1 E koaua, ae taku te Uea: E na koro bukina bwa aomata nako ake a kitani aia bure ao n roko nakoiu, ao ni wetea arau, ao n ongeaba nakon bwanaau, ao ni kawakini au tua, a na nora ubu ao n ataia bwa bon iai Ngai;

2 Ao bwa Ngai te oota ni koaua are e kaotaia aomata nako ake a roko nakon te aonaba;

3 Ao bwa Ngai iroun te Tama, ao te Tama irou, ao ti teuana Ngai ma te Tama—

4 Te Tama ibukina e anganai bwanininna, ao te Nati ibukina I mena n te aonaba ao ni karika rabwatau bwa umwau, ao ni maeka i buakoia natiia aomata.

5 I mena n te aonaba ao I karekea mai iroun Tamau, ao ana mwakuri a boni kaotaki raoi.

6 Ao Ioane e nooria ao e kaota koauan bwaninin mimitongiu, ao bwaninin ana rongorongo Ioane e na kaotaki rimwi.

7 Ao e kaota koauana, ni kangai: I noora mimitongina, bwa boni iai mai moana, i mwaain rikin te aonaba;

8 Ngaia are, n te moan ao bon iai te Taeka, bwa boni ngaia te Taeka, are te tia uarongorongo ibukin te kamaiuaki—

9 Ootan ao te Tia Kaboa te aonaba; Tamnein te koaua, are e roko nakon te aonaba, ibukina bwa te aonaba e karaoaki irouna, ao irouna bon maiuiia aomata ao ootaia aomata.

10 Taian aonaba a karaoaki irouna; aomata a karaoaki irouna; bwaai ni kabane a karaoaki irouna, ao i nanona, ao mai irouna.

11 Ao Ngai, Ioane, I kaota koauana bwa I noora mimitongina, ae aron mimitongin te Rikitemanna iroun te Tama, e onrake n te akoi ao te koaua, are Tamnein te koaua, are e roko ao ni maeka n te rabwata, ao ni maeka i buakora.

12 Ao Ngai, Ioane, I nooria bwa e aki karekea bwanininna n te moan, ma e karekea te akoi ibukin te akoi;

13 Ao e aki karekea bwanininna n te moan, ma e reitinako man te akoi nakon te akoi, ni karokoa e karekea bwanininna;

14 Ao ngaia are e aranaki bwa Natin te Atua, ibukina e aki karekea bwaninina n te moan.

15 Ao Ngai, Ioane, I kaota koauana, ao taraia, e kaukaki karawa, ao e ruo nakoina te Tamnei ae Raoiroi n ai aron te taobe, ao n tiku i aona, ao e roko te bwanaa mai karawa ae kangai: Aio Natiu ae tangiraki.

16 Ao Ngai, Ioane, I kaota koauana bwa e karekea bwaninin mimitongin te Tama;

17 Ao e karekea te mwaaka ni kabane, i karawa ao n te aonaba naba, ao mimitongin te Tama e mena irouna, bwa e maeka irouna.

18 Ao e na koro bukina, bwa ngkana kam kakaonimaki kam na karekea bwaninin ana rongorongo Ioane.

19 I anganingkami taeka aikai bwa kam aonga n oota ao n ataa aron te taromauri, ao n ataia bwa antai ae kam taromauriia, bwa kam aonga n nakon te Tama n arau, ao n te tai ae riai kam na karekea bwanininna.

20 Bwa ngkana ko kawakini au tua nako kam na karekea bwanininna, ao ni kamimitongaki irou n aron ae Ngai iroun te Tama; ngaia are, I tuangkami, kam na karekea te akoi ibukin te akoi.

21 Ao ngkai, e koaua ae I tuangkami, iai Ngai mai moana ma te Tama, ao Ngai te Karimoa n Nati;

22 Ao ni kabane naake a manga bungiaki rinanou bon taan taua mimitongina, ao bon ngaiia ana ekaretia te Karimoa n Nati.

23 Kam bon mena naba mai moana ma te Tama; ngke bon te Tamnei, are Tamnein te koaua;

24 Ao te koaua bon te atatai ni bwaai n aroia ngkai, ao n aroia ngkoa, ao n aroia n taai aika a na roko;

25 Ao tera ae raka ke e kee i aan aio bon tamnein teuare e buakaka are te tia kewe mai moana.

26 Tamnein te koaua bon mai iroun te Atua. Ngai Tamnein te koaua, ao Ioane e kaota koauau, ni kangai: E karekea bwaninin te koaua, eng, ae taian koaua ni kabane;

27 Ao akea te aomata ae karekea bwaninina tii ngkana e kawakini au tua.

28 Ane e kawakini ana tua e karekea te koaua ao te oota, ni karokoa e kamimitongaki n te koaua ao n ataakin bwaai ni kabane.

29 Te aomata e mena naba mai moana ma te Atua. Te rabakau, ke ootan te koaua, e aki karikaki ke ni karaoaki, e bon aki kona ni karikaki ke ni karaoaki.

