Ɔfã 44
Nyikyerɛ a wɔdze maa Joseph Smith Nkɔnhyɛnyi no na Sidney Rigdon, wɔ Kirtland, Ohio, ber a Kwakwar rokɔ n’ewiei, 1831. Asɔr no hyehyɛɛ dɛ wɔbɛyɛ ehyiadzi wɔ Obiradzi a ɔreba no n’ahyɛse dze edzi dza wɔakyerɛw wɔ ha yi ho dwuma.
1–3, Elderfo no wɔ dɛ wohyia mu wɔ nhyiamu kɛse no ase; 4–6, Ɔwɔ dɛ wɔhyehyɛ biribiara dɛ mbrɛ mbra a ɔwɔ asaase no do se na wɔhwɛ ehiafo no.
1 Hwɛ, dɛm na Ewuradze se hom mo nkowaa, muhu dɛ wɔbɛkyerɛw nkrataa anaa wɔbɛfa kwan bi do afrɛ m’asɔr mu elderfo efi boka na anee, nye etsifi na anaafo ma woebehyia mu.
2 Na ɔbɛba dɛ, susuampaara dɛ wodzi nokwar, na wɔwɔ gyedzi wɔ mo mu no, sɛ wohyia mu a, da no mubohue mo Sunsum egu hɔn do.
3 Na ɔbɛba dɛ wɔbɔkɔ mbea a ɔwɔ apaamu hɔ no do, na wɔakɛkã nnuho ho asɛm akyerɛ nkorɔfo no.
4 Na dodowara bɛsakyer ama hom eenya tum dze ahyehyɛ hom dwumadzi biara dɛ mbrɛ nyimpa mbra se.
5 Ama hom atamfo enntum enya tum wɔ hom do; na wɔbɔbɔ hom ho ban wɔ ndzɛmba nyinara mu, ama hom eetum edzi me mbra do; na nhyehyɛɛ biara a ɔtamfo no ayɛ dɛ ɔdze rohwehwɛ asɛɛ mo nkorɔfo no aayɛ kwa.
6 Hwɛ, mese hom dɛ, hom nserasera ehiafo nye abɔbɔfo na wɔmma hɔn mboa aama woeyi hɔn ahokyer efi hɔ, ama hom aakora hɔn do ekesi dɛ hom bɛyɛ ndzɛmba nyina yie dɛ mbrɛ me mbra a hom nsa akã no se. Amen.