Seksyon 52
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-6 sang Hunyo 1831. Isa ka komperensya ang ginhiwat sa Kirtland nga nagsugod sa ika-tatlo kag naghingapos sa ika-anum sang Hunyo. Sa sining komperensya ang una nga pinasahi nga mga ordinasyon sa palangakoan sang mataas nga pari ginhimo, kag pila ka mga pagpahayag sing malain kag nagapatalang nga mga espiritu ang nahibaloan kag ginsaway sila.
1–2, Ang madason nga komperensya natalana nga pagahiwaton sa Missouri; 3–8, Ang pagpili sing pila ka mga elder nga magapanglakaton sing ulolupod ginhimo; 9–11, Ang mga elder dapat magtudlo sang ginsulat sang mga apostoles kag mga propeta; 12–21, Inang napasanagan sang Espiritu nagadala sang bunga sang pagdayaw kag kaalam; 22–44, Madamo nga elder ang ginapili sa pagwali sang ebanghelyo samtang nagapakadto sa Missouri para sa komperensya.
1 Tan-awa, ini ang siling sang Ginuo sa mga elder nga iya gintawag kag ginpili sa sining ulihing mga adlaw paagi sa tingug sang iya Espiritu—
2 Nga nagasiling: Ako, nga Ginuo, magapahibalo sa inyo sang luyag ko nga himuon ninyo halin sa sini nga tion tubtob sa madason nga komperensya nga dapat hiwaton sa Missouri sa duta nga akon igakonsagrar sa akon katawhan, nga nagkalabilin sang katawhan ni Jacob, kag inang mga manunubli suno sa kasugtanan.
3 Gani, sa pagkamatuod ginasiling ko sa inyo, palakta ang akon mga alagad nga sanday Joseph Smith Jr., kag Sidney Rigdon pagkatapos nga mahimo na ang mga pagpanghanda sa pagbiya sang ila mga puluy-an, kag palakta sila pakadto sa duta sang Missouri.
4 Kag kon tampad sila sa akon, igapahayag sa ila kon ano ang ila himuon;
5 Kag kon tampad sila, igapahibalo man sa ila ang duta nga inyo palanublion.
6 Kag kon indi sila tampad, pagasikwayon sila suno sa akon pagbuot nga nagakaigo para sa akon.
7 Kag sa liwat, sa pagkamatuod ginasiling ko sa inyo, palakta sing gilayon ang akon mga alagad nga sanday Lyman Wight kag John Corrill;
8 Kag palakta man ang akon mga alagad nga sanday John Murdock kag Hyrum Smith sa Missouri nga nagaagi sa Detroit.
9 Kag palakta sila halin sa sina nga lugar nga nagawali sang pulong sa dalanon, nga wala na sing iban pa nga ginahambal kundi inang ginsulat sang mga propeta kag mga apostoles, kag inang ginatudlo sa ila sang Manugpasulhay paagi sa pangamuyo sang pagtuo.
10 Palakta sila sing tagduha-duha, kag sa amo nga paagi pawaliha sila sa dalanon sa tagsa ka pagtililipon nga nagabunyag paagi sa tubig, kag nagatakdong sang mga kamot sa higad sang tubig.
11 Kay ini ang siling sang Ginuo, padalion ko ang akon buluhaton sa pagkamatarong, kay maabot ang mga adlaw nga magahukom ako tubtob sa pagdaug.
12 Kag paandama ang akon alagad nga si Lyman Wight kay luyag ni Satanas nga ayagon sia pareho sang upa sang humay.
13 Kag tan-awa, sia nga tampad padumalahan ko sa madamo nga butang.
14 Kag sa liwat, pagahatagan ko kamo sang sulundan sa tanan nga butang agud nga indi kamo magtalang; kay nagalibot si Satanas sa duta, kag masako sia sa pagpatalang sang mga nasyon—
15 Karon, sia nga nagapangamuyo nga mahinulsulon ang espiritu, ang amo man ginabaton nakon kon magtuman sia sang akon mga ordinansa.
16 Sia nga nagahambal nga mahinulsulon ang espiritu, nga malulo kag nagapalig-on ang lengguahe, ang amo man iya sang Dios kon nagatuman sia sang akon mga ordinansa.
17 Kag sa liwat, sia nga nagakurog sa akon gahum pabakuron, kag magadala sang bunga sang pagdayaw kag kaalam suno sa mga rebelasyon kag mga kamatuoran nga ginhatag ko sa inyo.
18 Kag sa liwat, bisan pa suno sa sining sulundan, sia nga nadaug kag wala nagadala sang bunga sang pagdayaw kag kaalam indi akon.
