1 Ini ang siling sang Ginuo, sa pagkamatuod, sa pagkamatuod ginasiling ko sa imo anak ko, napatawad na ang imo mga sala suno sa imo pangabay kay ang imo mga pangamuyo kag ang mga pangamuyo sang imo mga kauturan sa simbahan nakalab-ot sa akon mga dulunggan.

2 Gani, bulahan ka sugod subong nga nagadala sang mga yabi sang ginharian nga ginhatag sa imo; nga ang amo nga ginharian ginapahamtang sa katapusan nga tion.

3 Sa pagkamatuod ginasiling ko sa imo, ang mga yabi sining ginharian indi gid makuha sa imo samtang yara ka sa kalibutan, ukon sa kalibutan nga magaabot;

4 Apang, paagi sa imo ang mga orakulo sang Dios igahatag sa iban, huo, sa simbahan.

5 Kag sila tanan nga nagabaton sang mga orakulo sang Dios, paandama sila sang ila pagkabig sang mga ini agud indi pagkabigon ang mga ini bilang di-importante nga butang, kag mapaidalom sila sa pagkondenar bangod sina, kag masandad kag matumba kon ang mga unos magtupa, kag ang hangin maghuyop, kag ang ulan magbundak, kag magwaswas sa ila balay.

6 Kag sa liwat, sa pagkamatuod ginasiling ko sa imo mga kauturan sa simbahan nga sanday Sidney Rigdon kag Frederick G. Williams, napatawad man ang ila mga sala, kag ginakabig sila nga tupong sa imo sa pagkapot sang mga yabi sining katapusan nga ginharian;

7 Kag amo man sa imo pagdumala sang mga yabi sang eskwelahan sang mga propeta nga ginsugo ko nga i-organisar;

8 Agud nga sa sini nga paagi maperpekto sila sa ila pag-alagad para sa kaluwasan sang Sion, kag sang mga nasyon sang Israel, kag sang mga Gentil, sang tanan nga magpati;

9 Agud nga paagi sa imo pagdumala mabaton nila ang pulong, kag paagi sa ila pagdumala mapadala ang pulong tubtob sa mga punta sang kalibutan, una sa mga Gentil, kag pagkatapos, tan-awa, kag yari karon, magakadto sila sa mga Judio.

10 Kag dayon magaabot ang adlaw nga ang butkon sang Ginuo igapahayag sa gahum sa pagpapati sa mga nasyon, sa pagano nga mga nasyon, sa balay ni Jose, sang ebanghelyo sang ila kaluwasan.

11 Kay matabo ini sa sinang adlaw nga ang tagsa ka tawo makabati sang kabug-osan sang ebanghelyo sa iya kaugalingon nga lengguahe, kag sa iya kaugalingon nga hinambalan paagi sa ila nga gin-ordinan sa sining gahum, paagi sa impluwensya sang Manugpasulhay nga ginpadala sa ila agud ipahayag si Jesucristo.

12 Kag karon, sa pagkamatuod ginasiling ko sa inyo, ginahatagan ko kamo sing isa ka kasugoan nga magpadayon kamo sa pag-alagad kag pangulohan.

13 Kag kon matapos na ninyo ang paglubad sang mga sinulatan sang mga propeta sa Biblia, pagapangulohan ninyo sumugod sa sina nga tion ang mga butang parte sa simbahan kag sa eskwelahan;

14 Kag kon san-o nga nagakaigo, suno sa igapahayag sang Manugpasulhay, magabaton kamo sang mga rebelasyon agud ipahayag ang mga misteryo sang ginharian;

15 Kag ipahamtang sa kahusay ang mga simbahan, kag magtuon kag mag-angkon sang ihibalo, kag magsayasat sang tanan nga maayo nga libro, kag mga hinambalan, mga lengguahe, kag katawhan.

16 Kag ini ang inyo mangin tulumanon kag misyon sa bilog ninyo nga kabuhi nga magpangulo sa konseho, kag magpahamtang sa kahusay sang tanan nga butang parte sining simbahan kag ginharian.

17 Indi magkahuya, ukon magpalibog; kundi magpalaygay sa tanan ninyo nga pagkamatinaas-taason kag kabugalon kay ginasiod sini ang inyo mga kalag.

