Seksen 51
Revelesen we Lod i givim tru long Profet Josef Smit, long Tompson, Ohaeo, long 20Â Mei 1831. Long taem ia, olgeta Sent oli bin stap muv, oli aot long ol stet long Is saed, mo oli stat blong kasem Ohaeo, mo i bin gat nid blong stretem ol samting blong mekem se oli gat ples blong stap. From we wok ia i stap stret anda long ofis blong bisop, Bisop Edwod Patrij i bin askem instraksen long saed blong poen ia, mo Profet i bin askem long Lod.
1–8, Lod i jusum Edwod Patrij blong stretem fasin blong givim ol wok mo ol propeti; 9–12, Olgeta Sent oli mas mekem ol samting long ones fasin mo bambae oli kasem i semmak; 13–15, Oli mas gat wan stoahaos blong bisop mo oli mas oganaesem ol propeti folem loa blong Lod; 16–20, Ohaeo i mas stap olsem wan ples blong stap long hem blong sot taem nomo.
1 Lisin gud long mi, Lod, God blong yufala i talem, mo bambae mi toktok long wokman blong mi, Edwod Patrij, mo givim ol daereksen long hem; from i mas nid se hem i kasem ol daereksen long olsem wanem blong oganaesem ol pipol ia.
2 From i mas nid se oli mas oganaesem olgeta folem ol loa blong mi; sapos i no olsem, bambae mi katemaot olgeta.
3 Taswe, wokman blong mi, Edwod Patrij, mo olgeta we hem i bin jusum olgeta, we mi mi glad tumas long olgeta, i mas givim long ol pipol ia, pat we i blong olgeta, evri man i folem famli blong hem, mo folem situesen blong hem mo ol samting we hem i wantem mo folem ol nid blong hem.
4 Mo wokman blong mi, Edwod Patrij, taem bae hem i givim wan pat i go long wan man, i mas givim hem tu wan pepa we oli raetem, we i talem tru se hemia i pat blong hem, blong hem i holem pepa ia, mo tu, i holem raet ia mo pat ia insaed long jos, kasem taem we hem i brekem loa mo oli faenem hem se hem i nomo klin inaf, tru long voes blong jos, folem ol loa mo ol kavenan blong jos, blong hem i pat blong jos ia.
5 Mo sapos hem i brekem ol loa, mo oli faenem hem se hem i no klin inaf blong stap pat blong jos ia, bambae hem i no gat paoa blong tekem pat ia we hem i bin konsekretem long bisop, blong givim long olgeta we oli pua mo oli stap long nid we oli blong jos blong mi; taswe, bambae hem i no holemtaet presen ia, be bae hem i save tekem nomo pat ia we oli givim long hem wetem wan pepa.
6 Mo olsem ia nao, bambae oli mekem ol samting oli stap gud evriwan, folem ol loa blong kantri.
7 Mo wanem we i blong ol pipol ia, bisop i mas givim long ol pipol ia folem loa.
8 Mo mane ia we i stap blong ol pipol ia—oli mas jusum wan ripresentativ long ol pipol ia, blong hem i tekem mane ia blong i givim kaekae mo klos, folem wanem we pipol ia i wantem.
9 Mo evri man i mas mekem samting wetem ones fasin, mo i semmak long medel blong pipol ia, mo i kasem i semmak, blong oli stap wan, olsem we mi bin komandem yufala.
10 Mo wanem we i blong pipol ia, oli no mas tekemaot long olgeta mo givim i go long wan narafala jos.
11 Taswe, sapos wan narafala jos i wantem kasem mane long jos ia, olgeta oli mas pembak long jos ia, bakegen, folem wanem we bae oli agri long hem;
12 Mo hemia, bambae oli mekem tru long bisop o long wan ripresentativ, we voes blong jos i mas jusum hem.
13 Mo bakegen, bisop i mas jusum wan stoahaos blong jos ia; mo evri samting, tugeta, mane mo kaekae, we i moa long wanem we oli nidim blong lukluk long wanem we pipol ia i wantem, bae oli mas kipim i stap long han blong bisop.
14 Mo hem i mas holemtaet sam blong hemwan i stap, from ol nid blong hem, mo from ol nid blong famli blong hem, from se bambae hem i wok blong mekem bisnis ia.
15 Mo olsem ia nao, mi givim long pipol ia, wan spesel janis blong oganaesem olgetawan folem ol loa blong mi.
16 Mo mi givim graon ia long olgeta blong wan smol taem, kasem taem we mi, Lod, bambae mi givim wan narafala samting long olgeta, mo komandem olgeta blong aot long ples i go;
17 Mo aoa mo dei ia, mi no givim long olgeta; taswe, olgeta oli mas mekem samting long graon ia olsem se bae oli stap ia blong plante yia, mo hemia bambae i kamaot blong gud blong olgeta.
18 Luk, hemia bae i wan eksampol long yu, wokman blong mi, Edwod Patrij, blong yusum long ol narafala ples, long evri jos.
19 Mo huia mi luk se hem i wan wokman we i fetful, i stret, mo i waes, bambae i kasem glad blong Lod blong hem, mo bambae i kasem laef we i no save finis.
20 I tru, mi talem long yufala. Mi mi Jisas Kraes, we mi kam kwiktaem, long wan aoa we yufala i no tingting long hem. I olsem. Amen.