Wase 49
Na veika sa vakatakilai yani mai vei Josefa Simici na Parofita mai Katiladi, Oaio, ena 7 ni Me, 1831, me tukuni vei Sidini Rikitoni, Pali P. Pereta kei Limeni Kopeli. Sa ciqoma na kosipeli ko Limeni Kopeli, ia e sa muria tiko ga e so na ivakavuvuli ni lotu Seka (United Society of Believers in Christ’s Second Appearing [Na iSoqosoqo Cokovata ni Vakabauti ni iKarua ni Lesu mai i Karisito]) ka dau lewena tu e liu. Eso na nodra vakabauta na Lotu Seka oya ni sa Lako oti Mai vakarua ko Karisito, ia a yalewa ena iKarua ni Nona Lako Mai ka yacana ko Ana Li. Era sega ni nanuma ni yaga na papitaiso ena wai. Era sega ni duavata kei na vakamau ka vakabauta na bula e sega kina na vakawati kei na veiyacovi. Eso talega na Seka era vakatabuya na kana lewe ni manumanu. A volai kina vakaoqo ena itukutuku makawa kei Josefa Simici, “Au a taroga na Turaga, me rawa ni vakamatatataki vinaka na tikina oqori, ka sa mani vakatakilai mai na veika oqo.” E vakalasui ena ivakatakila oqo e so na yavu ni vakabauta ni Lotu Seka. Eratou a kauta e dua na kena ilavelave na veiwekani ka tukuni e cake na yacadratou, ki na dua na nodra itikotiko na lotu Seka (volekati Kiliviladi, e Oaio) ka wilika taucoko sara vei ira, ia era a sega ni ciqoma.
1–7, Ena sega ni kilai na siga kei na auwa ena lesu mai kina na Karisito me yacova sara ni sa lako mai o Koya; 8–14, Sa kilikili me ra veivutuni na tamata, vakabauta na kosipeli, ka talairawarawa ki na veicakacaka vakalotu, me ra vakabulai kina; 15–16, Sa ilesilesi va-Kalou na vakamau; 17–21, Sa vakadonui na kana lewe ni manumanu; 22–28, Ena bulabula mai ko Saioni ka ra na seraka na Leimanaiti me vaka na rosi, ni bera na iKarua ni Lako Mai ni Turaga.
1 Dou vakatudaliga ki na noqu vosa koi kemudou na noqu tamata, io ko Sidini, kei Pali kei Limeni; ia raica, au sa kaya vakaidina vei kemudou, niu sa solia vei kemudou e dua na ivakaro mo dou lako yani ka vunautaka na noqu kosipeli sa soli vei kemudou, vei ira na lewe ni lotu Seka.
2 Raica, au sa kaya vei kemudou, era sa gadreva me ra kila vakatikina ga na dina, ka sega ni o koya taucoko, ni ra sa sega ni dodonu e mataqu ka sa dodonu me ra veivutuni.
3 Ia, au sa talai kemudrau na noqu tamata, ko Sidini kei Pali, mo drau la’ki vunautaka vei ira na kosipeli.
4 Ka na tabaki talega ki na cakacaka oqo ko Limeni na noqu tamata, me na laki vakamacala vei ira, sega ni ena veika a vulica mai vei ira, ia ena veika ga drau na vakavulici koya kina koi kemudrau na noqu tamata; ia au na vakalougatataki koya ni sa vakayacora vakakina, kevaka e sega ena sega ni kalougata.
5 Sa kaya vakaoqo na Turaga; ni sai Au na Kalou, ka’u sa tala yani ki vuravura na Luvequ e Duabau ga me vueti ira na kai vuravura, ka’u sa lewa me ra vakabulai ko ira sa vakabauti koya, ka ra cudruvi ko ira sa sega ni vakabauti koya—
6 Raica era sa cakava vua na Luve ni Tamata na ka era sa vinakata; ka sa taura na nona kaukauwa ena yasa imatau ni nona lagilagi, ka sa vakatulewa kina ena gauna oqo mai lomalagi, ka na vakatulewa tiko me yacova na gauna sa siro sobu mai kina ki vuravura me biuti ira kecega na meca e ruku ni yavana, raica sa voleka sara na kena gauna—
7 Koi au, na Turaga na Kalou, au sa tukuna na ka oqo; ia na auwa kei na tikinisiga ko ya, sa sega na tamata e kila, ko ira na agilosi mai lomalagi era sega tale ga ni kila, era na sega tu ga ni kila me yacova ni sa qai lako mai ko koya.
