Wase 6
Na ivakatakila sa soli vei Josefa Simici na Parofita kei Oliva Kaudari, e Amoni, Penisilivenia, Epereli ni 1829. Sa tekivuna na nona cakacaka vakavunivola ko Oliva Kaudari ena vakadewataki ni iVola i Momani, 7 ni Epereli, 1829. A sa ciqoma oti ko koya e dua na veivakadeitaki vakalou ena dina ni ivakadinadina ni Parofita me baleta na peleti ka volai tu kina na ivolatukutuku ni iVola i Momani. Sa taroga na Turaga ko koya na Parofita ena Urimi kei na Cumimi ka saumi mai me vakaoqo.
1–6, Ko ira sa cakacaka ena were ni Turaga era na vakabulai; 7–13, Sa sega na isolisoli me uasivi cake mai na isolisoli ni bula tawamudu; 14–27, Sa vakadinadinataki rawa na dina ena kaukauwa ni Yalo Tabu; 28–37, Mo rai vei Karisito, ka caka vinaka tiko ga.
1 E dua na cakacaka levu ka veivakurabuitaki sa voleka ni vakayacori vei ira na luve ni tamata.
2 Raica, koi Au na Kalou; mo rogoca matua na noqu vosa, ni sa bula ka kaukauwa, sa gata vakalevu ka mucu ga na iseleiwau batirua, sa wasea rua na isema kei na uto ni sui; o koya mo rogoca matua kina na noqu vosa.
3 Raica, sa matua tu na were ka sa vakarau na tatamusuki; ia, ko koya sa gadreva me tatamusuki, me curumaka na nona isele takelo ena nona igu, ka ia na tatamusuki ni sa siga toka, me kumuna vata ki yalona na veivakabulai tawavakaiyalayala ena matanitu ni Kalou.
4 Io, ko koya yadua sa curumaka na nona isele takelo ka tatamusuki, sa ikoya dina sa kacivi mai vua na Kalou.
5 O koya, kevaka dou na kerea vei au, ena soli vei kemudou; kevaka dou tukituki ena dolavi vei kemudou.
6 Ia oqo, me vaka na nomudou kerekere, raica, au sa kaya vei kemudou, mo dou muria na noqu ivakaro, ka segata mo dou tura ka vakadeitaka na inaki kei Saioni;
7 Dou kakua ni vakasaqara na iyau, ia na yalomatua ga, ka raica, ena qai vakatakilai vei kemudou na veika vuni ni Kalou, ka oti dou sa na qai vakavutuniyautaki. Raica, ko koya sa rawata na bula tawamudu sa vutuniyau.
8 E dina, e dina, au sa kaya vei iko, me vaka ko sa gadreva mai vei au e sa na vaka dina kina vei iko; ka kevaka ko sa gadreva, ko sa na idewadewa ni veika yaga e vuqa ena itabatamata oqo.
9 Me kua tale ni dua na ka mo tukuna ia na veivutuni ga ena itabatamata oqo; muria na noqu ivunau, ka veivuke ena kena vakayacori na noqu cakacaka, me vaka na noqu ivakaro, ia ko na vakalougatataki.
10 Raica sa tiko vei iko e dua na isolisoli, ka ko sa kalougata ena vuku ni nomu isolisoli. Nanuma ni sa ka tabu sara ka lako mai cake—
11 Ia kevaka ko na taroga, ko na kila na veika vuni e levu ka veivakurabuitaki; o koya mo cakacakataka na nomu isolisoli, mo kila kina na veika vuni, mo na kauti ira mai kina na lewe vuqa me ra kila na dina, io, me ra vakila vakataki ira na cala ni sala era muria.
12 Mo kakua ni vakatakila na nomu isolisoli vua e dua, ia vei ira ga dou sa vakabauta vata. Kakua ni vakawaletaka na veika tabu.
13 Kevaka ko sa ivalavala dodonu, io, ka vosota ena yalodina me yacova na ivakataotioti, ko na vakabulai ena matanitu ni Kalou, sa isolisoli cecere duadua vei ira na isolisoli kecega ni Kalou; ni sa sega tale ni dua na isolisoli e cecere mai na isolisoli ni bula.
14 E dina, e dina, au sa kaya vei iko, ko sa kalougata ena ka ko sa kitaka; raica ko sa dau kerekere vei au, ka raica, ni sa levu na nomu kerekere ko sa ciqoma na idusidusi ni Yaloqu. Ke a sega o ya, ke o a sega ni lako mai ki na vanua ko sa tiko kina oqo.
15 Raica, ko sa kila ni ko sa kerekere vei au kau sa vakararamataka na nomu vakasama; ia au sa tukuna vei iko na veika oqo mo kila ni sa vakararamataki iko na Yalo na vu ni ka dina;
16 Io, Au sa kaya vei iko, mo kila ni sa sega tale e dua, na Kalou duadua ga e kila na nomu vakasama kei na inaki ni lomamu.
