1 Dungga ninyo, O mga elder sang akon simbahan nga nagtipon sang inyo mga kaugalingon sa akon ngalan nga si Jesucristo nga Anak sang buhi nga Dios, ang Manluluwas sang kalibutan; bangod nga nagapati kamo sa akon ngalan kag nagatuman sang akon mga kasugoan.

2 Sa liwat ginasiling ko sa inyo, dungga kag pamatii kag tumana ang layi nga ihatag ko sa inyo.

3 Kay sa pagkamatuod ginasiling ko, bangod nga gintipon ninyo ang inyo mga kaugalingon suno sa kasugoan nga ginsugo ko sa inyo, kag nag-ugyon parte sining isa ka butang nga amo ang akon pulong, kag nagpamangkot sa Amay sa akon ngalan, sa amo man mabaton ninyo ini.

4 Tan-awa, sa pagkamatuod ginasiling ko sa inyo, ginahatag ko sa inyo ining una nga kasugoan nga maglakat ang tagsa sa inyo sa akon ngalan magluwas sa akon mga alagad nga sanday Joseph Smith Jr. kag Sidney Rigdon.

5 Kag ginahatagan ko sila sang kasugoan nga maglakat sila sa malip-ot lamang nga tion, kag ipahayag paagi sa gahum sang Espiritu kon san-o sila mabalik.

6 Kag maglakat kamo sa gahum sang akon Espiritu nga nagawali sang akon ebanghelyo nga tagduha-duha sa akon ngalan, nga nagabayaw sang inyo mga tingug pareho sa tunog sang trumpeta, nga nagapahayag sang akon pulong pareho sang mga anghel sang Dios.

7 Kag maglakat kamo kag magbunyag paagi sa tubig nga nagasiling: Maghinulsol kamo, maghinulsol kamo, kay ang ginharian sang langit malapit na.

8 Kag halin sa sini nga lugar magalakat kamo sa mga rehiyon pa-weste; kag kon makakita kamo sang mga mabaton sa inyo, pauswagon ninyo ang akon simbahan sa tagsa ka rehiyon—

9 Tubtob nga mag-abot ang tion nga ipahayag sa inyo halin sa kahitaasan kon ang siyudad sang Bag-ong Jerusalem ipahamtang agud nga matipon kamo nga mangin isa, agud nga kamo mangin akon katawhan kag ako mangin inyo Dios.

10 Kag sa liwat, ginasiling ko sa inyo nga ang akon alagad nga si Edward Partridge dapat magtuman sang palangakoan sa diin ginpili ko sia. Kag matabo ini nga kon maglapas sia sang mga kasugoan, mapili ako sang lain nga magbulos sa iya. Kag gani amo sini. Amen.

11 Kag sa liwat ginasiling ko sa inyo nga indi pagtugotan ang bisan sin-o nga maglakat agud magwali sang akon ebanghelyo ukon magpauswag sang akon simbahan luwas lang nga naordinan sia sang sinang may awtoridad, kag nakahibalo ang simbahan nga may awtoridad sia kag naordinan sa husto nga paagi sang mga lideres sang simbahan.

12 Kag sa liwat, ang mga elder, mga pari, kag mga manunudlo sang sining simbahan dapat magtudlo sang mga prinsipyo sang akon ebanghelyo nga yara sa Biblia kag sa Libro ni Mormon nga amo ang kabug-osan sang ebanghelyo.

13 Kag dapat magbantay sila sang mga kasugtanan kag mga pagtuluohan sang simbahan sa paghimo sang mga ini, kag ang mga ini amo ang ila mga ipanudlo suno sa paggiya sang Espiritu sa ila.

14 Kag ang Espiritu igahatag sa inyo paagi sa pangamuyo sang pagtuo; kag kon indi ninyo mabaton ang Espiritu indi kamo makatudlo.

15 Kag ini tanan inyo bantayan sa paghimo pareho sang akon ginsugo parte sa inyo ipanudlo tubtob nga mapahayag ang kabug-osan sang akon balaan nga mga kasulatan.

