Seksen 62
Revelesen we Lod i givim, tru long Profet Josef Smit, samples long saed blong Misuri Reva long Jariton, long Misuri, long namba 13Â Ogis 1831. Long dei ia, Profet mo grup blong hem, we oli bin stap long rod blong olgeta aot long Indipendens i go long Ketlan, oli bin mitim sam elda we oli bin stap wokbaot long rod blong olgeta blong go long graon blong Saeon, mo, afta we oli gritim olgeta wetem glad, oli kasem revelesen ia.
1–3, Oli rekodem ol testemoni long heven; 4–9, Ol elda oli mas travel mo prij folem jajmen blong olgetawan mo olsem we Spirit i talem long olgeta.
1 Luk, mo lisin gud, O yufala, ol elda blong jos blong mi, Lod God blong yufala i talem, hem we i Jisas Kraes, loya blong yufala, we i save ol samting we i no strong long man, mo i save olsem wanem blong givhan long olgeta we oli kasem temtesen.
2 Mo i tru, tufala ae blong mi oli stap long olgeta we oli no go yet antap long graon blong Saeon; taswe, misin blong yufala i stap yet blong yufala i finisim.
3 Be, mi blesem yufala, from testemoni we yufala i talem, oli rekodem long heven blong ol enjel oli lukluk long hem; mo oli glad long yufala, mo mi fogivim ol sin blong yufala.
4 Mo naoia gohed long rod blong yufala. Yufala i kam tugeta long graon blong Saeon; mo holem wan miting, mo stap glad tugeta, mo mekem wan tabu seremoni long Hae God we I Hae Olgeta.
5 Mo afta, yufala i save gobak blong testifae, yes, mo tu, yufala evriwan tugeta, o long tutu, olsem we yufala i ting se i gud, mo hemia i nomata long mi; be nomo, yufala i stap fetful, mo talemaot ol gud nius i go long ol pipol we oli stap laef long wol, o long medel blong ol kongregesen blong ol nogud man.
6 Luk, mi Lod, mi bin mekem yufala i kam tugeta blong mekem se promes ia i hapen, blong olgeta we oli fetful long medel blong yufala oli stap sef mo oli stap glad tugeta long graon blong Misuri. Mi, Lod, mi mekem promes long olgeta we oli fetful mo mi no save giaman.
7 Sapos eniwan long yufala i wantem blong ron long ol hos, o long ol dongki hos, o long ol wilkat we hos i pulum, mi Lod, mi glad blong givim blesing ia long hem, sapos hem i kasem blesing ia long han blong Lod, wetem wan hat blong talem tangkyu long saed blong evri samting.
8 Ol samting ia, i stap long yufala blong mekem, folem jajmen blong yufala mo ol daereksen blong Spirit.
9 Luk, kingdom i blong yufala. Mo luk, mo luk gud, mi stap wetem olgeta fetful oltaem. I olsem. Amen.