Seksen 75
Revelesen we Lod i givim tru long Profet Josef Smit, long Amest, Ohaeo, long namba 25 Jenuware 1832. Seksen ia i tekem tu seperet revelesen (faswan i stap long ol ves 1 kasem 22, mo sekenwan i stap long ol ves 23 kasem 36) we Lod i bin givim long sem dei. Hemia i bin hapen long taem blong wan konfrens we oli bin sastenem mo odenem Josef Smit olsem Presiden blong Hae Prishud. Samfala elda, oli bin wantem blong lanem moa long saed blong ol stret diuti blong olgeta. Nao, ol revelesen ia oli bin kamaot.
1–5, Ol fetful elda we oli prijim gospel bambae oli kasem laef we i no save finis; 6–12, Prea blong kasem Spirit blong Givhan, we i tijim evri samting; 13–22, Ol elda bambae oli sidaon long taem blong jajem olgeta we oli sakemaot mesej blong olgeta; 23–36, Ol famli blong ol misinari oli mas kasem help we i kam long Jos.
1 I tru, i tru, mi talem long yufala, mi we mi toktok tru long voes blong Spirit blong mi, mi we mi Alfa mo Omega, Lod blong yufala mo God blong yufala—
2 Lisin gud, O yufala we yufala i bin givim ol nem blong yufala blong go aot blong talemaot gospel blong mi, mo blong katem klinim gud plantesen blong mi.
3 Luk, mi talem long yufala, se hem i tingting blong mi blong yufala i go mo no stastap, mo blong yufala i no stap nating be blong yufala i wok wetem strongfala paoa blong yufala—
4 we yufala i mas stap leftemap voes blong yufala semmak olsem saon blong wan pupu, mo stap talemaot trutok folem ol revelesen mo ol komanmen we mi bin givim long yufala.
5 Mo olsem ia nao, sapos yufala i stap fetful, bambae yufala i tekem plante bandel kaekae, mo bambae yufala i kasem antap long hed blong yufala, ona, mo glori, mo fasin blong nomo save ded, mo laef we i no save finis.
6 From hemia, i tru, mi talem long wokman blong mi, Wiliam E. MakLelin, se mi tekembak misin we mi bin givim long hem blong go long ol kantri long Is;
7 Mo mi givim long hem wan niu misin mo wan niu komanmen, we long hem, mi, Lod, mi panisim hem from ol komplen insaed long hat blong hem;
8 Mo hem i bin sin; be, mi fogivim hem mo mi talem long hem bakegen: “Yu go long ol kantri long Saot.”
9 Mo wokman blong mi, Luk Jonson i mas go wetem hem, mo i mas talemaot ol samting we mi bin komandem tufala—
10 Mo stap prea long nem blong Lod blong kasem Spirit blong Givhan, we bae i tijim tufala evri samting we tufala i nid blong mekem—
11 Mo stap prea oltaem blong tufala i no foldaon; mo folem hamas we tufala i mekem samting ia, bambae mi stap wetem tufala i go kasem en.
12 Luk, hemia tingting blong Lod, God blong yufala, long saed blong yutufala. I olsem. Amen.
13 Mo bakegen, i tru, olsem ia nao Lod i talem; wokman blong mi, Orson Haed, mo wokman blong mi, Samuel H. Smit, tufala i mas tekem rod blong tufala i go long ol kantri long Is, mo talemaot ol samting we mi bin givim oda long tufala blong talem; mo folem hamas we tufala i fetful, luk, bambae mi stap wetem tufala i go kasem en.
14 Mo bakegen, i tru, mi talem long wokman blong mi, Liman Jonson, mo long wokman blong mi, Orson Prat, tufala i mas tekem rod tu i go long ol kantri long Is; mo luk, mo luk gud, mi stap wetem tufala tu, i go kasem en.
15 Mo bakegen, mi talem long wokman blong mi, Esa Dods, mo long wokman blong mi, Kalvis Wilson, se tufala tu bae i mas tekem rod i go long ol kantri long Wes, mo talemaot gospel blong mi, olsem we mi bin givim oda long tufala blong mekem.