18 Ipahamtang sa kahusay ang inyo mga panimalay; ipalayo ang katamad kag kahigko sa inyo.

19 Karon, sa pagkamatuod ginasiling ko sa imo, magpatigayon sing puluy-an sa labing madali nga panahon para sa panimalay sang imo manuglaygay kag tagsulat nga si Frederick G. Williams.

20 Kag dapat magpabilin ang akon tigulang nga alagad nga si Joseph Smith Sr. upod ang iya panimalay sa lugar kon sa diin sia nagapuyo subong; kag indi ini pag-ipabaligya tubtob nga ihambal sang baba sang Ginuo.

21 Kag dapat magpabilin ang akon manuglaygay nga si Sidney Rigdon kon sa diin sia nagapuyo subong tubtob nga ihambal sang baba sang Ginuo.

22 Kag papangitaa sing matutum ang obispo sing isa ka representante, kag dapat lalaki sia nga manggaranon—isa ka tawo sang Dios, kag may mabaskog nga pagtuo—

23 Agud nga sa sina nga paagi mabayaran niya ang tanan nga kautangan; agud nga indi mapalain ang balay-talagoan sang Ginuo sa panulok sang mga tawo.

24 Magpangita sing matutum, magpangamuyo pirme, kag magpati, kag ang tanan nga butang magaresulta sa inyo kaayohan kon maglakat kamo sing matarong kag dumdumon ang kasugtanan nga inyo ginpakighisugot sa isa kag isa.

25 Ipapabilin ang inyo mga panimalay nga magamay ilabi na ang panimalay sang akon tigulang nga alagad nga si Joseph Smith Sr. parte sinang indi matuod-tuod nga miyembro sang inyo mga pamilya;

26 Agud nga inang mga butang nga gintigana para sa inyo nga ipahanabo ang akon buluhaton indi pagkuhaon sa inyo kag ihatag sa sinang indi nagakaangay—

27 Kag sa sina nga paagi mapunggan kamo sa paghimo sinang mga butang nga ginsugo ko sa inyo.

28 Kag sa liwat, sa pagkamatuod ginasiling ko sa inyo, pagbuot ko nga ang akon alagad nga babayi nga si Vienna Jaques dapat magbaton sang kwarta agud mabayaran ang iya mga gastos, kag magkadto sa duta sang Sion;

29 Kag ang mabilin nga kwarta ikonsagrar sa akon, kag magabaton sia sang padya sa akon kaugalingon nga natalana nga tion.

30 Sa pagkamatuod ginasiling ko sa inyo, nga husto ini sa akon panulok nga magkadto sia sa duta sang Sion, kag magbaton sang palanublion halin sa kamot sang obispo;

31 Agud nga makapuyo sia sa isa ka lugar sing matawhay kon tampad sia, kag indi sia mangin matamad sa iya mga adlaw sumugod sa sina nga tion.

32 Kag tan-awa, sa pagkamatuod ginasiling ko sa inyo nga isulat ninyo ining kasugoan, kag magsiling sa inyo mga kauturan sa Sion, nga may pagtamyaw sang paghigugma, nga gintawag ko man kamo nga magpangulo sa Sion sa akon kaugalingon nga natalana nga tion.

33 Gani, pauntata sila sa pagtublag sa akon parte sining butang.

34 Tan-awa, ginasiling ko sa inyo nga ang inyo mga kauturan sa Sion nagasugod na nga maghinulsol, kag nagakalipay ang mga anghel bangod sa ila.

35 Apang, wala ako nalipay gid sa madamo nga butang; kag wala ako nalipay sa akon alagad nga si William E. McLellin, ukon sa akon alagad nga si Sidney Gilbert; kag sa obispo man, kag ang iban may madamo pa nga butang nga dapat hinulsulan.

36 Apang sa pagkamatuod ginasiling ko sa inyo nga ako, nga Ginuo, magapamatok sa kalainan sa Sion, kag magapangabay sa iya mga lideres nga maghinulsol kag magpati sa akon, kag magapina sa Sion tubtob nga magmadinalag-on sia kag matinlo na sa akon atubang.

37 Kay indi ini sia pagtabugon sa iya nahamtangan. Ako, nga Ginuo, ang naghambal sini. Amen.