Ɔfã 56
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Obiradzi 15, 1831. Nyikyerɛ yi tsẽa Ezra Thayre dɛ woenndzi nyikyerɛ a wɔdze ama dadaw no do (“mbrasɛm” a wɔakã ho asɛm wɔ nyiyimu 8 no), a Joseph Smith nyaa maa no no, a ɔkyerɛ Thayre fa no ndwuma wɔ Frederick G Williams asaase a ɔtse do no do. Nyikyerɛ yi a odzi do yi no twe Thayre ne frɛ dɛ ɔnye Thomas B. Marsh ntu kwan nkɔ Missouri no san ekyir (hwɛ ɔfã 52:22).
1–2, Ɔwɔ dɛ Ahotseweefo no fa hɔn mbeamudua no na wɔkã Ewuradze do ama woeenya nkwagye; 3–13, Ewuradze hyɛ mbra na ɔdan no, na wotwa asokyewfo no kyen; 14–17, Esikafo a wɔmmboa ehiafo wondue, na ehiafo a hɔn akoma mmbobɔe wondue; 18–20, Nhyira nkã ehiafo a hɔn akoma mu tsew, na hɔn na wobenya asaase no edzi.
1 Hom ntsie, O hom a hom bɔ me dzin, Ewuradze hom Nyankopɔn no na ɔse; na hwɛ, m’ebufuw adzɛw etuatsewfo do, na wobohu m’abasa nye mbrɛ m’ebufuhyew tse wɔ nsera da a m’ebufuw bɛba aman do no.
2 Na nyia ɔnnkɛfa ne mbeamudua na ɔakã mo do, na onnkedzi me mbrasɛm do no, wɔrenngye no nkwa.
3 Hwɛ, emi Ewuradze, mehyɛ mbra; na nyia onnkedzi do no, wobotwa no akyen wɔ mankasa me mber pa mu, ber a mahyɛ mbra no ewie na woebu mbra no.
4 Dɛm ntsi, emi Ewuradze, mehyɛ mbra na mekantse no so, dɛ mbrɛ mohwɛ a oye ma me; na iyi nyina wobobua egu etuatsewfo no tsir do, Ewuradze na ɔse.
5 Dɛm ntsi, masesã mbra a me dze maa mo nkowaa Thomas B. Marsh na Ezra Thayre, na medze mbra fofor ma m’akowaa Thomas dɛ ontu no kwan no ntsɛmara nkɔ Missouri asaase do, na m’akowaa Selah J. Griffin so nye no bɔkɔ.
6 Na hwɛ, osian mo nkorɔfo a wɔwɔ Thompson hɔn akɔnkye ntsi, masesã mbra a mehyɛe dze maa mo nkowaa Selah J. Griffin na Newel Knight.
7 Dɛm ntsi, hom mma m’akowaa Newel Knight nka hɔn nkyɛn; na dodowara a wɔabotow wɔ m’enyim na wɔpɛ dɛ wɔkɔ no botum akɔ, na ɔbɛyɛ hɔn kandzifo nye hɔn akɔ asaase a makyerɛ no do.
8 Na bio, nokwar, mese wo dɛ, ɔwɔ dɛ m’akowaa Ezra Thayre nu noho fi n’ahantanyɛ nye ne pɛsɛankonya ho, na odzi mbrasɛm a medze ama no dada no do, dza mehyɛɛ no a ɔfa bea a ɔtse ho no.
9 Na sɛ ɔbɛyɛ dɛm dze a, ɔnam dɛ wɔrennkyekyɛ asaase no mu ntsi, wɔbɛda ho ama ɔakɔ Missouri asaase no do;
10 Annyɛ dɛm a wɔdze ne sika a oetua no bɛma no, na oefi bea no do akɔ, na wobeyi no edzi efi m’asɔr mu, dɔm hen Ewuradze Nyankopɔn na ɔse;
11 Na sɛ sor na asaase twa mu kɔ mpo a, nsɛm yinom nnkotwa mu da, mbom wɔbɛhyɛ no mã.
12 Na sɛ ɔwɔ dɛ m’akowaa Joseph Smith, Kakraba, tua sika no a, hwɛ, emi Ewuradze, mubotua ama no bio wɔ Missouri asaase do, ama hɔn a wɔdze bɛma no no enya ho akatua bio, dɛ mbrɛ hɔn ndzeyɛɛ tse;
13 Osiandɛ dza wɔyɛ no ara na hɔn nsa bɛkã ho akatua, wɔ nsaase no mpo a ɔbɛyɛ hɔn egyapadze.
14 Hwɛ, dɛm na Ewuradze kã kyerɛ mo nkorɔfo—hom wɔ ndzɛmba pii yɛ na ndzɛmba pii nu homho wɔ ho; na hwɛ, hom bɔn afow aba mo hɔ, na bɔnfakyɛ biara nnyi hɔ ma hom, osiandɛ hom dan homankasa hom afotu.
15 Na hom akoma nntɔ hom yamu. Na hom nndzi nokwar ekyir, mbom hom wɔ enyigye wɔ dza ɔnntsen ho.
16 Hom esikafo a hom mmfa hom ahonyadze mma ehiafo wondue, na hom sika bɔdɔ hom akra ho nkandar; na iyi bɛma hom etwa kwadwom wɔ nsera nye atsɛmbu nye ebufuhyew da no mu. Otwaber apa ho, ɔhyewber aba ewiei, na me kra ennya nkwagye!
17 Hom ehiafo a hom akoma mmbobɔe wondue, hom a hom esunsum mmbotowee, na hom yafun mmee da, na hom nnyii hom nsa mmfii binom ndzɛmba ho, na enyiber ahyɛ hom enyiwa mu mã, na hom remmfa homankasa hom nsa nnyɛ edwuma!
18 Na mbom nhyira nkã hom ehiafo a hom akoma mu tsew, na hɔn a hɔn akoma abobɔ, na hɔn esunsum abotow, osiandɛ wobohu Nyankopɔn n’ahenman no dɛ ɔreba wɔ tum nye enyimnyam kɛse mu dze abɛgye hɔn; na asaase ne seradze no bɛyɛ hɔndze.
19 Na hwɛ, Ewuradze bɛba, na ɔdze n’akatua nam, na obotua obiara kaw, na ehiafo bedzi dɛw.
20 Na hɔn ebusuasantsen benya asaase no edzi fi ebusuasantsen ekesi ebusuasantsen afebɔɔ kesi afebɔɔ. Na afei medze dza mowɔ kã kyerɛ hom no aba ewiei. Ɔnyɛ hɔ dɛm. Amen.