Seksyon 44
Rebelasyon nga ginhatag kanday Joseph Smith nga Propeta kag Sidney Rigdon sa Kirtland, Ohio, sa ulihi nga bahin sang Pebrero 1831. Bilang pagtuman sang ginapangayo diri, nagtalana ang Simbahan sang komperensya nga pagahiwaton sa una nga bahin sang maabot nga bulan sang Hunyo.
1–3, Ang mga elder dapat magtipon sa komperensya; 4–6, Dapat mag-organisar sila suno sa mga layi sang duta kag magatatap sang mga imol.
1 Tan-awa, ini ang siling sang Ginuo sa inyo nga akon mga alagad nga nagakaigo para sa akon nga tiponon ang mga elder sang akon simbahan halin sa este kag halin sa weste, kag halin sa norte kag halin sa sur paagi sa sulat ukon sa iban pa nga paagi.
2 Kag matabo ini nga kon tampad sila, kag magtuo sa akon, igabubo ko ang akon Espiritu sa ila sa adlaw nga magtipon sila.
3 Kag matabo ini nga maglakat sila sa mga rehiyon sa palibot, kag magwali sang paghinulsol sa mga tawo.
4 Kag madamo ang mahaylo sa bagay nga maangkon ninyo ang ikasarang sa pag-organisar sang inyo mga kaugalingon suno sa mga layi sang tawo;
5 Agud nga ang inyo mga kaaway wala sang gahum sa inyo; agud nga maamligan kamo sa tanan nga butang; agud nga makasarang kamo sa pagtuman sang akon mga layi; agud nga paslawon ang tanan nga pagtinguha sang kaaway nga gub-on ang akon katawhan.
6 Tan-awa, ginasiling ko sa inyo nga kinahanglan kamo magbisita sa mga imol kag mga nagakinahanglan kag maghatag sa ila sang kaumpawan agud nga maamligan sila tubtob nga ang tanan nga butang mahimo suno sa akon layi nga inyo nabaton. Amen.