Seksyon 71
Rebelasyon nga ginhatag kay Joseph Smith nga Propeta kag Sidney Rigdon sa Hiram, Ohio sang ika-1 sang Disyembre 1831. Nagpadayon ang Propeta sa paglubad sang Biblia upod kay Sidney Rigdon nga iya tagsulat tubtob nga nabaton ining rebelasyon nga sa amo nga tion temporaryo ini nga ginpahigad agud matigayon ang ila pagtuman sang mga instruksyon nga ginhatag sa diri. Ining mga kauturan sa Simbahan kinahanglan nga maglakat sa pagwali agud mapahagan-hagan ang di-maayo nga mga balatyagon nga nagluntad batok sa Simbahan bilang resulta sang pagbantala sang mga sulat ni Ezra Booth nga nagtalikod sa Simbahan.
1–4, Sanday Joseph Smith kag Sidney Rigdon ginpadala agud ibantala ang ebanghelyo; 5–11, Ang mga kaaway sang mga Santos mapaslawan.
1 Tan-awa, ini ang siling sang Ginuo sa inyo Joseph Smith Jr. kag Sidney Rigdon, mga alagad ko, nga ang tion sa pagkamatuod nag-abot na nga kinahanglanon kag nagakaigo para sa akon nga buksan ninyo ang inyo mga baba sa pagbantala sang akon ebanghelyo, sang mga butang sang ginharian nga nagapaathag sang mga misteryo sini halin sa balaan nga mga kasulatan suno sa sinang bahin sang Espiritu kag gahum nga ihatag sa inyo suno sa akon pagbuot.
2 Sa pagkamatuod ginasiling ko sa inyo, magbantala sa kalibutan sa mga rehiyon sa palibot, kag sa simbahan man sa pila ka tinion tubtob kon san-o nga ipahibalo sa inyo.
3 Sa pagkamatuod isa ini ka misyon sa indi mahibaloan nga kalawigon nga ginahatag ko sa inyo.
4 Gani, magpangabudlay kamo sa akon ulubasan. Magpanawagan sa mga pumuluyo sang duta, kag magpamatuod, kag ihanda ang alagyan para sa magaabot nga mga kasugoan kag mga rebelasyon.
5 Karon tan-awa, ini ang kaalam; kon sin-o man ang makabasa, ipahangop kag ipabaton man ini;
6 Kay sa iya nga nagabaton igahatag sing mas bugana, bisan pa ang gahum.
7 Karon, paslawa ang inyo mga kaaway; magpanawagan sa ila nga makigbais sa inyo sa kadam-an pati sa inyo mga kaugalingon; kag kon tampad kamo makita sang tanan ang ila kahuy-anan.
8 Karon, ipagwa sa ila ang ila mabakod nga mga rason batok sa Ginuo.
9 Sa pagkamatuod, ini ang siling sang Ginuo sa inyo—wala sang armas nga ginhimo batok sa inyo ang magmadinalag-on;
10 Kag kon bisan sin-o nga tawo ang mag-alsa sang iya tingug batok sa inyo mapaslawan sia sa akon kaugalingon nga natalana nga tion.
11 Karon, tumana ang akon mga kasugoan; matuod kag masaligan ang mga ini. Kag gani amo sini. Amen.