Seksyon 81
Rebelasyon nga ginhatag paagi kay Joseph Smith nga Propeta sa Hiram, Ohio sang ika-15 sang Marso 1832. Si Frederick G. Williams gintawag nga mangin isa ka mataas nga pari kag manuglaygay sa Pangulohan sang Mataas nga Pagkapari. Ang mga sinulat nga kasaysayan nagapakita nga sang mabaton ining rebelasyon sang Marso 1832, gintawag sini si Jesse Gause sa palangakoan nga manuglaygay kay Joseph Smith sa Pangulohan. Apang, sang wala sia makapadayon sa paagi nga suno sa sining pagtawag, ang tawag ginsaylo sang ulihi kay Frederick G. Williams. Ang rebelasyon (nga napetsahan Marso 1832) dapat kabigon nga tikang padulong sa pormal nga pag-organisar sang Unang Pangulohan, ilabi na ang pagtawag para sa palangakoan sang manuglaygay sa ina nga organisasyon kag nagapaathag sang dignidad sang pagtawag. Si Brother Gause temporaryo nga nag-alagad apang gin-ekskomunikar halin sa Simbahan sang Disyembre 1832. Si Brother Williams gin-ordinan sa ginsambit nga palangakoan sang ika-18 sang Marso 1833.
1–2, Ang mga yabi sang ginharian dalayon nga ginakaptan sang Unang Pangulohan; 3–7, Kon si Frederick G. Williams tampad sa iya pag-alagad, magaangkon sia sang kabuhi nga wala’y katapusan.
1 Sa pagkamatuod, sa pagkamatuod, ginasiling ko sa imo, Frederick G. Williams, alagad ko: Pamatii ang tingug niya nga nagahambal, ang pulong sang Ginuo nga imo Dios, kag dungga ang tawag sa diin ikaw gintawag nga mangin isa ka mataas nga pari sa akon simbahan, kag manuglaygay sa akon alagad nga si Joseph Smith Jr.;
2 Nga sa iya ko ginhatag ang mga yabi sang ginharian nga dalayon nga yara sa Pangulohan sang Mataas nga Pagkapari:
3 Gani, sa pagkamatuod ginabaton ko sia kag pagabugayan sia, kag amo man ikaw, kon tampad ka sa paglaygay, sa palangakoan nga akon ginhatag sa imo, nagapangamuyo pirme, sing mabaskog kag sa imo tagipusuon, sa kadam-an kag nagaisahanon, amo man sa imo pag-alagad sa pagbantala sang ebanghelyo sa duta sang mga buhi, kag sa imo mga kauturan sa simbahan.
4 Kag sa paghimo sining mga butang magahimo ka sing labing dako nga kaayohan sa imo mga isigkatawo, kag magasulong sang himaya niya nga imo Ginuo.
5 Karon, mangin tampad; tumana ang palangakoan nga ginpili ko para sa imo; buligi ang mga maluya, ibayaw ang mga kamot nga nagapalamuypoy, kag pabaskoga ang mga tuhod nga maluya.
6 Kag kon tampad ka tubtob sa katapusan magaangkon ka sang korona sang kawala’y kamatayon, kag kabuhi nga wala’y katapusan sa mga mansyon nga akon ginhanda sa balay sang akon Amay.
7 Tan-awa, kag yari karon, ini ang mga pulong sang Alfa kag Omega nga si Jesucristo. Amen.