Ɔfã 71
Nyikyerɛ a wɔdze maa Joseph Smith Nkɔnhyɛnyi no na Sidney Rigdon, wɔ Hiram, Ohio, Mumu 1, 1831. Nna Nkɔnhyɛnyi no rosɔw Bible a ɔrekyerɛ ase no do na Sidney Rigdon nye ne kyerɛwfo kesii dɛ nsa kãa dɛm nyikyerɛ yi, dɛm aber no, wogyaa mu kakra ama woeetum ayɛ dza ɔwɔ nyikyerɛ yi mu a wɔase hɔn dɛ wɔnyɛ no. Enuanom no wɔ dɛ wɔkɛkã nyamesɛm no dze dwedwe adwen bi a nkorɔfo enya a otsia Asɔr no, wɔ nkrataa a Ezra Booth a, ɔatsew etua efi Asɔr no mu no akyerɛw a wɔdze epue guado no.
1–4, Wɔsoma Joseph Smith na Sidney Rigdon dɛ wɔnkɔbɔ asɛmpa no dawur; 5–11, Wɔbɛhyɛ Ahotseweefo no hɔn atamfo fɛr.
1 Hwɛ, dɛm na Ewuradze se, hom mo nkowaa Joseph Smith, Kakraba, nye Sidney Rigdon, dɛ nokwar, mber no aba a ekehia na ɔfata ma me dɛ hom bue hom ano bɔ m’asɛmpa no dawur na hom kã ahenman no no mu ndzɛmba nye esumasɛm a ɔwɔ kyerɛwsɛm no mu no kyerɛ, na hom kyerɛkyerɛ dɛ mbrɛ Sunsum nye tum no bi a medze bɛma hom no bɛkyerɛ, dɛ mbrɛ me pɛ tse.
2 Nokwar, mese hom dɛ, hom mbɔ no dawur nkyerɛ wiadze nye mantɔw a etwa hom ho ehyia nyina, nye asɔr no mu so, bɛyɛ mber kakra, kɛpem dɛ wɔbɛda no edzi akyerɛ hom.
3 Nokwar, iyi yɛ dwuma bi a medze ama hom dɛ hom ndzi no mber kakra no mu.
4 Dɛm ntsi, hom nyɛ edwuma wɔ mo wenyin ture mu. Hom mfrɛ hɔn a wɔwɔ asaase yi do, na hom ngye dase, na hom nsiesie kwan mma mbrasɛm nye nyikyerɛ a ɔbɛba no.
5 Na hwɛ, iyi yɛ nyansa; obiara a ɔbɛkenkan no, hom mma ɔntse ase na ɔngye so;
6 Na nyia ɔgye no, wɔdze mbordo bɛma no, obenya tum mpo.
7 Dɛm ntsi, hom nhyɛ hom atamfo fɛr; hom mfrɛ hɔn ma wonhyia hom wɔ bagua mu nye nsumaamu nyina; na susuampaara dɛ hom dzi nokwar ntsi, hɔn enyimguase bɛda edzi.
8 Dɛm ntsi, hom mma wɔnda hɔn siantsir tsitsir a ɔnam do a wotsia Ewuradze no edzi.
9 Nokwar, dɛm na Ewuradze se hom—akõdze biara a wɔbɔ tsia hom no rennsaa;
10 Na sɛ nyimpa biara ma ne ndze do dze tsia hom a, n’enyim bogu ase wɔ mankasa me mber pa mu.
11 Dɛm ntsi, hom ndzi me mbrasɛm do; na ne nyina yɛ ampa nye nokwar. Ɔnyɛ hɔ dɛm. Amen.