16 Mo hem we i fetful, bambae i winim evri samting, mo bambae mi leftemap hem long las dei.
17 Mo bakegen, mi talem long wokman blong mi, Meja N. Asli, mo wokman blong mi, Ber Rigs, blong tufala i mas tekem rod blong tufala tu i go long kantri long Saot.
18 Yes, bae olgeta ia evriwan oli mas tekem rod blong olgeta i go, olsem we mi bin komandem olgeta, mo stap go long wan haos i go long narafala haos, mo long wan vilej i go long narafala vilej, mo long wan siti i go long narafala siti.
19 Mo long wanem haos bambae yufala i go insaed long hem, mo oli akseptem yufala long hem, nao yufala i livim blesing blong yufala long haos ia.
20 Mo long wanem haos bambae yufala i go insaed long hem, mo oli no akseptem yufala, bambae yufala i mas aot kwiktaem long haos ia, mo yufala i mas tekemaot das long leg blong yufala olsem wan testemoni agensem olgeta.
21 Mo bambae yufala i fulap wetem glad mo bigfala hapines; mo yufala i mas save hemia, se long dei blong jajmen, bambae yufala i stap olsem ol jaj blong haos ia, mo bambae yufala i jajem olgeta;
22 Mo bambae i moa isi, long olgeta we oli no gat respek long God long dei blong jajmen, bitim long olgeta blong haos ia; from hemia, mekem yufala i rere mo stap fetful, mo bambae yufala i winim evri samting, mo bambae mi leftemap yufala long las dei. I olsem. Amen.
23 Mo bakegen, olsem ia nao Lod i talem long yufala, O yufala, ol elda blong jos blong mi, we yufala i bin givim nem blong yufala blong yufala i save tingting blong hem long saed blong yufala—
24 Luk, mi talem long yufala, se hem i diuti blong jos blong help blong sapotem ol famli blong olgeta ia, mo tu, blong sapotem ol famli blong olgeta ia we mi singaotem olgeta mo i mas nid blong mi sendem olgeta long wol blong talemaot gospel long wol.
25 Taswe, mi, Lod, mi givim komanmen ia long yufala, se bae yufala i kasem sam ples blong famli blong yufala, folem hamas ol brata blong yufala oli glad blong openem hat blong olgeta.
26 Mo evriwan ia, we oli save kasem ol ples blong famli blong olgeta, mo oli mas kasem sapot blong jos, oli no mas mestem blong go long wol, nomata hem i long Is o hem i long Wes, o hem i long Not, o hem i long Saot.
27 Olgeta ia, oli mas askem mo bambae oli kasem, oli mas noknok mo bambae i open long olgeta, mo bambae mi mekem olgeta oli kasem save we i kam long heven, tru long Spirit blong Givhan, long weaples nao bae oli go long hem.
28 Mo bakegen, i tru, mi talem long yufala, se evri man we i mas wok blong lukluk long famli blong hem, hem i mas wok blong lukluk long ol nid ia, mo bambae hem i no save lusum hat blong king blong hem; mo hem i mas wok insaed long jos.
29 Evri man i mas wok strong wetem strong tingting long evri samting. Mo man we i stap nating, bae i no mas gat ples insaed long jos, be sapos nomo hem i sakem sin mo hem i stretem gud ol fasin blong hem.
30 Taswe, wokman blong mi, Simeon Kata mo wokman blong mi, Ima Haris, tufala i mas joen long seves;
31 Mo tu, wokman blong mi, Esra Teire, mo wokman blong mi, Tomas B. Mars;
32 Mo tu, wokman blong mi, Haeram Smit, mo wokman blong mi Renols Kahun;
33 Mo tu, wokman blong mi, Daniel Stanton, mo wokman blong mi, Semur Branson;
34 Mo tu, wokman blong mi, Silvesta Smit, mo wokman blong mi, Gideon Kata;
35 Mo tu, wokman blong mi Rugel Iamis, mo wokman blong mi, Stifen Benet;
36 Mo tu, wokman blong mi, Maeka B. Welton, mo tu, wokman blong mi Iden Smit. I olsem. Amen.