16 Kag sa inyo pagbayaw sang inyo mga tingug paagi sa Manugpasulhay, magahambal kag magapropesiya kamo suno sa nagakaigo para sa akon;

17 Kay, tan-awa, ang Manugpasulhay nakahibalo sang tanan nga butang, kag nagapamatuod parte sa Amay kag sa Anak.

18 Kag karon, tan-awa, nagahambal ako sa simbahan. Indi ka magpatay; kag sia nga nagapatay indi makabaton sang kapatawaran sa sining kalibutan ukon sa kalibutan nga magaabot.

19 Kag sa liwat, ginasiling ko, indi ka magpatay; apang sia nga nagapatay dapat patyon.

20 Indi ka magpangawat; kag sia nga nagapangawat kag indi maghinulsol dapat sikwayon.

21 Indi ka magbinutig; sia nga nagabinutig kag indi maghinulsol dapat sikwayon.

22 Higugmaa ang imo asawa sa bug-os mo nga tagipusuon, kag magpabilin nga tampad sa iya lamang kag wala na sing iban pa.

23 Kag sia nga nagatulok sa babayi sa pagkaibog sa iya magapanghiwala sang pagtuo, kag indi makaupod ang Espiritu; kag kon indi sia maghinulsol dapat sikwayon sia.

24 Indi ka magpanglahi; kag sia nga nagapanglahi, kag indi maghinulsol pagasikwayon.

25 Apang sia nga nagpanglahi kag nagahinulsol sa bug-os niya nga tagipusuon, kag gintalikdan ini, kag wala na ini ginahimo; patawaron mo;

26 Apang kon himuon niya ini liwat indi sia pagpatawaron kundi dapat sikwayon.

27 Indi ka maghambal sang malain parte sa imo isigkatawo, ukon maghalit sa iya.

28 Nakahibalo kamo nga ang akon mga layi parte sining mga butang ginpahayag sa akon balaan nga mga kasulatan; sia nga makasala kag indi maghinulsol dapat sikwayon.

29 Kon nagahigugma ka sa akon, alagaran mo ako kag tumanon ang tanan ko nga kasugoan.

30 Kag tan-awa, dumdumon ninyo ang mga imol, kag ikonsagrar ang inyo mga pagkabutang agud suportahan sila sinang inyo ihatag sa ila paagi sa kasugtanan kag legal nga kasulatan nga indi maguba.

31 Kag sa bagay nga maghatag kamo sang inyo manggad sa mga imol, inyo ini himuon sa akon; kag ihatag ang mga ini sa obispo sang akon simbahan kag sa iya mga manuglaygay, duha sang mga elder, ukon mga mataas nga pari nga iya pilion ukon ginpili kag ginpain para sa sina nga katuyoan.

32 Kag matabo ini nga pagkatapos nga ang mga ini mahatag sa obispo sang akon simbahan, kag pagkatapos nga mabaton niya ining mga testimonya parte sa pagkonsagrar sang mga pagkabutang sang akon simbahan, nga ang mga ini indi makuha halin sa simbahan, suno sa akon mga kasugoan, ang tagsa ka tawo mangin may salabton sa akon bilang tulugyanan sang iya kaugalingon nga pagkabutang, ukon sinang iya nabaton paagi sa pagkonsagrar nga nagakaigo gid para sa iya kaugalingon kag sa iya panimalay.

33 Kag sa liwat, kon may mga pagkabutang sa mga kamot sang simbahan ukon sa bisan sin-o nga tawo nga sobra sangsa kinahanglanon para sa ila pangabuhi pagkatapos sining una nga pagkonsagrar, nga nabilin pa nga dapat ikonsagrar sa obispo, dapat taguon ang mga ini agud ihatag sa sinang wala sang ikasarang nga magsuporta sang ila kaugalingon kag ila panimalay kon san-o nga nagakaigo agud nga ang tagsa ka tawo nga nagakinahanglan mahatagan sing nagakaigo kag makabaton suno sa iya mga luyag.

