Seksyon 8
Rebelasyon nga ginhatag paagi kay Joseph Smith nga Propeta kay Oliver Cowdery, sa Harmony, Pennsylvania sang Abril 1829. Sa tion sang paglubad sang Libro ni Mormon, si Oliver nga nagpadayon sa pag-alagad bilang tagsulat nga nagasulat sa dikta sang Propeta, naghandum nga hatagan sang dulot sang paglubad. Ang Ginuo nagsabat sa iya pangamuyo paagi sa paghatag sining rebelasyon.
1–5, Ang rebelasyon nagaabot paagi sa gahum sang Balaan nga Espiritu; 6–12, Ang ihibalo sang mga misteryo sang Dios kag ang ikasarang sa paglubad sang dumaan nga mga kasulatan nagaabot paagi sa pagtuo.
1 Oliver Cowdery, sa pagkamatuod, sa pagkamatuod, ginasiling ko sa imo nga amo kasigurado nga ang Ginuo nga imo Dios kag imo Manunubos buhi, sa amo man kasigurado nga makabaton ka sang ihibalo sing ano man nga mga butang nga imo pangayuon nga may pagtuo, upod ang tampad nga tagipusuon, nga nagapati nga mabaton mo ang ihibalo parte sa kinurit nga mga kasulatan, nga dumaan, nga nagaunod sinang mga bahin sang akon balaan nga kasulatan nga ginhambal paagi sa pagpahayag sang akon Espiritu.
2 Huo, tan-awa, sugiran ko ikaw sa imo panghunahuna kag sa imo tagipusuon paagi sa Balaan nga Espiritu nga magaabot sa imo kag magapuyo sa imo tagipusuon.
3 Karon, tan-awa, ini ang espiritu sang rebelasyon; tan-awa, amo ini ang gahum sa diin gindala ni Moises ang mga anak sang Israel sa tunga sang Pula nga Dagat sa mala nga duta.
4 Karon, ini ang imo dulot; gamita ini, kag bulahan ka kay luwason ka sini sa mga kamot sang imo mga kaaway, ugaling, kon indi mo paggamiton ini, pagapatyon ka nila kag dal-on ang imo kalag sa kalaglagan.
5 O, dumduma ining mga pulong, kag tumana ang akon mga kasugoan. Dumduma, ini ang imo dulot.
6 Karon indi lang ini ang imo dulot; kay may isa ka pa ka dulot nga amo ang dulot nga iya ni Aaron; tan-awa, ginsugid sini sa imo ang madamo nga butang;
7 Tan-awa, wala na sing iban pa nga gahum magluwas sa gahum sang Dios nga makahatag sa imo sining dulot ni Aaron.
8 Gani, indi magpangduhaduha kay dulot ini sang Dios; kag pagakaptan mo ini sa imo mga kamot, kag magpahanabo sang dalayawon nga mga buluhaton; kag wala sang gahum nga sarang makakuha sini halin sa imo mga kamot kay buluhaton ini sang Dios.
9 Kag, karon, kon ano man ang imo pangabayon sa akon nga isugid sa imo sa sina nga pamaagi, ihatag ko ina sa imo, kag magaangkon ka sang ihibalo parte diri.
10 Dumduma nga kon wala sang pagtuo wala ka sang mahimo; gani, magpangayo nga may pagtuo. Indi ipasapayan ining mga butang; indi magpangayo sinang indi dapat.
11 Magpangayo agud nga mahibaloan mo ang mga misteryo sang Dios, kag agud malubad mo kag mabaton ang ihibalo halin sa tanan sinang dumaan nga mga kasulatan nga ginpangtago nga sagrado; kag suno sa imo pagtuo pagatumanon ini sa imo.
12 Tan-awa, ako ang naghambal sini; kag ako nga mismo ang naghambal sa imo halin sa ginsuguran. Amen.