1 T. A cava na wasa iloilo sa tukuna ko Joni ena wase e 4, tikina e 6 ena iVakatakila?K.S. Oqori na vuravura, ena kena ituvaki tabu, tawamate rawa, ka tawamudu.

2 T. Na cava beka me da kila mai na va na ka bula, ka tukuni ena tikina vata oqori?K.S. Oqori na vosa vakatautauvata ga a taurivaka ko Joni na Dauvakatakila me vakamacalataka kina na lomalagi, na parataisi ni Kalou, na nodra marau na tamata, kei na manumanu ni vanua, kei na manumanu sa qasi, kei na manumanu vuka e macawa; ia na kedra ituvaki vakayalo sa tautauvata kei na ituvaki vakayago; kei na kedra ituvaki vakayago sa tautauvata kei na kedra ituvaki vakayalo; raica na yalo ni tamata sa vaka ga na kena ibulibuli; sa vakatalega kina na yalo ni manumanu, kei na veika bula kecega sa bulia na Kalou.

3 T. Vakaevei na ka bula e va oqo, eratou dui matataki iratou ga, se ratou matataka na veiwasewase se na kena ivakarau?K.S. Eratou sa ivakaraitaki ga ni ka bula e va, ka a vakaraitaki vei Joni, me ivakaraitaki ni kedra lagilagi na veiwasewase ni veika bula ena ituvatuva ni kedra buli me vaka sa dui lesi vei ira, me ra rekitaka kina na nodra marau tawamudu.

4 T. Na cava beka me da kila mai na matadra kei na tabadra na ka bula ko ya?K.S. Me da kila ni matadra e matataka na rarama kei na kila ka, oya, ni ra sa sinai ena kila ka; ia na tabadra sa matataka na kaukauwa me ra yavala ka cakacaka, kei na so tale.

5 T. Na cava beka me da kila mai na italatala qase e ruasagavulu kava a tukuna ko Joni?K.S. E dodonu me da kila ni o ira na italatala qase e ruasagavulu kava a raica ko Joni, sai ira na italatala qase era sa dau yalodina ena cakacaka ni veiqaravi ka ra sa mate yani; era lewena na vitu na isoqosoqo lewenilotu, ka ra sa tiko ena parataisi ni Kalou ena gauna ko ya.

6 T. Na cava beka me da kila mai na ivola ka a raica ko Joni, ka sa dregati na dakuna ena drega e vitu?K.S. Me da kila ni sa volai tu kina na lewa vakatakilai mai, na veika vuni, kei na cakacaka ni Kalou; na veika tawa kilai ni kena liutaki na vuravura ena vitu na udolu na yabaki ni kena cici, se na kena bula vakayago.

7 T. Na cava beka me da kila me baleta na vitu na drega sa dregati kina?K.S. Me da kila ni imatai ni drega e lewena na veika me baleta na imatai ni dua na udolu na yabaki, kei na ikarua talega me baleta na ikarua ni dua na udolu na yabaki, a sa vaka tiko kina me yacova na ikavitu.

8 T. Na cava beka me da kila me baleta na agilosi e le va sa tukuni ena iVakatakila wase e vitu tikina e dua?K.S. Me da kila ni sai iratou oqori na agilosi a tala mai na Kalou, sa soli vei iratou na kaukauwa me baleta na tutui vuravura e va, me ratou ia na veivakabulai kei na veivakarusai; sai iratou sa tu kina na kosipeli tawavakaiyalayala me ratou kauta ki na veimatanitu, veimataqali, duivosavosa, kei ira na tamata; sa tu talega vei iratou na kaukauwa me ratou sogota na lomalagi, me ratou veivauci ki na bula, se me ratou veivakasavi sobu ki na veiyasana butobuto.