34 Gani, ang nabilin dapat taguon sa akon balay-talagoan agud ihatag sa mga imol kag sa mga nagakinahanglan suno sa imando sang mataas nga konseho sang simbahan, kag sang obispo kag sang iya konseho;

35 Kag para sa katuyoan nga magbakal sang mga duta para sa benepisyo sang kadam-an sa simbahan, kag sa pagtukod sang mga balay sang pagsimba, kag pagpauswag sang Bag-ong Jerusalem nga igapahayag pagkatapos sini—

36 Agud nga ang akon katawhan sang kasugtanan matipon nga mangin isa sa sinang adlaw nga magakari ako sa akon templo. Kag ini ginahimo ko para sa kaluwasan sang akon katawhan.

37 Kag matabo ini nga sia nga makasala kag indi maghinulsol dapat sikwayon halin sa simbahan, kag indi na makabaton pa liwat sinang ginkonsagrar niya para sa mga imol kag sa mga nagakinahanglan sang akon simbahan, ukon sa iban nga pulong, sa akon—

38 Sa bagay nga ginahimo ninyo ini sa labing kubos sining akon mga utod, ginahimo ninyo ini sa akon.

39 Kay matabo ini nga inang akon ginpahayag paagi sa mga baba sang akon mga propeta matuman; kay ikonsagrar ko ang mga manggad sang sinang mga Gentil nga nagabaton sang akon ebanghelyo para sa mga imol sang akon katawhan nga amo ang panimalay ni Israel.

40 Kag sa liwat, indi ka mangin bugalon sa imo tagipusuon; ang tanan mo nga biste dapat mangin simple lamang, kag ang ila sini katahum mangin ang katahum sang pagpangabudlay sang imo kaugalingon nga mga kamot;

41 Kag dapat himuon ang tanan nga butang nga matinlo sa akon atubang.

42 Indi ka mangin matamad; kay sia nga matamad indi makakaon sang tinapay ukon makasoksok sang mga biste sang nagapangabudlay.

43 Kag kon sin-o man sa inyo ang nagamasakit, kag wala sang pagtuo nga mag-ayo apang nagapati, dapat pakaunon sang mga dahon-nga-bulong kag mainit nga pagkaon nga may bug-os nga paghigugma, kag ina indi paghimuon paagi sa kamot sang kaaway.

44 Kag dapat tawgon ang duha ukon masobra pa nga mga elder sang simbahan, kag pangamuyoan nila ang mga nagamasakit kag itakdong ang ila mga kamot sa ila agud bendisyonan sila sa akon ngalan; kag kon mapatay sila mapatay sila sa akon, kag kon mabuhi sila mabuhi sila sa akon.

45 Mag-inupdanay kamo sa gugma sa bagay nga maghibi kamo bangod sa pagkadula sinang mga nagakapatay, kag ilabi na gid para sa sinang wala’y paglaum para sa mahimayaon nga pagkabanhaw.

46 Kag matabo ini nga inang mga nagakapatay sa akon indi makatilaw sang kamatayon kay mangin matam-is ini sa ila;

47 Kag ang inang nagakapatay nga indi sa akon, kalisud sa ila kay ang ila kamatayon mapait.

48 Kag sa liwat, matabo ini nga sia nga nagatuo sa akon nga mag-ayo, kag wala pa natalana sa kamatayon, magaayo.

49 Sia nga nagatuo nga makakita, makakita.

50 Sia nga nagatuo nga makabati, makabati.

51 Ang lupog nga nagatuo nga makalakat, makalakat.

52 Kag sila nga wala sang pagtuo sa paghimo sining mga butang apang nagapati sa akon, may gahum nga mangin akon mga anak; kag sa bagay nga wala nila ginalapas ang akon mga layi buligan ninyo sila nga madala ang ila mga kaluyahon.

53 Tindogi sing malig-on ang imo pagkatulugyanan.

54 Indi mo pagkuhaon ang biste sang imo utod (sa simbahan); bayaran mo inang imo mabaton halin sa iya.

55 Kag kon makaangkon ka sing sobra sangsa imo kinahanglanon para sa imo pagpangabuhi, ihatag mo ini sa akon balay-talagoan agud nga ang tanan nga butang mahimo suno sa sinang akon ginhambal.

