kanuangam; bwa ko anganaki bwa ko na atai bwain te abanuea aika raba, ma nakon te aonaba e aki kaotaki nakoia bwa a na ataia.

66 Kam na kawakini tua ake kam a tia ni karekei ao ni bwaina te kakaonimaki.

67 Ao i mwina kam na karekei berita aika tabu n te ekaretia, n aron ae e tau ibukin karikirakeami, ikai ao i Ierutarem ae Boou naba.

68 Mangaia are, ane akea rabakauna, e na bubutiai, ao N na anganna ma te tituaraoi ao n aki ngurengureakinna.

69 Tabekarake nanomi ao kimwareirei, bwa e anga nakoimi te abanuea, ke n taekana teuana, a tia n anganaki kiingin te ekaretia. Eng. Amen.

70 Ibonga ao taan reirei a na iai mwiokoaia n tararua, n ai aroia naba kaain te ekaretia.

71 Ao unimwaane ke ibonga aika rietata ake a tia n rineaki bwa a na buoka te bitiobi bwa taan ibuobuoki ni bwai ni kabane, a na riai ni boutokaaki aia utu man bwai ake a katabuaki nakon te bitiobi, ibukin kabwaiaia kainnano, ao ibukin waki riki tabeua, n aron are e taekinaki mai mwaaina;

72 Ke a na riai ni karekea booia ae tau ibukin aia mwakuri nako, ke te mwiokoaki n tararua ke n anga riki tabeua, n aron iangoakina ae raoiroi ke ae baireaki mai irouia taan ibuobuoki ao te bitiobi.

73 Ao te bitiobi naba, e na karekea boutokaana, ke boona ae tau ibukin ana mwakuri ni kabane n te ekaretia.

74 Nooria, e koaua ae I tuangkami, bwa aomata nako i buakomi, ake a tia ni katuka buuia ibukin te wenenibure, ke n taekana teuana, ngkana a kakoaua imatami ma te nano ae nanorinano bwa aio bukina, kam na aki tewenakoia mai buakomi;

75 Ma ngkana kam kunea te aomata ae tia ni kiitana buuna ibukin te wenenibure, ao boni ngaiia taan bure, ao buuia a bon maiu, a na bon teweaki nako mai buakomi.

76 Ao I a manga tuangkami riki, bwa kam na bwaina te taratara raoi ma te karaurau, ma titiraki ni kabane, bwa akea ae kam na butimwaia ae ai aron aei i buakomi ngkana a tia ni mare;

77 Ao ngkana a tuai mare, a na riai n rairananoia man aia bure nako ke kam na aki butimwaiia.

78 Ao teuana riki, aomata nako ake kaain ana ekaretia Kristo aio, a na riai ni kawakini tua ni kabane ao berita aika tabu n te ekaretia.

79 Ao e na koro bukina, bwa ngkana iai aomata i buakomi aika a tiritiri a riai ni uotaki rake ao ni baireaki taekaia ni kaineti ma tuan te aba; bwa uringnga akea kabwaraan ana bure; ao e na kakoauaaki ni kaineti ma tuan te aba.

80 Ao ngkana te mwaane ke te aine ae e wenenibure, teuanne ke neienne e na motikaki taekana i mataia unimwaanen te ekaretia aika uoman, ke e mwaiti riki, ao a na kamatoaki taian taeka nako ni kaitaraa teuanne ke neienne mai irouia uoman taan kakoaua n te ekaretia, ao tiaki taan kairiribai; ma e rangi n tikiraoi riki ngkana e raka i aon uoman taan kakoaua.

81 Ma teuane ke neiene e bukinaki bwa e bure man wiia uoman taan kakoaua; ao unimwaane a na uotaarake te tang aio nako matan te ekaretia, ao te ekaretia a na tabekarake baia ni kaitara teuanne ke neienne, bwa aonga ni baireaki taekaia ni kaineti nakon ana tua te Atua.

82 Ao ngkana e kona, e riai bwa e na iri naba te bitiobi.

83 Ao kam na karaoa aio n taian tang ni kabane ake a roko imatami.

84 Ao ngkana te mwaane ke te aine e kimoa, teuanne ke neienne e na uotakirake nakon tuan te aba.

85 Ao ngkana teuanne ke neienne e ira, teuanne ke neienne e na uotakirake nakon tuan te aba.

86 Ao ngkana teuanne ke neienne e kewe, teuanne ke neienne e na uotakirake nakon tuan te aba.

87 Ao ngkana teuanne ke neienne e karaoa aekan buakaka nako, teuanne ke neienne e na uotakirake nakon te tua, are mai iroun te Atua.

88 Ao ngkana tarim ke mwanem e bure nakoim, ko na anaa teuanne ke neienne ao ti i marenan teuanne ke neienne ma ngkoe; ao ngkana teuanne ke neienne e kaota ana bure kam na ioki.

89 Ao ngkana teuanne ke neienne e aki kaota ana bure ko na uotaarake teuanne ke neienne nakon te ekaretia, tiaki nakoia kaain te ekaretia, ma nakoia unimwaane. Ao e na karaoaki n te boowi, ao tiaki i matan te aonaba.

90 Ao ngkana tarim ke mwanen e bure nakoia aika a mwaiti, teuanne ke neienne e na katuaeaki i mataia aika a mwaiti.

91 Ao ngkana iai ae e bure i mataia aomata, teuanne ke neienne e na takuaki imataia aomata, bwa e aonga teuanne ke neienne ni maamaa. Ao ngkana teuanne ke neienne e aki kaota ana bure, teuanne ke neienne e na uotakirake nakon ana tua te Atua.

92 Ngkana iai ae e bure nakon temanna ni karaba, teuanne ke neienne e na takuaki ni karaba, bwa e aonga teuanne ke neienne n reke ana tai ni kaota ana bure ni karaba nakon teuare ke neiere e a tia ni bure nakoina, ao nakon te Atua, bwa e aonga te ekaretia n aki taetae ni kabuakaka ibukin teuanne ke neienne.

93 Ao aio ae kam na karaoia n bwaai ni kabane.