17 Au sa tukuna vei iko na veika oqo, me ivakadinadina vei iko—ni vosa se cakacaka ko sa vola tiko era dina.
18 O koya mo gumatua sara; mo totaki Josefa na noqu tamata, ena yalodina, ena veika dredre cava ga ena sota kaya ena vuku ni vosa.
19 Mo vunauci koya ena nona cala, ia mo vakarorogo vua ke sa vunauci iko. Mo dauvosota; mo yalodei; mo dau lewa matau; me tu vei iko na yalomalua, na vakabauta, na inuinui kei na loloma uasivi.
20 Raica, ko iko Oliva, kau sa vosa vei iko ena vuku ni nomu gagadre; o koya mo tugana kina na noqu vosa ki lomamu. Mo yalodina ka gumatua ni muria sara na ivakaro ni Kalou, kau na ovici iko ena liga ni noqu loloma.
21 Raica, Koi Au ko Jisu Karisito, na Luve ni Kalou. Sai Au ga sa lako mai vei ira na kai noqu, ka ra qai sega ni ciqomi au na kai noqu. Koi Au na rarama sa cilava na butobuto, ia na butobuto sa sega ni kunea.
22 E dina, e dina, au sa kaya vei iko, kevaka ko sa gadreva e dua tale na ivakadinadina, mo nanuma lesu ga na bogi ko a tagi mai kina vei au ena yalomu, mo kila kina na dina ni veika oqo.
23 Au a sega li ni vakaceguya na nomu vakasama me baleta na ka oqo? Ai vakadinadina uasivi cava tale ko rawa ni taukena me vakatauvatani kei na kena mai vua na Kalou?
24 Ia oqo, raica, ko sa ciqoma e dua na ivakadinadina; ni kevaka au sa tukuna vei iko na veika e sega tale na tamata e kila, e sega li ni nomu ivakadinadina ko ya?
25 Ia, raica, au sa solia vei iko e dua na isolisoli, kevaka ko sa gadreva mai vei au, mo vakavakadewa, me vakataki Josefa na noqu tamata.
26 E dina, e dina, au sa kaya vei iko, sa tu tale e so na ivolatukutuku ka sa tu kina e vuqa na noqu kosipeli, era sa vunitaki tu ena vuku ni nodra talaidredre na tamata;
27 Ia oqo Au sa vakaroti iko, kevaka sa tu vei iko na gagadre vinaka—mo gadreva mo vakaiyau mai lomalagi—io mo veivuke ena vakayagataki ni nomu isolisoli me kau mai ki na rarama na veitiki ni noqu ivolanikalou a vunitaki tu ena vuku ni caka cala.
28 Ia oqo, raica, Au sa solia vei iko, ka vakakina vei Josefa na noqu tamata, na idola ni isolisoli oqo, me vakatakilai mai kina na noqu cakacaka; me vakadeitaki na vosa kecega ena gusudratou na ivakadinadina e lewe rua se tolu.
29 E dina, e dina au sa kaya vei kemudrau, kevaka era sa beca na noqu vosa, kei na tiki ni noqu kosipeli kei na cakacaka oqo, drau sa kalougata ga, ni sa sega ni rawa ni levu cake na veika era vakayacora vei kemudrau mai na veika era vakayacora vei au.
30 Ia kevaka era sa vakayacora vei kemudrau me vaka era sa vakayacora vei au, drau sa kalougata ga, raica drau na tiko vata kei au ena lagilagi.
31 Ia era na kalougata sara kevaka era sa sega ni vorata na noqu vosa, sa vunautaki yani ena ivakadinadina ka na soli, ia ena vuabale na nomudrau marau ena vua ni nomudrau cakacaka.
32 E dina, e dina, au sa kaya vei kemudrau, me vaka kau sa kaya vei ira na noqu tisaipeli na tikina sa soqoni vata kina e lewe rua se lewe tolu ena yacaqu, Au na tiko ena kedratou maliwa—sa dina sara o Au ena kemudou maliwa.
33 Oi kemudrau na luvequ drau kakua ni rere ni kitaka na ka vinaka, ni veika ga drau sa kaburaka, na ka ga oqori drau na tamusuka tale; o koya, kevaka drau sa kaburaka na veika vinaka drau na tamusuka talega na veika vinaka me kena isau vei kemudrau.
34 O koya, ni kakua ni rere, na qele ni sipi lalai; caka vinaka; laivi vuravura kei eli me rau cokovata ka saqati iko, ni kevaka ko sa tarai cake ena noqu uluvatu, ena sega sara ni rawa ni ra qaqa.
35 Raica, au sa vosoti kemudrau; mo drau lako ka kakua ni valavala ca tale; vakayacora ena yalomatua na cakacaka au sa vakarota vei kemudrau.
36 Drau vakararavi tiko mai vei au ena vakasama kece; kakua ni vakatitiqa, ka kakua ni rere.
37 Drau nanuma tiko na we ni moto e sarisariqu kei na we ni ivako ena ligaqu kei na yavaqu; ia mo drau yalodina ka muria sara na noqu ivakaro, ia drau na rawata vakaidina na matanitu vakalomalagi. Emeni.