56 Magpangayo ka, kag ang akon balaan nga mga kasulatan ihatag pareho sa akon ginmando, kag ang mga ini dapat amligan agud nga mangin luwas;

57 Kag kinahanglanon nga maghipos kamo anay parte sa balaan nga mga kasulatan, kag indi pag-itudlo ang mga ini tubtob nga mabaton ninyo ang mga ini sing lubos.

58 Kag ginahatagan ko kamo sing isa ka kasugoan nga pag-abot sinang tion itudlo ninyo ang mga ini sa tanan nga katawhan; kay ang mga ini dapat itudlo sa tanan nga nasyon, kaliwat, lengguahe kag katawhan.

59 Kabigon mo ang mga butang nga imo nabaton nga ginhatag sa imo sa akon balaan nga mga kasulatan bilang layi, nga mangin akon layi nga magadumala sang akon simbahan;

60 Kag sia nga nagatuman sining mga butang maluwas, kag sia nga wala nagatuman sang mga ini pagasilotan kon magpadayon sia sa paghimo sini.

61 Kon magpangayo ka, makabaton ka sang rebelasyon dugang sa rebelasyon, ihibalo dugang sa ihibalo, agud nga mahibaloan mo ang mga misteryo kag mahidaeton nga mga butang—nga nagadala sang kalipay, nga nagadala sang kabuhi nga wala’y katapusan.

62 Magpangayo ka, kag ipahayag sa imo sa akon kaugalingon nga natalana nga tion kon sa diin itukod ang Bag-ong Jerusalem.

63 Kag tan-awa, matabo ini nga ang akon mga alagad igapadala sa este kag sa weste, sa norte kag sa sur.

64 Kag bisan pa subong, sia nga nagalakat sa este patudloa sa mga mahaylo nga magpalagyo pa-weste, kag ini bangod sang sinang magaabot sa duta, kag bangod sang sekreto nga mga pagkunsabo.

65 Tan-awa, tumana ining tanan nga butang, kag dako ang mangin imo padya; kay nahatag sa imo nga makahibalo parte sa mga misteryo sang ginharian, apang sa kalibutan wala nahatag nga makahibalo sang mga ini.

66 Tumana ninyo ang mga layi nga inyo nabaton kag mangin tampad.

67 Kag pagkatapos sini mabaton ninyo ang mga kasugtanan sang simbahan nga mangin igo agud ipahamtang kamo diri pati sa Bag-ong Jerusalem.

68 Gani, sia nga nakulangan sang kaalam, papangayoa sia sa akon, kag hatagan ko sia sing maalwan kag indi sia pagbasulon.

69 Ibayaw ang inyo mga tagipusuon kag magkasadya kay sa inyo ang ginharian, ukon sa iban nga pulong, ang mga yabi sang simbahan nahatag. Kag gani amo sini. Amen.

70 Ang mga pari kag mga manunudlo dapat magdumala sang mga pagkabutang bilang mga tulugyanan pareho sa mga miyembro.

71 Ang mga elder ukon mga mataas nga pari nga ginpili sa pagbulig sang mga obispo bilang mga manuglaygay sa tanan nga butang, dapat magtugot sang ila mga panimalay nga suportahon halin sa mga pagkabutang nga ginkonsagrar sa obispo para sa kaayohan sang mga imol, kag para sa iban pa nga katuyoan nga nasambit na sang nagligad;

72 Ukon dapat magbaton sila sing nagakaigo nga bayad para sa tanan nila nga serbisyo, kon bilang pagkatulugyanan man ukon iban pa gid, suno sa ginahunahuna nga pinakamaayo ukon nadesisyonan sang mga manuglaygay kag obispo.

73 Kag ang obispo man dapat magbaton sang iya suporta ukon nagakaigo nga bayad para sa tanan niya nga serbisyo sa simbahan.