8 Ia, sa noqu gagadre me veivutuni na tamata kecega, ni ra sa ivalavala ca kecega, vakavo ga ko ira au sa maroroya tu me yaga vei au, o ira na tamata yalosavasava dou sa sega ni kilai ira.
9 Ia, au sa tukuna vei kemudou, ni’u sa solia vei kemudou na noqu veiyalayalati tawavakaiyalayala, io na veiyalayalati mai na ivakatekivu.
10 Kau sa vakayacora na ka kecega au a yalataka, ka ra na cuva kina na veimatanitu kecega e vuravura; ia kevaka e sega, era na vakalolovirataki, ia ko ira sa vakacerecerei ira vakataki ira, era na vakamalumalumutaki.
11 Ia, au sa vakaroti kemudou mo dou lako yani vei ira na tamata oqo, ka kaya vei ira, me vakataki Pita na noqu iapositolo e liu, ka kaya:
12 Dou vakabauta na yacana na Turaga ko Jisu, ko koya a tu e vuravura, ka na lako tale mai, na ivakatekivu kei na ivakataotioti;
13 Dou veivutuni ka papitaiso ena yacai Jisu Karisito, me vaka na ivakaro tabu, me bokoci kina na ivalavala ca;
14 Ia ko koya sa kitaka vakakina ena ciqoma na isolisoli ni Yalo Tabu, ena veitabaki ni ligadra na italatala qase ni lotu.
15 Ka dua tale, au sa kaya vakaidina vei kemudou, ko koya sa vakatabuya na vakawati, sa sega ni lesi mai vua na Kalou, ni sa ilesilesi mai vua na Kalou ki na tamata na vakawati.
16 Ia na tamata yadua sa kilikili vakalawa me dua ga na watina, a rau na yaco me le duabau ga, io ena veika kece oqo me vakataucokotaka kina ko vuravura na inaki ni kena buli;
17 Raica me ra tawana na tamata, me vaka na nona veibuli ni se bera ni buli ko vuravura.
18 Raica ko koya sa vakatabuya na kana lewe ni manumanu, me kakua ni kania na tamata, sa sega ni lesi mai vua na Kalou;
19 Ia, raica, na manumanu ni vanua kei na manumanu vuka e macawa, kei na veika kecega sa tubu mai e vuravura e sa buli me yaga vei ira na tamata, io me ra kania ka vakaisulu kina, ka me rauti ira kece vakatautauvata.
20 Ia sa sega ni dodonu me dua e sivia na ka me tu vua ka sega vei ira na so, ia sa ivalavala ca kina ko vuravura.
21 Ena ca vua na tamata sa vakadavea na dra se vakamaumautaka na lewe ni manumanu ka sega ni vakayagataka.
22 Kei na dua tale, au sa kaya vakaidina vei kemudou, ni a sega ni lako mai na Luve ni Tamata me vaka e dua na yalewa, se dua na tagane sa vulagi lako e vuravura.
23 O koya mo dou kakua ni vakacalai kina, io mo dou tudei tikoga, dou waraka ga na gauna me yavalati kina ko lomalagi ka tataivatia na vuravura vaka ka vaka me vaka e dua na tamata sa mateni, io me vakacerecerei na buca, ka vakalolovirataki na ulunivanua, ka vakalogalogavinakataki na vanua sukusukura—ia oqo ena gauna sa na uvuca kina na agilosi na nona davui.
24 Ia ni sa bera ni yaco na siga sa levu ni Turaga, era na bulabula sara na Jekope ena loma ni lekutu, ka ra na seraka na Leimanaiti me vaka na rosi.
25 Raica ena bulabula sara ko Saioni ena veidelana ka reki ena ulunivanua, ka ra na qai soqoni vata yani ki na vanua ka’u sa digitaka.
26 Raica, au sa kaya vei kemudou, dou lako yani me vaka ka’u sa vakaroti kemudou; dou veivutunitaka na nomudou ivalavala ca kecega; dou kerekere ka na soli vei kemudou; dou tukituki ka na dolavi vei kemudou.
27 Raica, au na liutaki kemudou ka muri tale ga; io au na tiko ena kemudou maliwa, raica dou na sega ni vakamaduataki.
28 Raica, Koi Au ko Jisu Karisito, io au na lako vakidacala mai. Ena yaco vakakina. Emeni.