9 T. Na cava beka me da kila me baleta na agilosi sa cabe cake mai na tokalau, ena iVakatakila wase 7 tikina e 2?K.S. Me da kila ni o koya na agilosi ka cabe mai na tokalau, sai koya ka soli vua na nona drega na Kalou bula me baleta na yavusa e tinikarua i Isireli; o koya, sa kaci vei iratou na agilosi e le va ka tu vei iratou na kosipeli tawavakaiyalayala, ka kaya: Tei kakua mada ni vakacacani vuravura, se na wasawasa, se na kau, me yacova ni keitou sa dregata mada na yadredra na tamata ni noda Kalou. Ia, kevaka dou na ciqoma, sai koya oqo ko Iliesa o koya ena lako mai me mai vakasoqona vata na yavusa i Isireli ka vakalesuya mai na veika taucoko.

10 T. Ena vakayacori ni naica na veika sa tukuni ena wase ni ivola oqo?K.S. Ena vakayacori ena ikaono ni udolu ni yabaki, se na gauna sa cecegi kina na ikaono ni drega.

11 T. Na cava beka me da kila ena nodra vakatakilakilataki na lewe dua na drau vasagavulu kava na udolu mai na yavusa i Isireli—io me le tinikarua na udolu mai na veiyavusa yadua?K.S. Me da kila ni ko ira era vakatakilakilataki sai ira na bete levu, ka ra sa tabaki ena ivakarau tabu ni Kalou, me ra vunautaka na kosipeli tawavakaiyalayala; ni sai ira oqo era sa tabaki mai na veimatanitu kecega, na veimataqali, duivosavosa, kei ira na tamata, mai vei ira na agilosi sa soli vei ira na kaukauwa ena veimatanitu ni vuravura, me ra kauti ira kece mai era via lako ki na nona lotu na Ulumatua.

12 T. Na cava beka me da kila me baleta na uvuci ni davui, ka tukuni ena iVakatakila wase e 8?K.S. Me da kila me vaka ni a bulia na vuravura na Kalou ena ono na siga, ka vakacavara na nona cakacaka ena ikavitu ni siga, ka vakatabuya, ka bulia talega na tamata mai na kuvu ni soso ni vuravura, ia, ena itekivu ni ikavitu ni dua na udolu na yabaki, sa na vakatabuya kina na vuravura na Turaga na Kalou, ka vakacavara kina na nodra vakabulai na tamata, ka lewa na ka kecega, ka na vueta na ka kecega, vakavo ga na veika e se bera ni soli vua na kena kaukauwa, ena gauna sa na vakatakilakilataka kina na veika kecega, me vakataucokotaki kina na ka kecega; kei na nodratou uvuca na davui na agilosi e vitu sai koya na vakarautaki kei na vakacavari ni nona cakacaka, ena itekivu ni ikavitu ni dua na udolu na yabaki—na vakarautaki ni gaunisala ni bera na gauna ni nona lako mai.

13 T. Ena vakayacori ni naica na veika sa volai ena iVakatakila wase e 9?K.S. Ena vakayacori ni sa cereki oti na ikavitu ni drega, ni bera na nona lako mai na Karisito.

14 T. Na cava beka me da kila me baleta na ivola lailai a kania ko Joni, me vaka sa tukuni ena iVakatakila wase e 10?K.S. Me da kila ni oqori e dua na itavi, ka cakacaka vakalotu, me vakasoqona vata na yavusa i Isireli; raica, oqo ko Iliesa, o koya, me vaka sa volai, ni dodonu me lako mai ka vakalesuya na ka kecega.

15 T. Na cava beka me kilai me baleti rau na ivakadinadina e rua, ena ikatinikadua ni wase ni iVakatakila?K.S. Oqori koi rau na parofita e rua ka rau na lesi vei ira na Jiu ena veisiga mai muri, ena gauna ni veivakalesui mai, ka me rau parofisai vei ira na Jiu ni ra sa vakasoqoni vata tale ka ra tara na koro ko Jerusalemi ena nodra vanua na nodra qase.