74 Tan-awa, sa pagkamatuod ginasiling ko sa inyo nga ang bisan sin-o sa inyo nga nagbulag sa ila mga asawa ukon bana bangod sang pagpakighilawas, ukon sa iban nga pulong, kon magkumpisar sila sa atubang ninyo sa lubos nga pagpakaubos sang tagipusuon nga amo sini ang hitabo, indi ninyo sila pagtabugon halin sa tunga ninyo;

75 Apang kon mahibaloan ninyo nga ang bisan sin-o nga mga tawo nagbiya sang ila mga asawa ukon bana bangod sang pagpanglahi, kag sila mismo ang nakasala, kag ang ila mga asawa ukon bana buhi pa, tabugon ninyo sila halin sa tunga ninyo.

76 Kag sa liwat, ginasiling ko sa inyo nga mangin mabinantayon kag mainandamon kamo paagi sa maid-id nga pag-usisa agud nga wala kamo sing mabaton nga amo sina nga mga tawo upod sa inyo kon kasal sila;

77 Kag kon indi sila kasal, dapat maghinulsol sila sang tanan nila nga sala ukon indi ninyo sila pagbatonon.

78 Kag sa liwat, ang tagsa ka tawo nga miyembro sining simbahan ni Cristo dapat magtinguha sa pagtuman sang tanan nga kasugoan kag kasugtanan sang simbahan.

79 Kag matabo ini nga kon ang bisan sin-o nga tawo sa tunga ninyo ang magpatay, itugyan sila sa sibil nga mga awtoridad kag pamatbatan suno sa mga layi sang duta; kay dumduma nga ang nagapatay indi makabaton sang kapatawaran; kag pamatud-an ini suno sa mga layi sang duta.

80 Kag kon bisan sin-o nga lalaki ang magpanglahi ukon bisan sin-o nga babayi ang magpanglahi, dal-on sia sa atubang sang duha ukon masobra pa nga mga elder sang simbahan agud usisaon, kag palig-onon ang tagsa ka pulong batok sa iya sang duha ka saksi sang simbahan, kag indi sang kaaway; apang kon may masobra sa duha ka saksi mas maayo ini.

81 Apang dapat kondenahon sia sa baba sang duha ka saksi; kag ang mga elder dapat magpresentar sang kaso sa simbahan, kag ang simbahan dapat magboto batok sa iya agud nga pamatbatan sila suno sa layi sang Dios.

82 Kag kon posible, kinahanglanon nga ang obispo magatambong man.

83 Kag amo sini ang himuon ninyo sa tanan nga kaso nga ipresentar sa inyo.

84 Kag kon ang isa ka lalaki ukon babayi magpangawat paagi sa puwersa ukon pahog, itugyan sia sa sibil nga mga awtoridad suno sa layi sang duta.

85 Kag kon sia magpangawat, itugyan sia sa sibil nga mga awtoridad suno sa layi sang duta.

86 Kag kon sia magbinutig, itugyan sia sa sibil nga mga awtoridad suno sa layi sang duta.

87 Kag kon sia maghimo sing bisan ano nga kalainan, itugyan sia sa layi bisan pa sa sinang iya sang Dios.

88 Kag kon ang imo utod (sa simbahan) makasala batok sa imo, makigkita sa iya sa tunga ninyo nga duha lamang; kag kon magkumpisar sia dapat ka makig-uli sa iya.

89 Kag kon indi sia magkumpisar itugyan mo sia sa simbahan, indi sa mga miyembro kundi sa mga elder. Kag dapat himuon ini sa isa ka miting, kag inang indi sa atubang sang kalibutan.

90 Kag kon ang imo utod makasala batok sa madamo, pinahan sia sa atubang sing madamo.

91 Kag kon ang bisan sin-o makasala sing hayag, dapat sawayon sia sing hayag agud nga mahuya sia. Kag kon indi sia magkumpisar, itugyan sia sa layi sang Dios.

92 Kon ang bisan sin-o makasala sing sekreto, dapat sawayon sia sing sekreto agud nga may kahigayunan sia sa pagkumpisar sing sekreto sa sinang iya ginhimoan sang sala, kag sa Dios agud nga ang simbahan indi maghambal nga may pagbasol parte sa iya.

93 Kag gani ini ang paagi nga dal-on ninyo ang inyo kaugalingon sa tanan nga butang.