19 Gani, paagi sining sulundan mahibaloan ninyo ang mga espiritu sa tanan nga sirkumstansya sa idalom sang kalangitan.
20 Kag nag-abot na ang mga adlaw; pagatumanon ini sa katawhan suno sa ila pagtuo.
21 Tan-awa, ginahatag ini nga kasugoan sa tanan nga elder nga akon ginpili.
22 Kag sa liwat, sa pagkamatuod ginasiling ko sa inyo, palakta ang akon mga alagad nga sanday Thomas B. Marsh kag Ezra Thayre nga nagawali sang pulong sa dalanon pakadto sa sining amo man nga duta.
23 Kag sa liwat, palakta ang akon mga alagad nga sanday Isaac Morley kag Ezra Booth nga nagawali man sang pulong sa dalanon pakadto sa sining amo man nga duta.
24 Kag sa liwat, palakta ang akon mga alagad nga sanday Edward Partridge kag Martin Harris upod sang akon mga alagad nga sanday Sidney Rigdon kag Joseph Smith Jr.
25 Palakta man ang akon mga alagad nga sanday David Whitmer kag Harvey Whitlock nga nagawali sang pulong sa dalanon pakadto sa sining amo man nga duta.
26 Kag palakta ang akon mga alagad nga sanday Parley P. Pratt kag Orson Pratt nga nagawali sang pulong sa dalanon pakadto sa sining amo man nga duta.
27 Kag palakta man ang akon mga alagad nga sanday Solomon Hancock kag Simeon Carter nga nagawali sang pulong sa dalanon pakadto sa sining amo man nga duta.
28 Palakta man ang akon mga alagad nga sanday Edson Fuller kag Jacob Scott.
29 Palakta man ang akon mga alagad nga sanday Levi W. Hancock kag Zebedee Coltrin.
30 Palakta man ang akon mga alagad nga sanday Reynolds Cahoon kag Samuel H. Smith.
31 Palakta man ang akon mga alagad nga sanday Wheeler Baldwin kag William Carter.
32 Ipaordinan kag palakta man ang akon mga alagad nga sanday Newel Knight kag Selah J. Griffin.
33 Huo, sa pagkamatuod ginasiling ko, palakta sila tanan sa isa ka lugar sa nagkalain-lain nga mga alagyan, kag ang isa ka tawo indi dapat magtukod sa pundasyon nga napasad sing iban ukon maglakat sa alagyan sing iban.
34 Sia nga tampad, ang amo man pagaamligan kag pagabugayan sing madamo nga bunga sang pagdayaw kag kaalam.
35 Kag sa liwat, ginasiling ko sa inyo, palakta ang akon mga alagad nga sanday Joseph Wakefield kag Solomon Humphrey sa kadutaan sa este;
36 Paobraha sila upod sang ila mga panimalay nga wala na sing iban pa nga ginapahayag kundi ang mga panudlo sang mga propeta kag mga apostoles nga ila nakita kag nabatian kag sigurado nga ginapatihan agud nga matuman ang mga propesiya.
37 Bangod sang paglapas, bawia inang ginhatag kay Heman Basset, kag itakdong sa ulo ni Simonds Ryder.
38 Kag sa liwat, sa pagkamatuod ginasiling ko sa inyo, ipaordinan si Jared Carter nga isa ka pari, kag amo man si George James.
39 Pabantaya ang nabilin nga mga elder sa mga simbahan, kag ipapahayag sa ila ang pulong sang ebanghelyo sa mga rehiyon sa palibot nila; kag paobraha sila sa ila kaugalingon nga mga kamot agud nga wala sang pagsimba sa mga dios-dios ukon paghimo sang mga kalainan.
40 Kag dumduma sa tanan nga butang ang mga imol kag ang mga nagakinahanglan, ang mga nagamasakit kag ang mga nagaantos kay sia nga wala nagahimo sining mga butang, ang amo man indi akon disipulo.
41 Kag sa liwat, padal-a ang akon mga alagad nga sanday Joseph Smith Jr., kag Sidney Rigdon kag Edward Partridge sang rekomendasyon halin sa simbahan. Kag kuhai man sini ang akon alagad nga si Oliver Cowdery.
42 Kag gani, pareho sa akon ginsiling, kon tampad kamo tiponon ninyo ang inyo mga kaugalingon agud magkasadya sa duta sang Missouri nga amo ang duta nga inyo palanublion, nga subong amo ang duta sang inyo mga kaaway.
43 Apang, tan-awa, ako nga Ginuo, padalion ko ang pagtukod sang siyudad sa iya sini tion, kag pagakoronahan ang mga tampad sang kalipay kag sang kasadya.
44 Tan-awa, ako si Jesucristo nga Anak sang Dios, kag pagabayawon ko sila sa katapusan nga adlaw. Kag gani amo sini. Amen.