1 Pulong sang Kaalam, para sa kaayohan sang konseho sang mga mataas nga pari nga nagtipon sa Kirtland, kag sang simbahan, kag amo man sang mga santos sa Sion—

2 Nga ipadala bilang pagtamyaw; indi bilang kasugoan ukon pagpilit kundi paagi sa rebelasyon kag sa pulong sang kaalam nga nagapahayag sang plano kag pagbuot sang Dios sa pisikal nga kaluwasan sang tanan nga santos sa ulihing mga adlaw—

3 Nga ginapahayag bilang isa ka prinsipyo nga may upod nga promisa, nga ginpabagay sa ikasarang sang mga maluya kag sang pinakamaluya sa tanan nga santos, nga mga santos ukon matawag nga mga santos.

4 Tan-awa, sa pagkamatuod, ini ang siling sang Ginuo sa inyo: Bangod sang mga kalainan kag mga plano nga nagaluntad kag magaluntad sa mga tagipusuon sang nagakunsabo nga mga tawo sa ulihing mga adlaw, ginpaandaman ko kamo, kag ginapaandaman kamo paagi sa paghatag sa inyo sining pulong sang kaalam paagi sa rebelasyon—

5 Nga kon may ara sa inyo nga nagainom sang bino ukon makahulubog nga ilimnon, tan-awa indi ini maayo, ukon husto sa panulok sang inyo Amay luwas sa pagtipon lamang sang inyo mga kaugalingon agud maghalad sang inyo mga sakramento sa atubang niya.

6 Kag, tan-awa, dapat bino ini, huo, puro nga bino sang ubas halin sa sanga nga inyo mismo ginhimo.

7 Kag, sa liwat, ang makahulubog nga mga ilimnon indi para sa tiyan kundi para sa paghugas sang inyo mga lawas.

8 Kag sa liwat, ang tabako indi para sa lawas, ukon para sa tiyan, kag indi maayo para sa tawo kundi isa ka tanom para sa mga lagob kag sa tanan nga nagamasakit nga baka nga dapat gamiton nga may kaalam kag ihibalo.

9 Kag sa liwat, ang mainit nga mga ilimnon indi para sa lawas ukon tiyan.

10 Kag sa liwat, sa pagkamatuod ginasiling ko sa inyo, ang tanan nga maayo nga tanom ginhatag sang Dios para sa ikaayong-lawas kag pagkaon sang tawo—

11 Ang tagsa ka tanom sa panahon sini, kag ang tagsa ka prutas sa panahon sini; ini tanan dapat gamiton nga may kaalam kag pagpasalamat.

12 Huo, ang karne man sang mga kasapatan kag sang mga kapispisan sang kahanginan, ako, nga Ginuo, naghatag para gamiton sang tawo nga may pagpasalamat; apang dapat kini-kinion lang ang paggamit sang mga ini;

13 Kag makapalipay sa akon nga ang mga ini indi paggamiton luwas lang sa mga panahon sang tigtulugnaw, ukon sang kayami, ukon tiggulutom.

14 Ang tanan nga uyas ginhatag para gamiton sang tawo kag sang mga kasapatan, nga mangin sungkod sang kabuhi indi lamang para sa tawo kundi para man sa mga kasapatan sang kapatagan, kag sa mga kapispisan sang kalangitan, kag tanan nga mabangis nga sapat nga nagadalagan ukon nagakamang sa duta;

15 Kag ang mga ini ginhimo sang Dios para gamiton sang tawo sa mga panahon lang sang tiggulutom kag tuman nga gutom.

16 Ang tanan nga uyas maayo para sa pagkaon sang tawo; kag amo man ang prutas sang sanga nga nagabunga sa idalom man ukon sa ibabaw sang duta—

17 Apang, ang trigo pinakamaayo para sa tawo, kag mais para sa baka, kag trigo para sa kabayo, kag uyas para sa mga pispis kag para sa mga baboy, kag para sa tanan nga kasapatan sang kapatagan, kag barley para sa tanan nga mapuslanon nga sapat, kag para sa indi maisog nga mga ilimnon, amo man ang iban pa nga uyas.

18 Kag ang tanan nga santos nga nagadumdum sa pagtuman kag paghimo sining mga pulong nga nagalakat sa pagtuman sang mga kasugoan magabaton sang kaayohan sa ila pusod kag utok sa ila mga tul-an;

19 Kag makasalapo sang kaalam kag tuman nga manggad sang ihibalo, bisan pa tinago nga mga manggad;

20 Kag magadalagan kag indi pagkapoyon, kag magalakat kag indi pagluyahon.

21 Kag ako, nga Ginuo, nagahatag sa ila sang promisa nga ang nagapanglaglag nga anghel magalabay sa ila pareho sa mga anak sang Israel, kag indi sila pagpatyon. Amen.