Seksyon 56
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-15 sang Hunyo 1831. Ini nga rebelasyon nagasilot kay Ezra Thayre sa indi pagtuman sang nauna nga rebelasyon (ang “kasugoan” nga ginatumod sa bersikulo 8) nga nabaton ni Joseph Smith para sa iya nga nagatudlo kay Thayre parte sa iya mga tulumanon sa uma ni Frederick G. Williams nga iya ginpuy-an. Ginbawi man sang sini nga rebelasyon ang tawag kay Thayre nga maglakat sa Missouri upod kay Thomas B. Marsh (tan-awa sa seksyon 52:22).
1–2, Kinahanglan pas-anon sang mga Santos ang ila krus kag sundon ang Ginuo agud makabaton sang kaluwasan; 3–13, Ang Ginuo nagasugo kag nagabawi, kag ang mga di-matinumanon ginasikway; 14–17, Kalisud sa mga manggaranon nga indi magbulig sa mga imol, kag kalisud sa mga imol nga di-masinulub-on ang mga tagipusuon bangod sa sala; 18–20, Bulahan ang mga imol nga putli sing tagipusuon kay panublion nila ang duta.
1 Dungga ninyo, O mga katawhan nga nagadala sang akon ngalan, siling sang Ginuo nga inyo Dios; kay tan-awa, ang akon kaakig nagadabadaba batok sa mga nagarebelde, kag mabatyagan nila ang akon butkon kag akon kaugot sa adlaw sang pagbisita, kag sang kaakig sa mga nasyon.
2 Kag sia nga indi magpas-an sang iya krus kag magsunod sa akon, kag magtuman sang akon mga kasugoan, ang amo man indi maluwas.
3 Tan-awa, ako, nga Ginuo, nagasugo; kag sia nga indi magtuman pagasikwayon sa akon kaugalingon nga natalana nga tion, pagkatapos nga nagsugo ako kag wala gintuman ang kasugoan.
4 Gani ako, nga Ginuo, nagasugo kag nagabawi suno sa nagakaigo para sa akon; kag ini tanan pagasabton sa mga ulo sang mga nagarebelde, siling sang Ginuo.
5 Gani, ginabawi ko ang kasugoan nga ginhatag sa akon mga alagad nga sanday Thomas B. Marsh kag Ezra Thayre, kag ginahatag ang bag-o nga kasugoan sa akon alagad nga si Thomas nga maglakat sia sing gilayon sa duta sang Missouri, kag magalakat man upod sa iya ang akon alagad nga si Selah J. Griffin.
6 Kay tan-awa, ginabawi ko ang kasugoan nga ginhatag sa akon mga alagad nga sanday Selah J. Griffin kag Newel Knight bangod sang kabatinggilan sang akon katawhan nga yara sa Thompson kag ang ila mga pagrebelde.
7 Gani, ipabilin ang akon alagad nga si Newel Knight upod sa ila; kag ang tanan nga luyag maglakat nga mahinulsulon sa akon atubang tugoti nga maglakat, kag giyahan niya sila sa duta nga akon ginhatag.
8 Kag sa liwat, sa pagkamatuod ginasiling ko sa inyo nga kinahanglan maghinulsol ang akon alagad nga si Ezra Thayre sang iya bugal, kag sang iya pagkamaiyaiyahon, kag tumanon ang una nga kasugoan nga akon ginhatag sa iya parte sa lugar nga iya ginapuy-an.
9 Kag kon himuon niya ini, bangod wala sang himuon nga pagbahin-bahin sang duta, pagapilion sia sa gihapon nga magkadto sa duta sang Missouri;
10 Indi gani ibalik sa iya ang kwarta nga iya ginbayad, kag maghalin sa lugar, kag sikwayon halin sa akon simbahan, siling sang Ginuong Dios sang mga kasoldadohan;
11 Kag bisan ang langit kag ang duta magtaliwan, ining mga pulong indi magtaliwan, kundi matuman.
12 Kag kon kinahanglan bayaran sang akon alagad nga si Joseph Smith Jr. ang kwarta, tan-awa, ako, nga Ginuo, magahatag sini sa iya liwat sa duta sang Missouri agud nga inang iya mga pagabatonan sang kwarta matumbasan liwat suno sa sinang ila ginahimo;
13 Kay makabaton sila suno sa sinang ila ginahimo, bisan pa mga duta bilang ila palanublion.
14 Tan-awa, ini ang siling sang Ginuo sa akon katawhan—madamo kamo sing kinahanglan himuon kag hinulsulan; kay tan-awa, naglab-ot sa akon ang inyo mga sala, kag wala ginpatawad bangod nagatinguha kamo sa paglaygay sang tagsa-tagsa sa inyo kaugalingon nga mga paagi.
15 Kag wala nakontento ang inyo mga tagipusuon. Kag wala ninyo ginatuman ang kamatuoran apang nagapangalipay sa indi matarong.
16 Kalisud sa inyo mga manggaranon nga indi maghatag sang inyo manggad sa mga imol kay magapalain sang inyo mga kalag ang inyo mga manggad; kag ini ang inyo panalambiton sa adlaw sang pagbisita, kag sang paghukom, kag sang kaakig: Naglipas na ang ani, natapos na ang tig-ilinit, kag wala naluwas ang akon kalag!
17 Kalisud sa inyo mga imol nga di-masinulub-on ang mga tagipusuon bangod sa sala, nga indi mahinulsulon ang mga espiritu, kag wala kabulusgan ang mga tiyan, kag indi mapunggan ang mga kamot sa pagkuha sang mga pagkabutang sing iban nga tawo, nga puno sang kadalok ang mga mata, kag indi magpangabudlay sa inyo kaugalingon nga mga kamot!
18 Apang bulahan ang mga imol nga putli sing tagipusuon, nga masinulub-on ang mga tagipusuon bangod sa sala, kag mahinulsulon ang mga espiritu kay makita nila ang ginharian sang Dios nga nagaabot sa gahum kag dako nga himaya agud hilwayon sila; kay mangin ila ang kabuganaan sang duta.
19 Kay tan-awa, magakari ang Ginuo kag pagadal-on niya ang iya balus, kag pagatumbasan niya ang tagsa ka tawo, kag magasinadya ang mga imol;
20 Kag panublion sang ila mga kaliwat ang duta sa tanan nga henerasyon, tubtob sa wala’y katapusan. Kag karon ginatapos ko ang paghambal sa inyo. Kag gani amo sini. Amen.