1 I tru, olsem ia nao Lod i talem long yufala, ol wokman blong mi, long saed blong parabol blong gudfala sid mo rabis gras:

2 Luk, i tru mi talem, garen hem i wol, mo ol aposol oli ol man blong planem sid ia;

3 Mo afta we oli go slip mo ded, bigfala enemi blong jos, man we i mekem apostasi, woman blong rod, we i Babilon, we i mekem evri nesen oli dring long kap blong hem, we enemi i stap long hat blong olgeta, we i Setan, we i sidaon blong rul—luk, hem i planem ol rabis gras; taswe, ol rabis gras oli jokem gudfala sid mo fosem jos i go long waelples.

4 Be luk, long ol las dei, mo tu, naoia, taem Lod i stat blong tekem toktok i kam, mo niu sut blong sid i stap gro yet mo i yangfala yet—

5 Luk, i tru mi talem long yufala, ol enjel oli stap plis long Lod dei mo naet, ol enjel ia we oli rere mo oli stap wet blong Lod i sendem olgeta blong katem daon mo pikimap kaekae long ol garen;

6 Be Lod i talem long olgeta: no pulumaot ol rabis gras taem ol niu sut blong sid oli yangfala yet (from i tru, fet blong yufala i no strong), nogud bae yufala i prapa spolem gud gudfala sid tu.

7 From hemia, letem gudfala sid mo ol rabis gras oli gro tugeta kasem taem we kaekae i raep gud evriwan; afta, faswan bae yufala i tekemaot ol gudfala sid long ol rabis gras, mo afta we yufala i putum tugeta ol gudfala sid, luk mo luk gud, ol rabis gras oli fasfas long ol bandel, mo garen i stap blong oli bonem.

8 From hemia, olsem ia nao Lod i talem long yufala, we prishud i bin gohed blong stap tru long laen blong ol papa blong yufala—

9 From we yufala i gat raet folem loa, mo folem laen blong yufala, mo God i bin haedem yufala long wol wetem felosip long Kraes, tru long God—

10 From hemia, laef blong yufala mo prishud blong yufala i bin stap, mo i nid blong i mas stap tru long yufala mo laen blong yufala kasem taem mi putumbak evri samting we mi bin talem tru long maot blong evri tabu profet, stat long taem we wol i stat.

11 From hemia, yufala i gat blesing sapos yufala i gohed blong kasem gud fasin blong mi, olsem wan laet long Ol Jentael, mo tru long prishud ia, wan sevya long pipol blong mi, Isrel. Lod i bin talem samting ia. Amen.