Wase 59
Na veika sa vakatakilai yani mai vei Josefa Simici na Parofita, mai Saioni, na yasayasa vaka-Jekesoni, Misuri, ena 7 ni Okosita, 1831. Ni bera na ivakatakila oqo, a sa vakatabui na qele, me vaka na veidusimaki ni Turaga, ka vakatabui na vanua me na qai tara kina na valetabu. Ena siga a ciqomi kina na ivakatakila oqo, a mate kina o Poli Naiti na wati Josefa Naiti Levu, na imatai ni lewe ni Lotu me mate mai Saioni. O ira na lewenilotu era vakaibalebaletaka na raivotu oqo me “idusidusi vei ira na Yalododonu ena ivakarau me rokovi kina na siga ni vakacecegu kei na ivakarau ni lolo kei na masu.”
1–4, Era na vakalougatataki na Yalododonu yalodina ni Saioni; 5–8, Me ra lomana ka qarava na Turaga ka muria na Nona ivunau; 9–19, Era sa vakalougatataki vakayago ka vakayalo na Yalododonu, ni ra sa rokova ka vakatabuya na Siga ni Turaga; 20–24, Sa yalataki vei ira na ivalavala dodonu ni ra na rawata na vakacegu ena vuravura oqo kei na bula tawamudu ena vuravura sa bera mai.
1 Raica, ena kalougata, sa kaya na Turaga, ko ira era lako mai ki na vanua oqo ena mata sa vakatabakidua ki na noqu lagilagi, me vaka na noqu ivakaro.
2 Ko ira era bula tiko era na taukena na vanua, ia ko ira sa mate era sa vakacegu mai na nodra cakacaka kecega, ia ena muri ira na nodra ivalavala; ka ra na rawata e dua na isala ena vale nei Tamaqu, ka’u sa vakarautaka tu me nodra.
3 Io, sa kalougata ko ira sa tiko na yavadra ena vanua ko Saioni, sa talairawarawa tiko ki na noqu kosipeli; io era na ciqoma me kedra isau na veika vinaka kecega e vuravura, ka ra na vuavuaivinaka sara.
4 Ka ra na vakaisalataki talega ena veivakalougatataki mai cake, io, kei na ivakaro e vuqa, kei na ivakatakila ena kena gauna—vei ira era sa yalodina ka gugumatua tiko ga vei au.
5 O koya, au sa solia vei ira e dua na ivakaro, ka kaya: Mo lomana na Turaga na nomu Kalou ena lomamu taucoko, nomu igu taucoko, vakasama, kei na kaukauwa; io mo qaravi koya ena yacai Jisu Karisito.
6 Mo lomana na kai nomu me vaka ko sa lomani iko. Mo kakua ni butako; se ia na veibutakoci, se laba, ka sega ni kitaka e dua na ka vakaoqori.
7 Mo vakavinavinakataka na Turaga na nomu Kalou ena veika kecega.
8 Mo vakacabora na isoro ena buladodonu vua na Turaga na nomu Kalou, io na loma raramusumusu kei na yalo bibivoro.
9 Ka mo qarauni iko vakavinaka me kakua ni tauvi iko na duka ni ka vakavuravura, ia mo lako ki na vale ni masumasu ka cabora na nomu sakaramede ena noqu siga tabu.
10 Ni sai koya dina oqo na siga sa lesi vei iko mo vakacegu kina mai na nomu cakacaka, io mo qaravi koya ga sa Cecere Sara ena gumatua;
11 Ia na nomu yalayala me vakacabori tiko ena yalododonu ena veisiga kecega kei na veigauna kecega;
12 Ia nanuma tiko ena siga ni Turaga, e dai, mo vakacabora na nomu isoro ka sokalou vei koya sa Cecere Sara, io mo tusanaka na nomu ivalavala ca vei ira na tacimu ena lotu kei na Turaga.
13 Ia mo kakua ni kitaka e dua na cakacaka ena siga oqo, ia mo vakarautaka ga na kakana e ganita ena lomadina io me taucoko kina na lolo, se, ena dua tale na kena ivosavosataki, me vuabale kina na nomu marau.
14 E dina, sai koya oqo na lolo kei na masumasu, se e dua tale na kena ivosavosataki, na yalomarau kei na masumasu.
15 Ia ni dou sa kitaka na veika kece oqo ena vakavinavinaka, ena yaloreki kei na mata mamarau, sega ena dredre velavela, ni sa ivalavala ca oqo, ia ena yaloreki ga kei na mata mamarau—
16 Au sa kaya vakaidina, kevaka dou sa kitaka na veika oqo, na veika taucoko e delai vuravura ena nomudou, na manumanu ni vanua kei na manumanu vuka, kei na ka sa kaba ena vunikau kei na ka sa lako voli e delai vuravura;
17 Io, na co, kei na veika vinaka kecega sa tubu mai e vuravura, na kakana se me isulu, se me tara kina na vale, se me lololo, se me loga kau vuata, se na iteitei, se na were ni vaini;
18 Io, na ka kecega sa tubu mai e vuravura, ena kedra dui gauna, sa buli me vinaka ka yaga vei ira na tamata, ia me reki kina na mata ka marau kina na yalo;
19 Io, me kakana kei na i sulu, na kena ikanakana kei na kena iboi, me vakaukauwataka na yago ka vakabulabulataka na yalo.
20 Ka sa yalo vakacegu na Kalou ni sa solia na ka kecega oqo vua na tamata; ia oqori ga na ka era sa buli kina, ia ena vakatulewa, me vakayagataki vakavuku, me kakua ni vakasabusabutaki, me kua talega ni taurivaki vakatawadodonu.
21 Ka ni sega tale ni dua na ka me da ivalavala ca kina vua na Kalou na tamata, se me tau kina na nona cudru waqawaqa, ia o ira ga era sega ni vakatusa na ligana ena ka kecega, ka talaidredre tale ga ki na nona ivunau.
22 Raica, a ka oqo sa tukuni tu ena lawa kei na nodra vosa na parofita; o koya, mo dou kakua ni taroga tale vei au na veika oqo.
23 Ia mo dou kila ni ko koya sa vakayacora tiko vakadodonu na nona itavi ena rawata vakaidina na kena isau, io na vakacegu ena vuravura oqo, kei na bula tawamudu ena vuravura sa bera mai.
24 Koi Au, na Turaga, au sa tukuna na veika oqo, ka sa vakadinadinataka na Yalo. Emeni.