Seksyon 80
Rebelasyon nga ginhatag paagi kay Joseph Smith nga Propeta kay Stephen Burnett sa Hiram, Ohio sang ika-7 sang Marso 1832.
1–5, Sanday Stephen Burnett kag Eden Smith gintawag nga magwali sa bisan diin man nga lugar nga ila pilion.
1 Sa pagkamatuod, ini ang siling sang Ginuo sa imo, Stephen Burnett, alagad ko: Maglakat ka, maglakat ka sa kalibutan kag iwali ang ebanghelyo sa tagsa ka tawo nga malab-otan sang tunog sang imo tingug.
2 Kag bangod nga luyag mo sing isa ka kaupod, igahatag ko sa imo ang akon alagad nga si Eden Smith.
3 Karon, maglakat kamo kag iwali ang akon ebanghelyo sa norte man ukon sa sur, sa este man ukon sa weste, indi ini importante kay indi kamo magsala.
4 Karon, ipahayag ang mga butang nga inyo nabatian, kag matuod nga ginapatihan, kag nahibaloan nga matuod.
5 Tan-awa, ini ang pagbuot niya nga nagtawag sa inyo, ang inyo Manunubos nga si Jesucristo. Amen.