30 Koaua ni kabane a bon inaomata n aia tabo are e a tia te Atua ni katikuia iai, ni mwakuri i bon ibukiia, n aroia naba ni kabane taian rabakau; bwa mwiina e na akea te maiu.

31 Nooria, aio ana inaomata n rinerine te aomata, ao aio kabuakakaan te aomata; ibukina bwa are iai mai moana e kaotaki raoi nakoia, ao a aki karekea te oota.

32 Ao aomata nako are tamneia e aki karekea te oota a mena i aan te kabuakakaaki.

33 Bwa te aomata bon te tamnei. Oin bwaai ake a karikaki mai iai bwaai nako bon akea tokiia, ao te tamnei ma oin rikin bwaai, a reitaki matoa, a karekea bwaninin te kimwareirei;

34 Ao ngkana a maenako, te aomata e aki kona ni karekea bwaninin te kimwareirei.

35 Oin bwaai ake a karikaki mai iai bwaai nako bon umwan te Atua; eng, te aomata bon umwan te Atua, ae te tembora; ao te tembora ane e bareka, te Atua e na urua te tembora anne.

36 Mimitongin te Atua bon te rabakau, ke, n taekana tabeua, te oota ao te koaua.

37 Te oota ao te koaua e kaakea teuare e buakaka.

38 Tamneia nako aomata bon akea aia bure mai moana; ao ibukin ae te Atua e a tia ni kabooia aomata man te bwaka, aomata a manga riki, n aia tai n ataei, n akea aia bure imatan te Atua.

39 Ao teuare e buakaka e roko ao e uotanako te oota ao te koaua, rinanon te aki ongeaba, mai irouia natiia aomata, ao ibukin aia katei aia bakatibu.

40 Ma I a tia n tuangkami bwa kam na kaikawaia natiimi i nanon te oota ao te koaua.

41 Ma e koaua ae I tuangko, au tia mwakuri ae Frederick G. Williams, ko a tia n reitinako ni mena i aan te kabuakakaaki aei;

42 Ko a tia n aki reireinia natim te ota ao te koaua, ni kaineti ma tua; ao teuare e buakaka iai mwaakana, ngkai naba, i aom, ao aio bukin karawawataakim.

43 Ao ngkai I anga nakoim te tua—ngkana ko tangiria ni kamaiuaki ko na bairea raoi oin am auti, bwa a mwaiti bwai aika a aki eti n am auti.

44 E koaua, ae I tuangko au tia mwakuri ae Sidney Rigdon, bwa ni bwai tabeua e a tia n aki kawakini au tua ni kaineti ma natina; ngaia are, te moan bairea raoi am auti.

45 E koaua, ae I tuangko au tia mwakuri ae Iotebwa Timiti te Ataei, ke n taekana teuana, N na araningkami bwa raou, bwa ngkami raou, ao kam na karekea ami bwaibwai ma ngai—

46 I weteingkami au taan tia mwakuri ibukin te aonaba, ao ngkami aia tia mwakuri ibukiu—

47 Ao ngkai, e koaua ae I tuangko Iotebwa Timiti te Ataei—Ko a tia n aki kawakini tuua, ao n riai n tei n takuaki i matan te Uea;

48 Am utu a riai n raira nanoia ao ni kaakeai bwai tabeua, ao ni kakauongo riki ma nanoia ni koaua nakon am taeka, ke a na kamwaingaki man aia tabo.

49 Te bwai are I taekinna nakon temanna I taekinna nakoia ni kabane; tataro n taai nako bwa mwiina e na iai mwaakan teuare e buakaka i aom, ao e na kamwaingko man am tabo.

50 Au tia mwakuri naba ae Newel K. Whitney, te bitiobi n au ekaretia, e riai ni katuaeaki, ao ni bairea raoi ana utu, ao n taraia bwa a botumwaaka ao ni ibuobuoki n te mwenga, ao n tataro n taai nako, ke a na kamwaingaki man aia tabo.

51 Ngkai, I tuangkami, raou, e riai au tia mwakuri ae Sidney Rigdon n nako ni mwanangana, ao ni katawea, ao ni katanoata naba ana ririki te Uea ae e a tia na rineia, ao te euangkerio ibukin te kamaiuaki, n aron ae N na anganna te konabwai n taetae; ao man ami tataro n onimaki ma te nano ae tii teuana N na boutokaia.

52 Ao a riai au taan mwakuri aika Iotebwa Timiti te Ataei ao Frederick G. Williams ni katawe naba, ao a na anganaki nakoia ni kaineti nakon te tataro n onimaki; ao ngkana kam teimatoa ni kawakini au taeka kam na aki kamangaoaki n te aonaba aei, ke n te aonaba ae e na roko.

53 Ao, e koaua ae I tuangkami, bwa bon au kantaninga bwa kam na katawe n rairi au koroboki aika tabu, ao ni karekea te atatai n rongorongon ngkoa, ao aaba, ao abanuea, ana tua te Atua ao aomata, ao ni kabane aikai ibukin kamaiuakin Tion. Amen.